- 2018-07-05 10:33:16
- ព័ត៌មាន
រាជរដ្ឋាភិបាលចេញសារាចរ ៨ចំណុច ដើម្បីត្រៀមរៀបចំខួបប្រាសាទព្រះវិហារ និងប្រាសាទសំបូរព្រៃគុក
- 2018-07-05 10:33:16
- ចំនួនមតិ 0 | ចំនួនចែករំលែក 0
រាជរដ្ឋាភិបាលចេញសារាចរ ៨ចំណុច ដើម្បីត្រៀមរៀបចំខួបប្រាសាទព្រះវិហារ និងប្រាសាទសំបូរព្រៃគុក
ចន្លោះមិនឃើញ
២០០៨-២០១៨ គឺមានរយៈពេល១០ឆ្នាំគត់ ដែលអង្គការ UNESCO បានចុះបញ្ជីប្រាសាទព្រះវិហារជាសម្បត្តិបេតិកភណ្ឌពិភពលោក។ ២០១៧-២០១៨ គឺជាខួបលើកទី១ នៃប្រាសាទសំបូរព្រៃគុក ក្នុងខេត្តកំពង់ធំ បានចុះបញ្ជីជាសម្បត្តិបេតិកភណ្ឌពិភពលោក។ ម៉្លោះហើយ រាជរដ្ឋាភិបាលកម្ពុជាគ្រោងរៀបចំព្រឹត្តិការណ៍ទាំងពីរបញ្ចូលគ្នានៅពហុកីឡដ្ឋានជាតិអូឡាំពិក នាថ្ងៃទី ១៥ ខែកក្កដា ឆ្នាំ ២០១៨ វេលាល្ងាច។
ចុចអាន៖ វត្តអារាមជិត ៥ ០០០ទូទាំងប្រទេសកម្ពុជា នឹងទូងស្គរព្រមៗគ្នា នៅព្រឹកថ្ងៃទី ១៥ ខែកក្កដា ២០១៨
ដើម្បីឲ្យការប្រារព្ធព្រឹត្តិការណ៍វប្បធម៌ជាតិ អបអរសាទរខួបលើកទី ១០ ឆ្នាំ នៃប្រាសាទព្រះវិហារ និងខួបលើកទី ១ នៃតំបន់ប្រាសាទសំបូរព្រៃគុក ដែលបានចុះបញ្ជីសម្បត្តិបេតិកភណ្ឌពិភពលោក ប្រព្រឹត្តិទៅដោយជោគជ័យរាជរដ្ឋាភិបាល បានចេញសារាចរណែនាំមួយចុះកាលបរិច្ឆេទថ្ងៃទី ១២ មិថុនា កន្លងទៅ ដែលមាន ៨ចំណុច ដូចខាងក្រោម៖
១. អនុញ្ញាតឲ្យស្ថាប័នវប្បធម៌ (ក្រសួងវប្បធម៌ និងវិចិត្រសិល្បៈ និងអាជ្ញាធរជាតិព្រះវិហារ) និងសហភាពសហព័ន្ធយុវជនកម្ពុជា (ស.ស.យ.ក) រួមគ្នាធ្វើជាសេនាធិការរបស់រាជរដ្ឋាភិបាល ក្នុងការរៀបចំពិធីនេះ។
២. ត្រូវសហការជាមួយក្រសួង ស្ថាប័ន អាជ្ញាធរដែនដី ដែលជាសមាជិកគណៈកម្មការអន្ដរក្រសួងរៀបចំការប្រារព្ធព្រឹត្តិការណ៍វប្បធម៌ជាតិ ដើម្បីអបអរសាទរខួបលើកទី ១០ នៃប្រាសាទព្រះវិហារ និងខួបលើកទី១ នៃតំបន់ប្រាសាទសំបូរព្រៃគុក ដែលបានចុះបញ្ជីជាសម្បត្តិបេតិកភណ្ឌពិភពលោក និងបណ្ដាអង្គការជាតិ អង្គការអន្តរជាតិ រៀបចំព្រឹត្តិការណ៍នេះឲ្យបានអធិកអធម ដោយនៅតាមក្រសួង ស្ថាប័ន រោងចក្រសហគ្រាស និងគ្រប់លំនៅឋានប្រជាពលរដ្ឋត្រូវលើកទង់ជាតិ ទង់ជ្វាលា បដាពាក្យស្លោក បិទគំនូរផ្សាយ តាមដងផ្លូវសាធារណៈ ទីលានសាធារណៈ ចាប់ពីថ្ងៃទី ១៤ ដល់ថ្ងៃទី ១៥ ខែកក្កដា ២០១៨។
