• 2019-06-14 03:54:02
  • ព័ត៌មាន

លោកស្រី ឆាយ ស៊ីវលីន ពី​បុគ្គលិក​ប្រាក់​ខែ៣០​ដុល្លារ​ ក្លាយ​ជា​ថៅកែ និង​ប្រធាន​សមាគម​ទេសចរ​​ធំមួយ

  • 2019-06-14 03:54:02
  • ចំនួនមតិ 0 | ចំនួនចែករំលែក 0

ចន្លោះមិនឃើញ

តំណាង​​ឱ្យ​​ប្រតិបត្តិ​ករ​​ទេសចរ​​​ខ្ទង់រយ​ក្រុម​​ហ៊ុន លោក​ស្រី​ ឆាយ​ ស៊ីវលីន ត្រូវ​បាន​គេ​ដឹង​ថា ជា​ស្ត្រី​​ឆ្នើម​មួយ​រូប​មាន​ឈ្មោះ​បោះ​សំឡេង​​ច្រើន​ឆ្នាំ​មក​ហើយ ​​​នៅ​ក្នុង​វិស័យ​ទេសចរ​ណ៍​កម្ពុជា។ វិស័យ​ទេសចរ​ណ៍ ​ត្រូវ​បាន​ចាត់​ទុក​ជា​វិស័យ​ស្នួល​មួយ​ជួយ​ ​ជ្រោង​សេដ្ឋ​កិច្ច​ជាតិ និង​កំពុង​មាន​ការ​រីកចម្រើន។ ​មាន​​​តួនាទី​​ជា​ប្រធាន​សមាគម​ទី​​ភ្នាក់ងារ​ទេសចរណ៍​កម្ពុជា (CATA) លោកស្រី ឆាយ ស៊ី​វលីន​ បាន​ចូលរួម​ចំណែក​យ៉ាង​ខ្លាំង​ក្លា​រុញ​ឱ្យ​វិស័យ​នេះ​កាន់​តែ​មាន​វឌ្ឍនភាព និង​ការ​​​រីក​លូត​លាស់​ទៅមុខ​។

កើត​​​នៅ​ក្រុង​សៀមរាប​ ខេត្ត​សៀមរា​ប និង​មាន​ឈាម​ជ័រ​ជា​កូនចៅចិន លោក​ស្រី​គឺជា​កូនពៅ​​ក្នុងចំណោម​បងប្អូន​៤ ​នាក់ ដែល​មាន​​ឪពុក​ម្ដាយ​ប្រកប​របរ​​ធ្វើ​ស្រែ​ចម្ការ​​ និង​ក្រោយ​មក​ជា​អ្នក​លក់​ដូរ​​។ លោកស្រី​បាន​រៀន​ចប់​មធ្យម​សិក្សា​នៅ​​ឆ្នាំ​​១៩៩១​ និង​​បាន​ចូល​បម្រើ​ការងារ​ជា​មគ្គុទ្ទេសក៍​​ទេសចរ​​ ក្រោម​ការ​គ្រប់​គ្រង​របស់​មន្ទីរ​ទេសចរណ៍​ខេត្ត​សៀមរាប ដោយ​ទទួល​បាន​ប្រាក់ខែ​ប្រមាណ​ ៣០ ដុល្លារ​ប៉ុណ្ណោះ​ក្នុង​មួយខែ​។ ការ​ចូល​បម្រើ​ការងារ​ជា​មគ្គុទ្ទេសក៍​​​ទេសចរ ដោយ​សារ​លោក​ស្រី​​បាន​រៀន​ ​និង​មាន​សមត្ថភាព​​ប្រើប្រាស់​​ភាសា​អង់គ្លេស​ និង​ភាសា​បារាំង​បាន​ល្អ។

នៅ​អំឡុង​ឆ្នាំ​១៩៩៤ លោកស្រី​ឃ្លា​ត​ឆ្ងាយ​ពី​ស្រុក​កំណើត និង​អ្នក​មាន​គុណ​ ​​ផ្លាស់​មក​រស់​នៅ​រាជធានី​ភ្នំពេញ​ និង​បាន​បន្ត​ការ​សិក្សា​នៅ​វិទ្យាស្ថាន​ជាតិ​គ្រប់​គ្រប់ ​(សាកលវិទ្យាល័យ​ជាតិ​គ្រប់​គ្រង) លើ​មុខជំនាញ​គ្រប់​គ្រង​ពាណិជ្ជកម្ម ប៉ុន្តែ​ក្រោយ​បញ្ចប់​ការ​សិក្សា​នៅ​ឆ្នាំ​១៩៩៨​ ការងារ​របស់​លោកស្រី​​នៅ​តែ ​ទាក់​ទង​នឹង​វិស័យ​ទេសចរ​ណ៍​ដដែល​​។ លោកស្រី​បាន​ចូល​បម្រើ​ការងារ​នៅ​ក្រុមហ៊ុន​ទេសចរ​មួយ​ជា​អ្នក​​រៀប​​ចំ​ខ្សែ​ទស្សនកិច្ច និង​អ្នក​លក់​សំបុត្រ​យន្ត​ហោះ​នៅ​រាជធានី​ភ្នំពេញ​។

