កុំចេះតែហ៊ាន! អ្នកបង្ហោះ ឬ share រូបស្រីៗស្លៀកលេចលើលេចក្រោមក្នុងថ្ងៃសង្រ្កាន្ត ប្រឈមជាប់គុក ៥ឆ្នាំ

2019-04-11 09:17:03
ព័ត៌មាន

2019-04-11 09:17:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ូលិសថៃ បានព្រមានថា អ្នកដែលបង្ហោះ ឬ share រូបភាព និងវីដេអូនារី ឬភេទទី៣ ស្លៀកពាក់មិនសមរម្យ លេចលើលេចក្រោម ក្នុងឱកាសអបអរពិធីបុណ្យសង្រ្កាន្តនៅថៃ នឹងត្រូវទទួលរងការពិន័យជាប្រាក់ ឬជាប់ពន្ធនាគារ។ អ្នកដែលនៅក្នុងរូបថត ឬវីដេអូនោះ (អ្នកស្លៀកពាក់មិនសមរម្យ) ក៏ប្រឈមនឹងការពិន័យនេះដែរ។ នេះបើតាមការចុះផ្សាយរបស់កាសែតបាងកកប៉ុស្តិ៍ នាថ្ងៃទី១១ ខែមេសានេះ។

ការព្រមាន ដែលធ្វើឡើងដោយអនុប្រធាននាយកដ្ឋានទប់ស្កាត់បទល្មើសបច្ចេកវិទ្យារបស់ថៃ លោក Siriwat Dipho កាលពីថ្ងៃពុធម្សិលមិញនេះ គឺចំពេលដែលអាជ្ញាធរថៃ កំពុងរៀបចំពង្រឹងច្បាប់ ដើម្បីការពារសុវត្ថិភាព និងសណ្ដាប់ធ្នាប់ អំឡុងពិធីបុណ្យចូលឆ្នាំថៃ ដែលចាប់ផ្ដើមនាថ្ងៃចុងសប្ដាហ៍នេះ។

ពលរដ្ឋថៃ នាំគ្នាលេងបាញ់ទឹក ក្នុងថ្ងៃសង្រ្កាន្តនាឆ្នាំកន្លងមក (រូបភាពផ្ដល់សិទ្ធិដោយ Reuters)

មាត្រា ១៤ នៃក្រមព្រហ្មទណ្ឌបច្ចេកវិទ្យាថៃ បានចែងថា អ្នកដែលបង្ហោះ និងចែករំលែករូបភាពមិនសមរម្យ នឹងប្រឈមទោសអតិបរមា ជាប់ពន្ធនាគារ ៥ឆ្នាំ និង/ឬ ពិន័យជាប្រាក់ដល់ ១០ម៉ឺនបាត (ជាង ៣១០០ដុល្លារអាមេរិក)។

លោក Siriwat បានបន្ថែមទៀតថា ប៉ូលិសប្រឆាំងបទល្មើសបច្ចេកវិទ្យា នឹងអាចកំណត់ទីតាំងអ្នកប្រព្រឹត្តិល្មើសបាន មិនថាពួកគេនៅទីណានោះទេ។ នៅពេលចាប់ខ្លួន ពួកគេមិនអាចប្រកែកថា បង្ហោះ ឬ ចែករំលែកដោយអចេតនា ឬមិនបានដឹងពីច្បាប់ ដើម្បីគេចពីការពិន័យនោះទេ។

ពលរដ្ឋថៃ នាំគ្នាលេងបាញ់ទឹក ប៉ាតម្សៅ ក្នុងថ្ងៃសង្រ្កាន្តនាឆ្នាំកន្លងមក (រូបភាពផ្ដល់សិទ្ធិដោយ Reuters)

គួររំលឹកផងដែរថា រូបភាព ឬវីដេអូ បង្ហាញពីស្រីៗស្លៀកពាក់សិចស៊ីខ្លាំង ត្រូវបានគេឃើញយ៉ាងច្រើននៅលើបណ្ដាញសង្គម ឲ្យតែដល់ពេលសង្រ្កាន្តថៃម្ដងៗ។ លោក Siriwat ថាទង្វើនេះ គឺប៉ះពាល់យ៉ាងខ្លាំងដល់វប្បធម៌ថៃ។

សូមបញ្ជាក់ថា សង្រ្កាន្ត ឬពិធីបុណ្យចូលឆ្នាំថៃ ក្នុងឆ្នាំ២០១៩ នេះ ធ្វើឡើងចាប់ពីថ្ងៃទី១៣ ដល់ទី១៥ ខែមេសា ប៉ុន្តែជាទូទៅប្រជាជនថៃអបអរពិធីបុណ្យនេះ ចាប់ពីថ្ងៃ១១ ដល់ទី១៧ ខែមេសា៕

អត្ថបទ៖ សុខ សុវត្ថិ