- 2019-04-23 05:05:45
- សុខភាព
អ្នកជំនាញអំពាវនាវ ឲ្យមានការដំឡើងពន្ធថ្នាំជក់ ក្រោមហេតុផលមួយនេះ
- 2019-04-23 05:05:45
- ចំនួនមតិ 0 | ចំនួនចែករំលែក 0
អ្នកជំនាញអំពាវនាវ ឲ្យមានការដំឡើងពន្ធថ្នាំជក់ ក្រោមហេតុផលមួយនេះ
ចន្លោះមិនឃើញ
អ្នកជំនាញមកពីសម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ (SEATCA) អង្គការសុខភាពពិភពលោក និងអង្គការចលនាដើម្បីសុខភាពកម្ពុជា បានអំពាវនាវឲ្យរាជរដ្ឋាភិបាលកម្ពុជា ដំឡើងពន្ធលើផលិតផលថ្នាំជក់បន្ថែម ដើម្បីកាត់បន្ថយការប្រើប្រាស់ថ្នាំជក់ បង្ការកុំឲ្យមានអ្នកស្លាប់បន្ត និងបង្កើនប្រាក់ចំណូលពន្ធបន្ថែម ដែលត្រូវការជាចាំបាច់សម្រាប់ពង្រឹងការថែទាំសុខភាពសម្រាប់ប្រជាពលរដ្ឋគ្រប់រូប។ ការអំពាវនាវនេះធ្វើឡើងនៅក្នុងពិធីជួបជុំអ្នកធ្វើការពាក់ព័ន្ធនឹងថ្នាំជក់ និងអ្នកសារព័ត៌មានបានមកជួបជុំគ្នានៅសណ្ឋាគារសាន់វ៉េ កាលពីព្រឹកថ្ងៃទី ២៣ ខែមេសា ២០១៩នេះ។
ផ្អែកតាមសេចក្ដីប្រកាសព័ត៌មានរបស់សង្គមស៊ីវិលបានឲ្យដឹងថា បច្ចុប្បន្ននេះ ប្រជាពលរដ្ឋកម្ពុជាលើសពី២លាននាក់ បានប្រើប្រាស់ផលិតផលថ្នាំជក់ ក្នុងនោះមានអ្នកជក់បារីជាង ១,៥លាននាក់ និងអ្នកចុកថ្នាំជក់ជិត០,៥លាននាក់។ រីឯការប្រើប្រាស់ថ្នាំជក់ក្នុងចំណោមយុវជន ក៏កំពុងកើនឡើងដែរ។
“គោលនយោបាយពន្ធលើថ្នាំជក់ ត្រូវបានពង្រឹងក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែគោលនយោបាយទាំងនេះ ពុំទាន់ឆ្លើយតបទាំងស្រុងចំពោះការកាត់បន្ថយការប្រើប្រាស់ថ្នាំជក់ និងការបង្កើនប្រាក់ចំណូលពន្ធរបស់រាជរដ្ឋាភិបាល សម្រាប់កម្មវិធីអភិវឌ្ឍសង្គមនៅឡើយ។ កម្ពុជា ហូតពន្ធតែ២៥%-៣០%ធៀបនឹងតំលៃលក់រាយរាល់ផលិតផលថ្នាំជក់ ហើយកម្ពុជាស្ថិតក្នុងចំណោមប្រទេសដែលមានអត្រាពន្ធលើថ្នាំជក់ទាបជាងគេបំផុត ក្នុងបណ្តាប្រទេសអាស៊ាន”។ នេះជាការលើកឡើងរបស់ វេជ្ជបណ្ឌិត Ulysses Dorotheo, នាយកប្រតិបត្តិ សម្ព័ន្ធ SEATCA. “ការដំឡើងពន្ធថ្នាំជក់ឲ្យខ្ពស់ គឺជាវិធានការដែលមានប្រសិទ្ធភាពខ្ពស់ ប៉ុន្តែមិនចំណាយច្រើនទេ ដែលវិធានការនេះត្រូវបានផ្តល់អនុសាសន៍ដោយអង្គការសុខភាពពិភពលោក ថាជាវិធានការឈ្នះឈ្នះ ព្រោះវាមិនតម្រូវឲ្យរាជរដ្ឋាភិបាលចំណាយអ្វីទាំងអស់ ផ្ទុយទៅវិញ វាបានផ្តល់នូវប្រាក់ចំណូលពន្ធសម្រាប់ទ្រទ្រង់ការថែទាំសុខភាពប្រជាពលរដ្ឋគ្រប់រូប ព្រមទាំងកាត់បន្ថយអ្នកជក់បារី និងបង្ការកុំឲ្យមានជម្ងឺដែលបង្កដោយថ្នាំជក់ នោះជាការបង្ការកុំឲ្យមានអ្នកស្លាប់ និងទទួលបានប្រាក់ចំណូលពន្ធបន្ថែម”។ នេះជា ប្រសាសន៍ លោកវេជ្ជបណ្ឌិត យ៉ិល ដារ៉ាវុធ តំណាងអង្គការសុខភាពពិភពលោក។