បម្រើ​ការងារ​​នៅ​ក្រុម​ហ៊ុន​ខាង​លើ​បាន​ប្រមាណ​មួយ​ឆ្នាំ​ អ្នកស្រី​បាន​លា​​ឈប់​ និង​ចូល​បម្រើ​ការងារ​​​នៅ​ក្រុម​ហ៊ុន​មួយ​ទៀត​មាន​តួនាទី​ជា​អ្នក​គ្រប់​គ្រង​​ម្នាក់​​។ លោកស្រី​ទទួល​បាន​បទពិសោធន៍​ជា​ច្រើន​ក្នុង​នាម​ជា​អ្នក​គ្រប់​​​គ្រង​ ខណៈ​​ចូល​បម្រើ​ការងារ​នៅ​ក្រុមហ៊ុន​​ខាង​លើ​បាន​ប្រមាណ ៤ ឆ្នាំ​។ “មាន​តួនាទី​ជា​អ្នក​គ្រប់​គ្រង​ក៏​ពិត​មែន​ ប៉ុន្តែ​ខ្ញុំ​​បាន​ចូល​ធ្វើ​ការងារ​គ្រប់​ផ្នែក​ទាំង​អស់ ធ្វើ​ Tour ​ក៏​ធ្វើ​ខ្លួនឯង​ ធ្វើ​បញ្ជី​ និង​ការ​គ្រប់​គ្រង​។ ដូច្នេះ​ហើយ​ទើប​​ធ្វើ​ឱ្យ​ខ្ញុំ​អាច​​មាន​បទ​ពិសោធន៍ និង​តែង​នឹក​ឃើញ​ដល់​ក្រុមហ៊ុន​ដែល​បាន​បណ្ដុះបណ្ដាល​ និង​ផ្ដល់​បទ​ពិសោធន៍​ជាច្រើន​ខ្ញុំ​ជានិច្ច”។​

បន្ទាប់ពី​កា​រ​ខិត​ខំប្រឹង​ប្រែង​ និង​ទទួល​បាន​នូវ​បទពិសោធន៍​ជា​ច្រើន​​មក​នោះ​នៅ​ឆ្នាំ​២០០២ លោកស្រី​បាន​សម្រេច​ក្តី​ស្រមៃ​ ដោយ​បង្កើត​ក្រុមហ៊ុន CSL Travel and Tour​ ខណៈ​ដំណើរ​​ការ​ក្រុមហ៊ុន​ដំបូង​ចំណាយ​ទុន​ប្រមាណ​ ៨ពាន់​ដុល្លារ។ នេះ​ជា​សមិទ្ធផល​ធំ​មួយ​​ បន្ទាប់​ពី​បាន​ខិត​ខំប្រឹង​ប្រែង​ជា​ច្រើន​ឆ្នាំ​​។ ប៉ុន្តែ​លោកស្រី​ក៏​បាន​ដឹង​រួច​ជាស្រេច​ហើយ​​ថា នឹង​អាច​មាន​ឧបសគ្គ​ចំពោះ​មុខ​ជាច្រើន​ ដែល​ត្រូវ​ដោះស្រាយ​។ ​** ​​យ៉ាង​ណា​មិញ​លោកស្រី​ហាក់​មាន​ជំនឿ​ចិត្ត​លើ​​សមត្ថភាព​ខ្លួន​ឯង ដោយ​សារ​មាន​ការ​គាំទ្រ​ពី​ក្រុម​​ការងារ ​ពិសេស​ពី​​គ្រួសារ​តែ​ម្តង**។

