- 2018-11-30 04:54:57
- ស្នេហា
ពេលភ្ញៀវទៅស៊ីការ បើម្ចាស់ការធ្វើចរិត៧យ៉ាងនេះ ដឹងតែគេនិយាយដើមផ្អើលភូមិ
- 2018-11-30 04:54:57
- ចំនួនមតិ 0 | ចំនួនចែករំលែក 0
ពេលភ្ញៀវទៅស៊ីការ បើម្ចាស់ការធ្វើចរិត៧យ៉ាងនេះ ដឹងតែគេនិយាយដើមផ្អើលភូមិ
ចន្លោះមិនឃើញ
ការរៀបចំមង្គលការឲ្យកូនប្រុស-ស្រី គឺជារឿងសំខាន់បំផុតក្នុងនាមជាឪពុកម្ដាយទាំងសងខាង និងជាការទទួលខុសត្រូវដ៏ធំមួយ។ ប៉ុន្តែមង្គលការនីមួយៗ អាចប្រព្រឹត្តិទៅបានយ៉ាងអធិកអធម ក៏អាស្រ័យដោយមានការចូលរួមពីភ្ញៀវកិត្តិយស ដែលបានអញ្ជើញ។ ដូច្នេះតើគួររៀបចំឥរិយាបទបែបណា ទើបភ្ញៀវកោតសរសើរពេញៗមាត់ ហើយទង្វើបែបណាទើបភ្ញៀវត្រឡប់មកវិញនិយាយដើមកប់ៗមាត់?
១. ភ្ញៀវចូលតុមិនទាន់ដើរហុចស្រោមសំបុត្រ
ម្ចាស់ការមួយចំនួនតូច គឺព្រួយបារម្ភខ្លាំងរឿងចំណងដៃតែម្ដង គ្រាន់តែភ្ញៀវចូលតុភ្លាមដើរហុចស្រោមសំបុត្រទុកចងដៃភ្លែត។ ប្រសិនបើម្ចាស់ការធ្វើទង្វើបែបនេះហាក់គិតតែរឿងលុយខ្លាំងពេក មិនគិតដល់មុខមាត់កិត្តិយសខ្លួនឯង ហើយភ្ញៀវដែលចូលរួមគេអាចនឹងអាក់អន់ចិត្តចំពោះកាយវិការបែបនេះដែរ។ ដូច្នេះចំណុចនេះគួរតែជៀសវាង តែបើព្រួយបារម្ភបាត់ចំណងដៃគ្រាន់តែឧស្សាហ៍ឃ្លាំមើលកន្លែងកត់ចំណងដៃបានហើយ។
រូបតំណាង
២. ពេលដើរហៅភ្ញៀវនិយាយឡើងផ្អែមតែពេលទៅដល់ម្ចាស់ការមិនដឹងបាត់ស្រមោលទៅណា
ចំណុចនេះក៏ជាការធ្វេសប្រហែសខ្វះការយកចិត្តទុកដាក់ចំពោះភ្ញៀវដែលចូលរួមដែរ ហើយភ្ញៀវអាចនឹងអន់ចិត្តបើម្ចាស់ការសម្ដែងកាយវិការបែបនេះ។ ដូច្នេះយកល្អកុំផ្អែមល្ហែមតែពេលដើរហៅភ្ញៀវពេក តែពេលភ្ញៀវទៅដល់រោងការគួរណាស់តែចេញមុខ ដើម្បីស្វាគមន៍ផ្ដល់ភាពកក់ក្ដៅដល់ភ្ញៀវ។
៣. ម្ហូបការធ្វើយកចំណេញ
