គិតរហូតមកដល់ពេលនេះសម្បត្តិបេតិកភណ្ឌរបស់កម្ពុជាបានដាក់ចូលក្នុងសម្បត្តិបេតិកភណ្ឌពិភពលោករបស់អង្គការ UNESCO ទាំងអស់ចំនួន ៨ ហើយ ដែលក្នុងនោះចែកជាសម្បត្តិវប្បធម៌រូបីមាន ៣ រួមមាន៖ តំបន់អង្គរវត្ត ប្រាសាទព្រះវិហារ និងប្រាសាទសំបូរព្រៃគុក និងសម្បត្តិវប្បធម៌អរូបីមាន ៥ ក្នុងនោះរួមមាន របាំព្រះរាជទ្រព្យ ល្ខោនស្រមោលស្បែក ឬល្ខោនស្បែកធំ ល្បែងទាញព្រ័ត្រ ចាប៉ីដងវែង និងល្ខោនខោលវត្តស្វាយអណ្តែត។

យោងតាមលទ្ធផលកិច្ចប្រជុំក្រុមការងារអន្តរក្រសួងរៀបចំបញ្ជីត្រៀម (Tentative List) នៃបេតិកភណ្ឌរូបី អរូបីដែលចេញផ្សាយដោយផេករបស់នាយកដ្ឋានអភិវឌ្ឍផលិតផលទេសចរណ៍ នៃក្រសួងទេសចរណ៍កាលពីថ្ងៃទី២១ ខែវិច្ឆិកា ឆ្នាំ២០១៩កន្លងទៅបានត្រៀមស្នើសុំបញ្ចូល នំបញ្ចុក អំបុក បង្អែមខ្មែរ និងទូកង ក្នុងបញ្ជីត្រៀមបញ្ជូនទៅអង្គការ UNESCO នេះដើម្បីដាក់ចូលជាសម្បត្តិបេតិកភណ្ឌពិភពលោក។

គួរបញ្ជាក់ផងដែរថា ថ្ងៃនេះជាខួប ១៤ឆ្នាំ នៃការដាក់បញ្ចូលល្ខោនស្រមោលស្បែកធំ ក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ ២៥ វិច្ឆិកា ២០០៥ -២៥ វិច្ឆិកា ២០១៩។ នៅក្នុងខែវិច្ឆិកានេះផងដែលមានព្រឹត្តិការណ៍សំខាន់២ផ្សេងទៀតគឺ ខួប ៣ឆ្នាំ ចាប៉ីដងវែងខ្មែរ ចូលជាសម្បត្តិបេតិកភណ្ឌពិភលោកអរូបី ដែលចុះក្នុង​នៅថ្ងៃ​ទី៣០ ខែ​វិច្ឆិកា ឆ្នាំ​២០១៦។ ឧបករណ៍​ភ្លេង​បុរាណ​ខ្មែរ១​នេះ ស្ថិតក្នុង​បញ្ជី​បេតិកភណ្ឌ​អរូបី ដែលត្រូវ​ការ​សង្គ្រោះ​បន្ទាន់ និងខួប១ឆ្នាំ ល្ខោនខោលវត្ត​ស្វាយអណ្ដែត ចុះបញ្ជី​បេតិកភណ្ឌ​ពិភពលោក នៅថ្ងៃទី​២៨ ខែវិច្ឆិកា ឆ្នាំ​២០១៨ ស្ថិតក្នុង​បញ្ជី​បេតិកភណ្ឌ​អរូបី ដែលត្រូវ​ការ​សង្គ្រោះ​បន្ទាន់ផងដែរ៕