- 2015-11-25 15:00:12
- ព័ត៌មាន
ត្រឹមរបរសូនរូបស្ករគ្រាប់ អាចរកប្រាក់ឲ្យកូនរៀនដល់ថ្នាក់មហាវិទ្យាល័យ
- 2015-11-25 15:00:12
- ចំនួនមតិ 0 | ចំនួនចែករំលែក 0
ត្រឹមរបរសូនរូបស្ករគ្រាប់ អាចរកប្រាក់ឲ្យកូនរៀនដល់ថ្នាក់មហាវិទ្យាល័យ
ចន្លោះមិនឃើញ
ឈរក្បែរម៉ូតូសង់កូរ៉េកញ្ចាស់មួយគ្រឿងនៅជិតពិធីសម្ពោធហាងថ្មីមួយនៅម្តុំបឹងកេងកង ១ បុរសចំណាស់ម្នាក់កំពុងប្រញាប់ដៃសូនរូបស្ករ Lollipop ដែលដាក់នៅលើធុងចំនួនបួនលើកែបខាងក្រោយ។
បុរសរូបនោះមានឈ្មោះថា គឹម ហាន ជាអតីតសាស្ត្រាចារ្យសាកលវិទ្យាល័យវិចិត្រសិល្បៈដែលបានប្រកបរបរជាអ្នកច្នៃរូបតុក្កតា និងសត្វចម្រុះពីស្ករ Lollipop នេះអស់រយៈពេលជិត ១០ ឆ្នាំមកហើយ។
លោកបន្តថា ជំនាញផ្នែកសូនរូបដែលលោកបង្រៀននិស្សិតនៅសាកលវិទ្យាល័យជាតិខាងលើជាបច្ច័យឲ្យលោកកើតគំនិតបង្កើតជាអាជីពមួយនេះឡើង។ «ដំបូងខ្ញុំគិតថា ខ្ញុំសូនរូបនៅលើថ្ម ឈើ និងសម្ភារៈជាច្រើនមុខទៀតបាន រឿងអីសូនរូបនៅលើស្ករនេះមិនបាន។ ដូច្នេះខ្ញុំក៏សាកល្បងសូនរូបនេះឡើង»។ បុរសចំណាស់រូបនេះនិយាយថា សិល្បៈនៃការច្នៃនេះមិនមាននរណាបង្រៀនទេ ពោលគឺកើតចេញពីជំនាញដែលលោកមានស្រាប់ក្នុងនាមជាសាស្ត្រាចារ្យម្នាក់នៃសាលាក្រហម។
បុរសវ័យ ៥៦ឆ្នាំឲ្យដឹងថា លោកអាចសូន្យរូបបានច្រើនទម្រង់រាប់តាំងពីសត្វច្រើនប្រភេទ តុក្កតា រហូតដល់រូបមុខមនុស្ស។ «ខ្ញុំអាចសូនរូបសត្វបានច្រើន និងរូបព្រះនាងស៊ីនដេរីឡា តាណូអែល មុខមនុស្សក៏ធ្វើបានដែរ»។ ចំពោះតម្លៃវិញ ស្ករដែលលោកសូនជារូបមានតម្លៃខុសៗគ្នាទៅតាមទំហំ និងប្រភេទរូបថា ពិបាក ឬស្រួល។ តម្លៃមានចាប់ពី ២ពាន់រៀល ៣ពាន់រៀល ៥ពាន់រៀល ១ម៉ឺនរៀលរហូតដល់ ១០០ ដុល្លារអាស្រ័យលើការចង់បានរបស់ភ្ញៀវ។ ចំពោះការសូន្យរូបមុខមនុស្សវិញគឺចាប់ពី ៥ ដុល្លារឡើង តែលោកអាចធ្វើបានតែនៅពេលថ្ងៃប៉ុណ្ណោះ ព្រោះភ្នែករបស់លោកចាស់មិនអំណោយផលនៅពេលយប់។
លោកបន្តថា លោកឆ្លៀតពេលប្រកបរបរនេះក្រៅម៉ោងក្រោយបង្រៀននៅសណ្ឋាគារណាហ្គេវើល។ «រាល់ថ្ងៃខ្ញុំបង្រៀនមួយថ្ងៃ ២ ម៉ោងនៅណាហ្គា ហើយបន្ទាប់ពីហ្នឹងពូចេញរកស៊ីខ្លួនឯងបាន»។ ការបង្រៀនពីរម៉ោងក្នុងមួយថ្ងៃ អាចឲ្យលោករកចំណូលបាន ១០០ ដុល្លារ។ ដោយឡែក បើមានអ្នកចង់ជួលលោកពូទៅសូនរូបក្នុងកម្មវិធីណាមួយក៏លោកពូទៅបានដោយយកតម្លៃក្នុងមួយម៉ោង ៥០ ដុល្លារ។ អ្នកដែលចង់ទាក់ទងឲ្យលោកពូទៅសូនរូបស្ករគ្រប់នៅកម្មវិធីនានាអាចទាក់ទងបានតាមរយៈលេខទូរសព្ទ ០៨៨ ៨៧៥៤ ៤៣៨។
ក្រៅពីជួយសម្រួលបន្ទុកគ្រួសារយ៉ាងច្រើន លោកពូបន្តថា ដោយសារជំនាញនេះទើបលោកអាចបញ្ជូនកូនស្រីពីរនាក់ឲ្យបានរៀនដល់ថ្នាក់មហាវិទ្យាល័យ។ បុរសចំណាស់បង្ហើបថា ក្នុងមួយថ្ងៃលោកពូអាចរកចំណូលបានមិនក្រោម ១០០ ដុល្លារទេ អាស្រ័យលើថារវល់តិចឬច្រើន៕
https://www.youtube.com/watch?v=1sp_U1tTc5g&feature=youtu.be
អត្ថបទ៖ ប្រាក់ ចាន់សីហា