លោកវេជ្ជបណ្ឌិត មុំ គង់ នាយកប្រតិបត្តិ អង្គការចលនាដើម្បីសុខភាពកម្ពុជា បានបន្ថែមថា “អ្នកជំនាញផ្នែកសុខភាព និងសេដ្ឋកិច្ច បានឯកភាពគ្នាថា យើងអាចទទួលបានផលប្រយោជន៍សុខភាពសាធារណៈបាន លុះត្រាតែពន្ធលើផលិតផលថ្នាំជក់ត្រូវបានគេដំឡើងជាទៀងទាត់ ឲ្យទាន់កម្រិតអតិផរណា និងការកើនឡើងនៃប្រាក់ចំណូលក្នុងគ្រួសារ។ រាជរដ្ឋាភិបាលគួរតែមានទិសដៅធ្វើយ៉ាងណាឲ្យផលិតផលថ្នាំជក់មានតម្លៃថ្លៃ ដើម្បីកាត់បន្ថយការប្រើប្រាស់”។
ការសិក្សាបានបង្ហាញថា ប្រជាពលរដ្ឋមានលទ្ធភាពទិញបារី ២ដងច្រើនជាង បើប្រៀបធៀបរវាងឆ្នាំ ២០១៦ ទៅនឹងឆ្នាំ២០០២។ ការអង្កេតលើមតិយុវជន ដែលធ្វើឡើងដោយសាកលវិទ្យាល័យភូមិន្ទភ្នំពេញ និងអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ នៅឆ្នាំ២០១៨ បានបង្ហាញថា យុវជនភាគច្រើន នឹងឈប់ទិញបារីជក់ បើតម្លៃបារីឡើងដល់ ១០ ០០០រៀលក្នុង១កញ្ចប់។ បារីដែលមានពេញនិយមជាងគេ មានតម្លៃត្រឹមតែ ២ ០០០រៀលប៉ុណ្ណោះ បច្ចុប្បន្ន។
ស្របតាមការណែនាំអន្តរជាតិ ស្តីពីការហូតពន្ធថ្នាំជក់ អ្នកជំនាញក៏បានផ្តល់អនុសាសន៍ថា រចនាសម្ព័ន្ធពន្ធរបស់កម្ពុជា គួរតែផ្លាស់ប្ដូរទៅប្រព័ន្ធជាក់លាក់ (uniform specific tax system) ដែលងាយស្រួលជាងសម្រាប់រដ្ឋបាលសារពើពន្ធ ជាងប្រព័ន្ធបច្ចុប្បន្ន។ ទន្ទឹមនឹងនោះ គួរតែតម្រូវឲ្យមានអាជ្ញាប័ណ្ណសម្រាប់គ្រប់អ្នកផលិត អ្នកនាំចូល អ្នកចែកចាយ និងអ្នកលក់រាយផលិតផលថ្នាំជក់ ដើម្បីសម្រួលដល់ការប្រមូលពន្ធ និងប្រយុទ្ធប្រឆាំងនឹងការផលិតនិងការនាំចូលខុសច្បាប់ នូវផលិតផលថ្នាំជក់។
ច្បាប់ស្តីពីការត្រួតពិនិត្យផលិតផលថ្នាំជក់ ត្រូវបានអនុម័តនៅឆ្នាំ ២០១៥ ចង្អុលបង្ហាញវិធានការសំខាន់ៗ ពាក់ព័ន្ធទៅនឹងការផ្គត់ផ្គង់ និងការកាត់បន្ថយតម្រូវការថ្នាំជក់ រួមទាំងវិធានការពន្ធដារផងដែរ ដោយសមស្របជាមួយនឹងអនុសញ្ញាស្តីពីការត្រួតពិនិត្យផលិតផលថ្នាំជក់ ដែលកម្ពុជាបានផ្តល់សច្ចាប័ននៅឆ្នាំ ២០០៥។
ការប្រើប្រាស់ថ្នាំជក់នៅតែជាមូលហេតុចម្បង ដែលបណ្ដាលឲ្យស្លាប់ ដែលអាចជៀសវាងបាន នៅក្នុងពិភពលោក។ នៅកម្ពុជា ប្រជាពលរដ្ឋប្រមាណ ១០ ០០០នាក់ ស្លាប់ជារៀងរាល់ឆ្នាំបណ្ដាលមកពីជំងឺដែលបង្កដោយការប្រើប្រាស់ថ្នាំជក់ ខណៈដែលការព្យាបាលជំងឺទាំងនេះ ត្រូវចំណាយយ៉ាងហោចណាស់ក៏ ១៦២,៧០ លានដុល្លារសហរដ្ឋអាមេរិកក្នុង១ឆ្នាំៗ៕