​​ការ​បើក​ដំណើរ​ការ​​ក្រុមហ៊ុន​ទេសចរ​ លោកស្រី​បាន​មើល​ឃើញ​យ៉ាង​ច្បាស់​ថា វិស័យ​នេះ​នឹង​អាច​មាន​ការ​រីកចម្រើន នៅ​ថ្ងៃ​ណាមួយ ខណៈ​កម្ពុជា​មាន​សក្ដានុពល​ច្រើន​យ៉ាង​ទាំង​ធនធានធម្មជាតិ វប្បធម៌ អារ្យធម៌​​ និង​ទំនៀម​ទម្លាប់​ ដែល​នេះ​ជា​ចំណុច​​ទាក់ទាញ​អ្នក​ទេសចរ​អន្តរ​ជាតិ​មក​ទស្សនា​ច្រើន​។ “អញ្ចឹង​សក្ដានុពល​ទាំងអស់​នេះ ខ្ញុំ​បាន​មើល​ឃើញ​តាំងពី​​អំឡុង​ទសវត្ស​​ឆ្នាំ​១៩៩០ មក​ម្ល៉េះ ពោល​តាំងពី​ខ្ញុំ​ធ្វើ​ជា​មគ្គុទ្ទេសក៍​ទេស​ចរ​ដំបូង។ដូច្នេះ​ហើយ​បាន​ខ្ញុំ​ប្រឹង​ប្រែង​ពង្រីក​ខ្លួន​ ធ្វើ​យ៉ាង​ណា​អាច​បម្រើ​នៅ​ក្នុង​វិស័យ​ទេសចរ​នេះ”។

លោក​ស្រី​បាន​ព្យាយាម​ផ្សព្វផ្សាយ​​ពី​សេវាកម្ម​របស់​ខ្លួ​ន​តាមរយៈ​សមាគម​​​ ស្ថាន​ទូត​បរទេស​នានា​ប្រចាំ​នៅ​កម្ពុជា តាមរយៈ​សិក្ខា​សាលា​ ជា​ពិសេស​គឺ​ការ​ព្យាយាម​​បង្ហាញ​​ពី​គុណភាព​សេវាកម្ម​របស់​ក្រុមហ៊ុន​។ ​ដំបូង​អតិថិជន​មិន​សូវ​មាន​ជំនឿ​ប៉ុន្មាន​ឡើយ ប៉ុន្តែ​បន្ទាប់​ពី​សាកល្បង​សេវាកម្ម​ម្តង​ហើយ​ក៏​ជាប់​ចិត្ត ខណៈ​ការ​ដំណើរ​ការ​ក្រុមហ៊ុន​អាច​ចាត់​ទុក​ជា​ឱកាស​ដ៏​ល្អ​មួយ ព្រោះ​ពេល​នោះ​មាន​ក្រុមហ៊ុន​ទេសចរ​ ឬ​ភ្នាក់ងារ​ទេសចរ​មិន​ច្រើន​​ឡើយ​រៀបចំ​កញ្ចប់​ដំណើរ​កម្សាន្ត​ទៅក្រៅ​ប្រទេស។​ “អញ្ចឹង​ខ្ញុំ​បើក​ក្រុមហ៊ុន​ពេល​នោះ ហាក់​ចំ​កាលៈទេសៈ​ ​ ដោយ​សារ​ក្រុមហ៊ុន​ក៏​មិន​ច្រើន​ និង​អ្នក​​មាន​ជំនាញ​ផ្នែក​​នេះ​ក៏​មិន​ច្រើន​​​​។ គ្រាន់តែ​បើ​ក​ភ្លាម ក្រុមហ៊ុន​​អាច​រក​ប្រាក់ចំណូល​ ដោយ​សារ​​កម្ពុជា​ពេល​នោះ​បាន​ភ្ជាប់​ជើង​​ហោះ​ហើរ​ត្រង់​ពេល​ ដែល​ធ្វើ​ឱ្យ​ចំនួន​ភ្ញៀវ​ទេសចរ​បាន​ កើន​ឡើង​ជា​​បន្ត​បន្ទាប់”។

បន្ទាប់​ពី​ដំណើរ​ការ​ក្រុម​ហ៊ុន​ទេស​ចរ មាន​ការ​រីក​ចម្រើន​ទៅមុខ​​​ លោកស្រី​ចាប់​ផ្ដើម​សម្លឹង បោះ​ទុន​​វិនិយោគ​​ផ្នែក​សណ្ឋាគារ​បន្ថែម​ទៀត​ ខណៈ​ពេល​នោះ​មាន​មិត្តភ័ក្ដិ​​ម្នាក់​ចង់​​លក់​សណ្ឋាគារ​ឱ្យ​ ដោយសារ​មាន​ការ​លំបាក​ក្នុង​ការ​គ្រប់​​គ្រង​ និង​​ត្រូវ​ឡើង​ចុះ​ភ្នំពេញ​-សៀមរាប។ អំឡុង​ឆ្នាំ​ ២០០៧ លោកស្រី​បាន​ទិញ​យក​សណ្ឋាគារ​លំដាប់​ផ្កាយ​៤ ដែល​មាន​ឈ្មោះ​ថា Kingdom Angkor ដែល​បាន​ដំណើរ​ការ​ស្រាប់​។

