ផ្ទុះការរិះគន់អក្សរចិនលើស្លាកហាងគ្មានអក្សរខ្មែរ មន្ត្រីថាបានចុះណែនាំដែរ តែគេមិនស្តាប់

2018-05-15 02:43:10
ព័ត៌មាន

2018-05-15 02:43:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ករណីមហាជនរិះគន់ថា ស្លាកយីហោ ឬស្លាកសញ្ញាហាងលក់ដូរសរសេរអក្សរចិន, ថៃ ធំៗនៅលើអក្សរខ្មែរ ឬកន្លែងខ្លះមិនទាំងសរសេរអក្សរខ្មែរនោះ មន្ត្រីប្រតិកម្មថា ករណីនេះមន្ត្រីបានចុះអប់រំ ណែនាំហើយមួយដងជា២ដងហើយ តែម្ចាស់ដាក់ស្លាកទាំងនោះ មិនស្តាប់ មិនអនុវត្តតាម។

ប្រជាពលរដ្ឋ មន្ត្រីរាជការ មន្ត្រីអង្គការសង្គមស៊ីវិល ឬនិយាយយរួមថា មហាជននៅក្រុងប៉ោយប៉ែត និងភ្ញៀវទៅទស្សនានៅក្រុងប៉ោយប៉ែតបានរង្គាសចិត្ត ហើយសោកស្តាយយ៉ាងខ្លាំងនឹងការដាក់ស្លាកយីហោនានាជាអក្សរចិន, អក្សរថៃក្នុងទំហំធំៗ ហើយនៅពីលើអក្សរខ្មែរ ឬជួនកាលសរសេរអក្សរបរទេសនេះ អត់ទាំងអក្សេរខ្មែរតែម្តងផងទៀត។

ស្លាកទាំងនោះ ដូចជាហាងអាហារ ផ្ទះសំណាក់ សណ្ឋាគារ ហាងកាហ្វេ ហាងអ៊ីនធើណិត បៀរហ្គាដិន ….ទាំងនោះមាននៅ “តំបន់ប្លុកកាស៊ីណូ និងតាមមាត់អូរព្រំដែនកម្ពុជា ថៃ”, នៅក្នុងកាស៊ីណូក្នុងភូមិក្បាលស្ពាន១នៅម្តុំផ្លូវផ្សារដើមពុទ្រា និងជិតផ្សារប៉ោយប៉ែតថ្មី ឬផ្សារអគ្គ និងនៅផ្លូវជាតិលេខ៥ ក្នុងភូមិបាលីលេយ្យ១ បាលីលេយ្យ២ ភូមិប៉ោយប៉ែតនៃសង្កាត់-ក្រុងប៉ោយប៉ែត។

មហាជនមានការមិនពេញចិត្ត ហើយបានចាត់ទុកការសរសេរអក្សរបរទេស លើបូរណភាពទឹកដីកម្ពុជាបែបនេះ ថាជាការមើលងាយ វាយបន្ថោកតម្លៃខ្មែរ។

លោក យង់ តាំងកួយ ប្រធានមន្ទីរវប្បធម៌ និងវិចិត្រសិល្បៈខេត្តបន្ទាយមានជ័យ បាននិយាយប្រាប់សារព័ត៌មានថា អាជ្ញាធរនិងជំនាញមានច្បាប់ស្តីពីការដាក់ស្លាកយីហោជាអក្សរខ្មែរឲ្យធំជាង និងនៅពីលើអក្សរបរទេស។ តែករណីថាសរសេរជាអក្សរចិន, ថៃ អត់អក្សរខ្មែរ ឬមានដែរ តែនៅពីក្រោមនិងតូចជាងនៅតំបន់ប៉ោយប៉ែតនោះ ជំនាញក៏ដូចជាអាជ្ញាធរមិនគាំទ្រទេ។

ចំណែកលោក សាន ស៊ានហូ អភិបាលក្រុងប៉ោយប៉ែត ធ្លាប់និយាយកាលពីពិធីប្រកាសទទួលស្គាល់ និងសម្ពោធទីស្នាក់ការសមាគមពាណិជ្ជកម្មចិន កម្ពុជានៅក្រុងប៉ោយប៉ែតថា អាជ្ញាធរបានណែនាំ ហាមឃាត់ជនជាតិចិនដែលប្រព្រឹត្តល្មើស។ ឬធ្វើស្លាកយីហោខ្លួនជាអក្សរចិន គ្មានអក្សរខ្មែរ។ ប៉ុន្តែពេលមានករណីមានការរិះគន់ នាពេលនេះ អាជ្ញាធរបានចុះណែនាំហើយតែម្ចាស់កន្លែងនៅមិនទាន់អនុវត្តតាម។

ចំពោះលោក ឈឿន សេរីវុធ ប្រធានមន្ទីរទេសចរណ៍ខេត្តបន្ទាយមានជ័យវិញប្រាប់កាសែតរស្មីកម្ពុជានាថ្ងៃទី១៤ខែឧសភាថា តាមច្បាប់មួយរបស់ក្រសួងទេសចរណ៍ បានចែងថា រាល់ស្លាកសញ្ញា យីហោ ទាំងឡាយ ឲ្យសេសេរអក្សរខ្មែរជួរខាងលើ ហើយធំៗ។ បន្ទាប់មកសរសេរអក្សរអង់គ្លេសពីក្រោម ហើយតូចជាងពាក់កណ្តាល និងទើបអាចសរសេរអក្សរបរទេសផ្សេងទៀត (មានអក្សរចិន ,ជប៉ុន្ កូរ៉េ បារាំង. ) បានហើយតូចជាង។

លោកប្រធានមន្ទីរទេសចរណ៍រូបនេះបន្តថា ករណីស្លាកសញ្ញា ស្លាក់យីហោដែលសរសេរអក្សរចិនធំៗ ពីលើអក្សរខ្មែរនៅក្នុងទឹកដីខ្មែរនេះ. មន្ទីរបានបញ្ជូនមន្ត្រីទៅពិនិត្យ និងណែនាំអោយអ្នកម្ចាស់ដកហូតឬលុបចោល។ ប៉ុន្តែអាជីវករឬម្ចាស់ទាំងនោះ មិនសហការ និងមិនដកហូតស្លាកទាំងនោះឡើយ។ ក្នុងនោះ ម្ចាស់ខ្លះ បានឌឺដង ព្រហើនដាក់មន្ត្រីសមត្ថកិច្ច និងអាជ្ញាធរថែមទៀត ដោយលើកឡើងថា ការសរសេរអក្សរបរទេស ដើម្បីទាក់ទាញភ្ញៀវទស្សនាច្រើនឡើងៗ។