- 2020-01-15 06:03:24
- សេដ្ឋកិច្ច
មិនយូរទេ អ្នកអាចទិញហ៊ុនធនាគារអេស៊ីលីដាបានហើយ!
- 2020-01-15 06:03:24
- ចំនួនមតិ 0 | ចំនួនចែករំលែក 0
មិនយូរទេ អ្នកអាចទិញហ៊ុនធនាគារអេស៊ីលីដាបានហើយ!
ចន្លោះមិនឃើញ
ធនាគារ អេស៊ីលីដា ភីអិលស៊ី បានធ្វើសិក្ខាសាលាស្ដីពីការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) ជាផ្លូវការនៅកម្ពុជា នៅថ្ងៃទី១៥ ខែមករា ឆ្នាំ២០២០ ដោយមានអ្នកចូលរួមប្រមាណជាជាង ២០០នាក់។
ក្រោយពេលចេញលក់មូលបត្រកម្មសិទ្ធិលើកដំបូងជាសាធារណៈនេះ ធនាគារ អេស៊ីលីដា ភីអិលស៊ី នឹងក្លាយជាធនាគារពាណិជ្ជទីមួយ នៅក្នុងព្រះរាជាណាចក្រកម្ពុជា ដែលចុះបញ្ជីលក់ភាគហ៊ុនក្នុងក្រុមហ៊ុនផ្សារមូលបត្រកម្ពុជា (ផ.ម.ក)។ ការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) បង្កើតបាននូវសករាជថ្មីនៃប្រវត្តិជោគជ័យរបស់ធនាគារ អេស៊ីលីដា ភីអិលស៊ី។
លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានបញ្ជាក់ថា “ធនាគារទើបនឹងទទួលបានលិខិតពីធនាគារជាតិនៃកម្ពុជា ដើម្បីបន្តនីតិវិធីស្នើសុំបោះផ្សាយលក់មូលបត្រកម្មសិទ្ធិលើកដំបូងជាសាធារណៈរបស់ធនាគារ នៅគណៈកម្មការមូលបត្រកម្ពុជា (គ.ម.ក.) ។ ភាគហ៊ុនិករបស់ធនាគារបានឯកភាពគ្នាជាឯកច្ឆន្ទ ធ្វើការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ ដើម្បីបង្កើនប្រភពទុនដ៏សម្បូរបែប និងគាំទ្រការរីកចម្រើននាពេលអនាគត តាមរយៈទីផ្សារមូលធនកម្ពុជា។
បណ្ឌិត អ៊ិន ចាន់នី បានបញ្ជាក់ថាដើម្បីឲ្យសាធារណៈជនធ្វើការវិនិយោគទៅលើផ្សាហ៊ុនមូលបត្រកម្មសិទ្ធិ ត្រូវមានអត្តសញ្ញាណវិនិយោគិន និងត្រូវបើកគណនីជួនដូរ នៅក្រុមហ៊ុនបុត្រសម្ព័ន្ធ អេស៊ីលីដា ស៊ីឃ្យូរឺធី ភីអិលស៊ី ជាមុនសិន ទើបអាចធ្វើការវិនិយោគទៅលើផ្សាហ៊ុនមូលបត្រកម្មសិទ្ធិ។ លោកបន្តថាសម្រាប់ការលក់ក្រុមហ៊ុនមូលបត្រកម្មសិទ្ធិនេះ ធនាគារធ្វើការលក់ទៅឲ្យទាំងក្រុមហ៊ុន និងឯកត្តជន ប៉ុន្តែធនាគារបានផ្ដោតសំខាន់ទៅឯកត្តជន ដើម្បីផ្ដល់ឱកាសដល់ពួកគាត់ដែលមានហ៊ុនតិចតួចក៏អាចក្លាយជាម្ចាស់បានដែរ។