សណ្ឋាគារ​នេះ​មាន​ជាង ១០០​បន្ទប់​ ដែល​គិត​មក​ដល់​បច្ចុប្បន្ន​បាន​ដំណើរ​ការ​អាជីវកម្ម​ជាង ១០ ឆ្នាំ​​មក​ហើយ។ ប្រភព​ថវិកា​បោះ​ទុន​សណ្ឋាគារ​​បាន​មក​ពី​ការ​សន្សំ និង​កម្ចី​ពី​ធនាគារ។ “ពេល​​ហ្នឹង​ខ្ញុំ​ក៏​បារម្ភ​ដែរ ​ខ្លាច​រត់​អត់​រួច​ ប៉ុន្តែ​ក៏​ប្រថុយ ដោយសារ​កំណើន​ភ្ញៀវ​​ទេសចរ​ចេះតែ​កើន​ឡើង​ជា​បន្ត​បន្ទាប់ និង​បាន​ដំណើរ​ការ​ល្អ​រយៈពេល​១​ឆ្នាំ​​ពេញ​ក៏​ជួប​បញ្ហា​​ខ្វះ​​ភ្ញៀវ ដោយ​សារ​ពេល​នោះ​​ពិភពលោក​បាន​​ផ្អើល​នឹង​ជំងឺ​សារ​ និង​គ្រោះ​ទឹក​ជំនន់​នៅ​ខេត្ត​សៀមរាប​​​​”។ ​

បន្ថែម​លើ​សណ្ឋាគារ​លោក​ស្រី​ក៏​បាន​វិនិយោគ​ផ្នែក​​ ប៊ូទីក​ រឺស៊ត លំដាប់​ផ្កាយ៤កន្លះ​ ​មាន​ឈ្មោះ​ថា​ លីន​ណាយា​ ដែល​បាន​ដំណើរ​ការ​អាជីវកម្ម​ប្រមាណ ៥ ឆ្នាំ​កន្លងមក​ហើយ។ លោកស្រី​​ ឆាយ ស៊ីវលីន បាន​សម្លឹង​មើល​ឃើញ​ថា​ វិស័យ​សណ្ឋាគារ​និង​បដិសណ្ឋារកិច្ច​នៅ​ខេត្ត​សៀមរាប​នា​ប៉ុន្មាន​ឆ្នាំ​ចុង​ក្រោយ​នេះ​មាន​ការ​រីក​ចម្រើន​គួរ​ឱ្យ​កត់​សំគាល់​ ដោយសារ​មាន​លំហូរ​ភ្ញៀវ​ទេសចរ​​កើន​ឡើង​ពី​មួយ​ឆ្នាំ​ទៅ​មួយ​ឆ្នាំ​។ សណ្ឋាគារ​មាន​បន្ទប់​ស្អាតៗ​ ជាមួយ​នឹង​រចនាបថ​ទាន់​សម័យ​។ ប៉ុន្តែ​ក៏​ប្រឈម​ទៅ​នឹង​ការ​ប្រកួត​ប្រជែង​ខ្លាំង​​ផ្នែក​តម្លៃ​ផង​ដែរ។