៣. ក្រសួងធម្មការ និងសាសនា ត្រូវបំផុសចលនាព្រះសង្ឃនៅគ្រប់ទីអារាមទូទាំងប្រទេស ឲ្យរៀបចំកម្មវិធីទូងស្គរជ័យនៅថ្ងៃអាទិត្យ ៣កើត ខែទុតិយាសាឍ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី ១៥ ខែកក្កដា ឆ្នាំ ២០១៨ វេលាម៉ោង ៩ព្រឹក ដើម្បីចូលរួមអបអរសាទរព្រឹត្តិការណ៍វប្បធម៌ជាតិដ៏មានសារសំខាន់នេះឲ្យកាន់តែអធិកអធម ក៏ដូចជាការផ្សព្វផ្សាយ និងជូនព័ត៌មានដល់ប្រជាពលរដ្ឋខ្មែរ និងជនបរទេសនៅគ្រប់មជ្ឈដ្ឋានគ្រប់ទីកន្លែង បានដឹងព្រឹត្តិការណ៍នេះ។
៤. ក្រសួងព័ត៌មាន ត្រូវរៀបចំកម្មវិធីផ្សាយ ឲ្យបានទូលំទូលាយតាមបណ្ដាញសារព័ត៌មានជាតិ និងឯកជន រួមមានវិទ្យុ ទូរទស្សន៍ កាសែត និងទស្សនាវដ្ដី នូវខ្លឹមសារនៃព្រឹត្តិការណ៍វប្បធម៌ជាតិ ដើម្បីអបអរសាទរខួបលើកទី ១០ នៃប្រាសាទព្រះវិហារ និងខួបលើកទី១ នៃតំបន់ប្រាសាទសំបូរព្រៃគុក ដែលបានចុះក្នុងបញ្ជីជាសម្បត្តិបេតិកភណ្ឌពិភពលោក ព្រមទាំងឯកសារពាក់ព័ន្ធនានា ដើម្បីបំផុសឲ្យសាធារណជនយល់ដឹង និងចូលរួមកាន់តែសកម្មថែមទៀត ក្នុងការថែរក្សា ការពារ និងលើកស្ទួយសម្បត្តិបេតិកភណ្ឌវប្បធម៌ជាតិ។
៥. ក្រសួងទេសចរណ៍ ត្រូវធ្វើការផ្សព្វផ្សាយនូវខ្លឹមសារទេសចរណ៍វប្បធម៌ ឲ្យបានទូលំទូលាយ តាមគ្រប់រូបភាពជាពិសេសក្នុងចំណោមភ្ញៀវទេសចរជាតិ និងអន្តរជាតិ តាមរយៈទីភ្នាក់ងារទេសចរណ៍ និងប្រតិបត្តិការ ទេសចរណ៍គ្រប់ប្រភេទ សំដៅបង្កើនការទាក់ទាញ។
៦. អាជ្ញាធរជាតិព្រះវិហារ អាជ្ញាធរជាតិសំបូរព្រៃគុក ត្រូវសហការយ៉ាងជិតស្និទ្ធជាមួយអាជ្ញាធរដែនដីខេត្តរៀងៗខ្លួន និងរំលេចឡើងនូវខ្លឹមសារការងារដ៏ជោគជ័យរបស់អាជ្ញាធរនីមួយៗក្នុងការថែរក្សា ការពារ និងលើកតម្កើងតម្លៃបេតិកភណ្ឌវប្បធម៌ជាតិ ដ៏វិសេសវិសាលឲ្យបានគង់វង្ស ប្រកបដោយទិដ្ឋភាពរស់រវើក និងមានតម្លៃលេចធ្លោជាសកល ក្នុងការរៀបចំព្រឹត្តិការណ៍វប្បធម៌ជាតិជាប្រវត្តិសាស្ត្រនេះឲ្យកាន់តែអធិកអធមក្រៃលែង។
៧. ក្រសួងមហាផ្ទៃ និងក្រសួងការពារជាតិ ត្រូវមានការណែនាំបែងចែកកងកម្លាំង សហការការពារ សន្តិសុខ សណ្ដាប់ធ្នាប់សាធារណៈនៅតាមទីកន្លែងប្រារព្ធព្រឹត្តិការណ៍វប្បធម៌ជាតិ ដើម្បីអបអរសាទរខួបលើកទី ១០ នៃប្រាសាទព្រះវិហារ និងខួបលើកទី១ នៃតំបន់ប្រាសាទសំបូរព្រៃគុក ដែលបានចុះបញ្ជីជាសម្បត្តិបេតិកភណ្ឌពិភពលោក ឲ្យមានប្រសិទ្ធភាព និងស្មារតី ទទួលខុសត្រូវខ្ពស់។
៨. ស្ថាប័នវប្បធម៌ (ក្រសួងវប្បធម៌ និងវិចិត្រសិល្បៈ និងអាជ្ញាធរជាតិព្រះវិហារ) ត្រូវធ្វើជាលេខាធិការដ្ឋានក្នុងការរៀបចំឯកសារឃោសនាផ្សព្វផ្សាយនានា បម្រើឲ្យខ្លឹមសារព្រឹត្តិការណ៍វប្បធម៌ជាតិនេះ ឲ្យមានប្រសិទ្ធភាព និងស្មារតីទទួលខុសត្រូវខ្ពស់។