ម្ហូបដើម្បីទទួលភ្ញៀវក៏ជារឿងសំខាន់ និងបង្ហាញអំពីកិត្តិយសមុខមាត់គ្រួសារ ក៏ដូចជាបង្ហាញពីការឲ្យតម្លៃដល់ភ្ញៀវដែលចូលរួម។ ម្ចាស់ការត្រូវយកចិត្តទុកដាក់ខ្លាំងបំផុតចំពោះចំណុចនេះ កុំចេះតែធ្វើឲ្យបានៗគ្រាន់តែបង្គ្រប់កិច្ចឲ្យសោះ ត្រូវធ្វើឲ្យសមរម្យតែក៏មិនហូរហៀរដល់ថ្នាក់ចាក់ចោលដែរ។ ដូច្នេះដើម្បីតែចង់ចំណេញសុខចិត្តធ្វើម្ហូបឲ្យតែបានៗ ជៀសមិនផុតនឹងការនិយាយនិន្ទាពីអ្នកអញ្ជើញចូលរួមផ្ទាល់។
៤. ជិតដល់ម៉ោងកាត់នំម្ចាស់ការដើរកេះសួរភ្ញៀវចងដៃហើយឫនៅ
ម្ចាស់ការមួយចំនួនមិនត្រឹមតែដើរហុចសំបុត្រឲ្យភ្ញៀវតាមតុទេ តែពេលដល់ម៉ោងកាត់នំ មើលតែភ្ញៀវណាមិនទាន់ចងដៃ គឺដើរហុច និងសួរត្រង់ៗតែម្ដងថា ចង់ដៃហើយឫនៅ? នេះក៏ជាទង្វើមួយគួរជៀសវាងដែរ តែបើសិនជាដើរផុតពីរោងទាំងមិនទាន់ចងសឹមសារ៉េតាមក្រោយ។
៥. ភេសជ្ជៈ និងស្រាមិនដែលស្គាល់ម៉ាក
ភេសជ្ជៈ និងស្រាល្អៗ ម៉ាកល្បីមានគេស្គាល់ច្រើន ដើម្បីយកទៅទទួលភ្ញៀវឲ្យសក្ដិសមនឹងកិត្តិយសគ្រួសារក៏ត្រូវគិតពិចារណាដែរ។ ប៉ុន្តែម្ចាស់ការមួយចំនួនតូចមិនដឹងជាយកភេសជ្ជៈឫស្រាតម្លៃធូរថ្លៃនិងម៉ាកមិនល្បីមកទទួលភ្ញៀវ ព្រោះចង់ចំណេញ។ ដូច្នេះបើគិតថា ចង់ឱ្យភ្ញៀវសរសើរពេលត្រឡប់ទៅវិញគួរគិតចំណុចនេះដែរ។
៦. តាមឃ្លាំមើលភ្ញៀវគ្រប់ពេលមិនឱ្យបាត់មួយពព្រិចភ្នែក
ទទួលស្គាល់ថា ភ្ញៀវមួយចំនួនមិនត្រឹមតែមកហូបខ្លួនឯងទេ ឆ្លៀតវេចស្រាថ្លៃៗ ឫភេសជ្ជៈត្រឡប់ទៅវិញទៀត។ តែក្នុងនាមជាម្ចាស់ការកុំគិតតែលើរឿងខ្លាចភ្ញៀវវេចពេក តែអ្នកដែលត្រូវព្រួយបារម្ភគឺអ្នកពិធីការ (ក្រុមបម្រើសេវាកម្ម) ទៅវិញទេ អាចផ្សំគំនិតគ្នាលួចរបស់ចេញពីរោងបាន។ ចំណែកភ្ញៀវបើទោះជាវេចក៏មិនដល់ថ្នាក់យកទាំងកេសដែរ។
៧. ពេលហែជំនូនហើយមិនដាក់ផ្លែឈើទទួលភ្ញៀវ
តាមធម្មតាបន្ទាប់ពីហែជំនូនហើយ តែងហូបបបរពេលព្រឹក ក្នុងនោះផ្លែឈើក៏ត្រូវដាក់ទទួលភ្ញៀវដែរ មិនត្រូវយកលាក់ទុកទេ។ តែបើករណីគ្រួសារខាងស្រី និងខាងប្រុសយកផ្លែឈើទុករៀងខ្លួនមិនទទួលភ្ញៀវ នោះនឹងធ្វើឲ្យអ្នកចូលរួមអន់ចិត្ត និងអាចនិយាយមិនល្អពេលត្រឡប់ទៅវិញ៕