មក​ដល់​បច្ចុប្បន្ន​អតីត​ក្មេង​ស្រី​មួយ​រូប​​ ដែល​ធ្លាប់​បម្រើ​ការងារ​ជា​មគ្គុទ្ទេសក៍​ទេសចរ នៅដើម​ទសវត្ស​ឆ្នាំ​១៩៩០ បាន​ក្លាយ​ជា​ថៅកែ​ក្រុម​ហ៊ុន និង​សណ្ឋាគារ​ ពិសេស​ជា​មេ​ដឹក​នាំ​​មួយ​រូប​ ដែល​តំណាង​ឱ្យ​​ក្រុម​ហ៊ុន​ និង​​ទីភ្នាក់ងារ​ទេសចរ​ខ្ទង់​រយ​ក្រុមហ៊ុន​។ លោកស្រី​ឱ្យ​ដឹង​ថា​ មាន​កត្តា​បី ដែល​ជំរុញ​ឱ្យ​លោកស្រី​ទទួល​បាន​ជោគជ័យ​គឺ កត្តា​​គ្រួសារ​ មហិច្ឆតា ​និង​ការ​ប្រឈម​ទៅ​នឹង​ការ​លំបាក​នានា​។ លោកស្រី​បាន​ចាត់​ទុក​អ្វី​​គ្រប់យ៉ាង​ដែល​ទទួល​បាន​ គឺ​ជា​ភាព​ជោគជ័យ​ដ៏​ត្រចះត្រចង់​បំផុត​ ព្រោះ​ភាព​ជោគជ័យ​មិនមែន​ទាល់តែ​ក្លាយ​ជា​អ្នក​ដឹក​នាំ​ប្រទេស​ទើប​ហៅ​ថា ជោគជ័យ​នោះ​ទេ​។ លោក​ស្រី​បាន​កំណត់​អត្ថន័យ​នៃ​ភាព​ជោគជ័យ​ លើ​ការ​សម្រេច​បំណង​ប្រាថ្នា​កន្លង​មក​ និង​ការ​រួម​ចំណែក​ក្នុង​ការងារ​សង្គម ធ្វើ​ឱ្យ​មនុស្ស​នៅ​ជុំវិញ​ខ្លួន​សប្បាយ​ចិត្ត និង​មាន​ពេល​វេលា​គ្រប់​គ្រាន់​ថែទាំ​ក្រុម​គ្រួសារ។

លោកស្រី​បាន​ផ្ដាំផ្ញើ​ទៅ​យុវជន​ជំនាន់​ក្រោយ​​ ពិសេស​យុវនារី ត្រូវ​មាន​ភាព​រឹង​មាំ​ បង្កើន​សមត្ថភាព​របស់​ខ្លួន និង​ត្រូវ​ចាំ​ថា​ អ្វី​ក៏​យើង​អាច​ធ្វើ​បាន​ដែរ​ឱ្យ​តែ​មាន​ឆន្ទ​។ បើ​គ្រាន់តែ​ចង់​ខ្លាំង​តែ​​យើង​អត់​ពង្រឹង​សមត្ថភាព​ខ្លួន​យើង​ផង​ យើង​ក៏​អត់​អាច​ទៅ​ប្រកួត​ប្រជែង​នឹងគេ​បាន​ដែរ។ ពោល​គឺ​មិន​អាច​ខ្លាំង​រួច​ទេ ទាល់​តែ​ពង្រឹង​ការ​រៀន​សូត្រ​បណ្ដុះបណ្ដាល​ខ្លួន​ឯង​ អាន​សៀវភៅ​ឱ្យ​បាន​ច្រើន​ អាន​ព័ត៌មាន​ឱ្យ​បាន​ច្រើន។ តាម​ឱ្យ​ទាន់​បរិបទ​សង្គម​បច្ចេកវិទ្យា​​ បុរស​អាច​ធ្វើ​បាន​ ស្រ្តី​ក៏​កាន់​តែ​អាច​ធ្វើ​បាន​ជាង​បុរស​ទៅទៀត​។ ត្រូវ​មាន​មហិច្ឆតា​ខ្ពស់​ និង​ថែ​ទាំ​សុខភាព​ឱ្យ​បាន​ល្អ​​។

ស្រ្តី​ក៏​អាច​ទទួល​បាន​ជោគជ័យ​ដូច​បុរស​ដែរ ដរាប​ណា​គេ​មាន​ការ​ខិត​ខំប្រឹង​ប្រែង។ ការ​លើក​ឡើង​កន្លងមក​​ដែរថា​ ស្ត្រី​បង្វិល​ចង្ក្រាន​មិន​ជុំ ​គឺជា​​រឿង​ហួសសម័យ​។ ស្រ្តី​​នឹង​មិន​អាច​បង្វិល​ចង្ក្រាន​បាន​ដោយហេតុ​ថា​ ​ចង្ក្រាន​នៅ​ស្ថិត​នៅ​កៀក​ជញ្ជាំង​ពេក​ មានន័យថា ការ​ឃុំ​គ្រង​តឹង​រឹង​ពេក​ និង​មិន​ផ្តល់​ឱកាស​ឱ្យ​ ទើប​ធ្វើ​ឱ្យ​ស្រ្តី​​សម័យ​​មុន​មួយ​ចំនួន​ត្រូវ​បាត់បង់​ឱកាស តែ​បច្ចុប្បន្ន​មាន​ឱកាស​ស្មើ​គ្នា​ដូច​បុរស​ដែរ​៕

អត្ថបទ៖ សុផល

មតិយោបល់