វៀតណាមគ្រោងបន្តការហោះហើរទៅកាន់ប្រទេសគ្មានកូវីដ១៩ឡើងវិញ រួមមានកម្ពុជា

2020-06-10 01:37:17
ព័ត៌មាន

2020-06-10 01:37:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រព័ន្ធផ្សព្វផ្សាយរដ្ឋវៀតណាមកាលពីថ្ងៃអង្គារទី០៩មិថុនា បាននិយាយយោងតាមសម្តីរបស់នាយករដ្ឋមន្ត្រីរបស់ខ្លួនថា វៀតណាមមានផែនការបន្តការហោះហើរយន្តហោះដឹកអ្នកដំណើរឡើងវិញទាំងទៅ និងមកពីប្រទេសគ្មានកើតជំងឺកូវីដ១៩ក្នុងរយៈពេល៣០ ហើយអាទិភាពផ្តោតលើប្រទេសកូរ៉េខាងត្បូង ជប៉ុននិងកម្ពុជា។

ត្រូវបានលើកមកផ្សាយក្នុងទូរទស្សន៍រដ្ឋវៀតណាម (VTV) នាយករដ្ឋមន្ត្រី ង្វៀន សួនហ្វ៊ុក មិនបានបញ្ជាក់ថា តើអ្នកដំណើរចូលមកពីទីកន្លែងទាំងនេះនឹងត្រូវដាក់នៅដោយឡែកតាមកម្មវិធីចត្តាឡីស័កដែលអាជ្ញាធរវៀតណាមដាក់អោយអនុវត្តចាប់តាំងពីខែមីនាមកដែរឬយ៉ាងណាទេ។

តែនាយករដ្ឋមន្ត្រីបានស្នើគណៈកម្មាធិការជាតិសំរាប់បង្ការ និងទប់ស្កាត់កូវីដ១៩ ព្រាងបញ្ជីឈ្មោះប្រទេសដែលមានសុវត្ថិភាព។

សូមបញ្ជាក់ថាវៀតណាមទប់ការឆ្លងជំងឺកូវីដ១៩អោយនៅទាបត្រឹមតែ៣៣២នាក់ និងមិនបានរាយការណ៍អ្នកស្លាប់ដោយជំងឺនេះទេ។អ្នកដំណើរចូលមកពីក្រៅរាប់ម៉ឺននាក់ ត្រូវបានដាក់នៅដោយឡែកក្រោមកម្មវិធីចត្តាឡីស័ករបស់រដ្ឋ។

VTVបានស្រង់សម្តីលោកហ្វ៊ុក ដែលបានមានប្រសាសន៍ថា «វៀតណាមសម្លឹងទៅរកការបន្តការហោះហើរអន្តរជាតិជាមួយប្រទេស ដែលត្រូវបានចាត់ទុកថាមិនមានករណីឆ្លងកូវីដ១៩ថ្មីក្នុងរយៈពេល៣០ថ្ងៃ តែការបន្តនេះទាមទារការប្រុងប្រយ័ត្នខ្ពស់បំផុតអំពីជំងឺឆ្លង»។

លោកមិនបាននិយាយថា ប្រទេសពាក់ព័ន្ធឬក្រុមហ៊ុនអាកាសចរណ៍ត្រូវអាជ្ញាធរវៀតណាមប្រឹក្សាយោបល់ដែរឬអត់ តែថាគោលដៅដូចជា ក្វាងចូវនៅចិន ក្រុងតូក្យូ សេអ៊ូល តៃវ៉ាន់ ឡាវនិងកម្ពុជា ស្ថិតចំណោមផ្លូវអាទិភាពត្រូវបើកដំណើរការវិញ។

វៀតណាមកាលពីថ្ងៃចន្ទទី០៨មិថុនា បានរាយការណ៍រកឃើញការឆ្លងកូវីដ១៩ចំនួន៣បន្ថែម ហើយទាំងអស់សុទ្ធតែនាំចូលមកពីក្រៅ។ប្រទេសអាស៊ីអាគ្នេយ៍មួយនេះមិនមានការឆ្លងក្នុងស្រុកអស់៥៤ថ្ងៃមកហើយ៕

ប្រភព៖ រស្មីកម្ពុជា សម្រួល៖ វាសនា