ផ្សារទំនើប Big C នៅខ្មែរ សម្ពោធជាផ្លូវការនៅថ្ងៃនេះ មានការបញ្ចុះតម្លៃកប់ៗ

2019-12-04 09:37:52
ព័ត៌មាន

2019-12-04 09:37:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្សារទំនើប Big C ជាផ្សារទំនើបដែលឈានមុខគេមួយនៅក្នុងប្រទេសថៃ និងត្រូវបានបង្កើតឡើងជិត ៣០ ឆ្នាំហើយនោះ ពេលនេះមានវត្តមាននៅក្រុងប៉ោយប៉ែត ខេត្តបន្ទាយមានជ័យហើយ ព្រមទាំងបើកសម្ពោធជាផ្លូវការនៅថ្ងៃទី០៤ ខែធ្នូ ឆ្នាំ ២០១៩នេះ។

ផ្សារទំនើប Big C បើកសម្ពោធជាផ្លូវការក្រោមអធីបតីភាព ឯកឧត្តម អ៊ូក សោភ័ណ ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជា ប្រចាំព្រះរាជាណាចក្រថៃឡង់ដ៍ លោក Aswin Techajareonvikul ជានាយកប្រតិបត្តិនៃក្រុមហ៊ុន BIG C SUPERCENTER និងអ្នកអង្គម្ចាស់ ស៊ីសុវត្ថិ រិទ្ធីរ៉ាវង្សផងដែរ។

យោងតាមប្រសាសន៍របស់លោក Aswin Techajareonvikul ជានាយកប្រតិបត្តិនៃក្រុមហ៊ុន BIG C SUPERCENTER នៅថ្ងៃនេះ បានឲ្យដឹងថា ៖ «យើងមានកិត្តិយសដែលមានវត្តមាននៅក្នុងប្រទេសកម្ពុជា ជាមួយនឹងការដាក់សម្ពោធផ្សារទំនើប Big C ជាលើកដំបូងនៅទីក្រុងប៉ោយប៉ែត»។

លោកបានបន្ថែមថា ៖ «ដោយមើលឃើញពីសក្ដានុពលរបស់ប្រទេសកម្ពុជា យើងចង់ក្លាយដៃគូនៃការអភិវឌ្ឍនៃតំបន់ប៉ោយប៉ែតនេះ តាមរយៈការនាំយកមកនូវសេវាកម្ម និងផលិតផលប្រកបដោយគុណភាពមកជូនប្រជាជនក្នុងតំបន់»។

ផ្សារទំនើប Big C មានទីតាំងស្ថិតនៅភូមិក្បាលស្ពានមួយ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានចម្ងាយប្រមាណជាង ១ គីឡូម៉ែត្រតែប៉ុណ្ណោះពីច្រកព្រំដែនអន្តរជាតិប៉ោយប៉ែត។ ផ្សារទំនើបខ្នាតយក្សមួយនេះ បានបង្កើតការងាររាប់ពាន់កន្លែងជូនដល់ប្រជាជនកម្ពុជាថែមទៀតផង។

នៅក្នុងផ្សារទំនើបទាំងមូល មានដាក់លក់នូវទំនិញប្រើប្រាស់រាប់ពាន់ប្រភេទនាំចូលពីបណ្ដាប្រទេសជាច្រើន ដែលមានគុណភាពខ្ពស់ និងតម្លៃធូរថ្លៃសមស្របទៅតាមប្រាក់ចំណូលប្រជាជនដែលមានកម្រិតមធ្យម និងទាប។ នៅក្នុងផ្សារនេះ មានការបែងចែកដាច់ដោយឡែកពីគ្នា រវាងទីតាំងលក់សម្ភារៈប្រើប្រាស់ ទីតាំងលក់សំលៀកបំពាក់ ទីតាំងលក់គ្រឿងសម្អាង ក៏ដូចជាចំណីអាហារជាដើម ។ យ៉ាងណាមិញ ក្រុងប៉ោយប៉ែតនាពេលបច្ចុប្បន្ននេះ មានការអភិវឌ្ឍយ៉ាងខ្លាំងស្របពេលដែលកំណើនសេដ្ឋកិច្ចក្នុងតំបន់ទាំងមូលមានភាពល្អប្រសើរមួយកម្រិតទៀតនោះ វត្តមានផ្សារទំនើបដ៏ធំមួយនេះ នឹងចូលរួមចំណែកយ៉ាងសំខាន់ ក្នុងការបំពេញតម្រូវការបញ្ជាទិញទំនិញគ្រប់ប្រភេទរបស់ប្រជាពលរដ្ឋក្នុងតំបន់ក៏ដូចជាតំបន់ជិតខាងផងដែរ ។