បណ្ឌិត អ៊ិន ចាន់នី បានបន្ថែមថាសម្រាប់ឯកត្តជនដែលបានចូលរួមទិញភាគហ៊ុន វិនិយោគទៅលើផ្សាហ៊ុនមូលបត្រកម្មសិទ្ធិ នឹងទទួលបានអត្ថប្រយោជន៍ដូចជា ភាគលាភនឹងធ្វើការបែងចែក ការជួញដូរអាចលក់បានគ្រប់ពេល រួមចំណែករីកចម្រើន និងក្លាយជាម្ចាស់របស់ស្ថាប័នដ៏នៅកម្ពុជា។
ក្នុងឱកាសនេះ ធនាគារ អេស៊ីលីដា ភីអិលស៊ី នឹងដាក់លក់ជូនសាធារណជនជាផ្លូវការចាប់ពីថ្ងៃនេះតទៅ ក្រោមការអនុញ្ញាតពី ផ្សារមូលបត្រកម្ពុជា (ផ.ម.ក.) និងគណៈកម្មការ មូលបត្រកម្ពុជា (គ.ម.ក.)។ នេះគឺជាឱកាសដ៏ពិសេសសម្រាប់សាធារណជន ក្នុងការចូលរួម វិនិយោគជាមួយធនាគារ ដើម្បីក្លាយជាភាគហ៊ុននិករបស់ធនាគារ អេស៊ីលីដា ភីអិលស៊ី”។
ការបោះផ្សាយលក់មូលបត្រកម្មសិទ្ធិជាសាធារណៈលើកដំបូងរបស់ធនាគារ អេស៊ីលីដា ភីអិលស៊ី ត្រូវបានចាត់ទុកជា “ការបោះផ្សាយលក់មូលបត្រកម្មសិទ្ធិលើកដំបូងជាសាធារណៈជូនប្រជាពលរដ្ឋ” ដែលលើកទឹកចិត្តដល់វិនិយោគិនរូបវ័ន្តបុគ្គល និងសាធារណជន ក្នុងការទិញភាគហ៊ុនទៅតាមលទ្ធភាពរបស់ខ្លួន។ លើទីផ្សារមូលបត្រនានានៃបណ្តាប្រទេសមួយចំនួន “ការបោះផ្សាយលក់មូលបត្រកម្មសិទ្ធិ លើកដំបូងជាសាធារណៈជូនប្រជាពលរដ្ឋ” បានផ្តល់ភាពងាយស្រួលយ៉ាងច្រើនដល់វិនិយោគិនរូបវ័ន្ត បុគ្គល ក្នុងការចូលរួមយ៉ាងទូលំទូលាយក្នុងដំណើរការបោះផ្សាយលក់មូលបត្រកម្មសិទ្ធិ។ “ការបោះផ្សាយ លក់មូលបត្រកម្មសិទ្ធិលើកដំបូងជាសាធារណៈជូនប្រជាពលរដ្ឋ” របស់ធនាគារ អេស៊ីលីដា ភីអិលស៊ី គឺជាការចែករំលែកផលដែលបានមកពីវិបុលភាពផ្នែកហិរញ្ញវត្ថុជាមួយនឹងវិនិយោគិនរូបវ័ន្តបុគ្គល និងក្លាយជាធនាគារដែលទទួលបាននូវទំនុកចិត្តពីសាធារណជនបន្ថែមទៀត។
គិតត្រឹមដំណាច់ ខែកញ្ញា ឆ្នាំ២០១៩ ធនាគារ អេស៊ីលីដា ភីអិលស៊ី គឺជាធនាគារធំជាងគេបំផុតនៅកម្ពុជា ដែលមានសំពៀតឥណទានសរុប (៣,៦១ ប៊ីលានដុល្លារអាមេរិក) និងមូលធនសរុប (៨៩៨,៥៦ លានដុល្លារអាមេរិក) ទ្រព្យសកម្មសរុប (៦,០៩ ប៊ីលានដុល្លារអាមេរិក) និងប្រាក់បញ្ញើសរុប (៤,២៤ ប៊ីលានដុល្លារអាមេរិក)៕