- 2020-08-03 08:42:41
- ព័ត៌មាន
ពិព័រណ៍រូបថត DMC 2020 ធ្វើឡើងតាមប្រព័ន្ធឌីជីថល
- 2020-08-03 08:42:41
- ចំនួនមតិ 0 | ចំនួនចែករំលែក 0
ពិព័រណ៍រូបថត DMC 2020 ធ្វើឡើងតាមប្រព័ន្ធឌីជីថល
ចន្លោះមិនឃើញ
ពិព័ណរណ៍រូបថត DMC លើកទី២ នឹងត្រូវធ្វើឡើងតាមរយៈប្រព័ន្ធឌីជីលជំនួសវិញ ដើម្បីចូលរួមបង្ការ និងទប់ស្កាត់ការរីករាលដាលនៃជំងឺកូវីដ១៩។ ពិព័រណ៍រូបថត ដែលរៀបចំឡើងដោយនិស្សិតឆ្នាំទី២ នៃដេប៉ាតេម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) នៃសាកលវិទ្យាល័យ ភូមិន្ទភ្នំពេញ នឹងប្រព្រឹត្តទៅ ចាប់ពីថ្ងៃទី៣ ខែសីហានេះ ដល់ថ្ងៃទី៣១ ខែសីហា ឆ្នាំ២០២០ តាមរយៈគេហទំព័រ www.dmcphotofest.com , ទំព័រហ្វេសប៊ុក DMC Photo Frestival (https://www.facebook.com/DmcPhotoFestival) និងទំព័រហ្វេសប៊ុករបស់ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (https://www.facebook.com/DMC.CCI)។
ពិព័រណ៍រូបថតលើកទី២ នេះ ត្រូវបានផលិត និងរៀបចំដោយនិស្សិតឆ្នាំទី២ ជំនាន់ទី១៨ ក្រោមការដឹកនាំរបស់លោក ផន ភារិទ្ធ (Miller) ដែលជាគ្រូបង្រៀនថតរូបនៃដេប៉ាតឺម៉ង់ផ្ទាល់។
លោក ផន ភារិទ្ធ បានឲ្យដឹងថា ពិព័រណ៍នេះ ត្រូវបានរៀបចំឡើង ដើម្បីបង្ហាញស្នាដៃថតរូបរបស់និស្សិត បន្ទាប់ពីពួកគេបានសិក្សាអំពីបច្ចេកទេសថតរូបរយៈពេលមួយឆមាសរួចមក។ គ្រប់រូបថត ដែលនឹងបង្ហាញនោះ នឹងមិនត្រឹមតែឆ្លុះបញ្ចាំងពីការខិតខំប្រឹងប្រែងរបស់និស្សិតប៉ុណ្ណោះទេ ប៉ុន្តែក៏នឹងឆ្លុះបញ្ចាំងពីស្ថានភាពសង្គមនាពេលបច្ចុប្បន្នផងដែរ។
លោកបានបន្ថែមថា "យើងប្រើរូបភាពជំនួសវីដេអូ ជាសារដើម្បីពញ្ញាក់អារម្មណ៍អ្នកទស្សនាពីសកម្មភាពដែលពួកគាត់ជួបប្រទះរាល់ថ្ងៃ។ បើទោះបីជាស្នាដៃរបស់និស្សិតមិនសូវជាល្អដូចអ្នកថតរូបអាជីពក៏ដោយ ក៏យើងព្យាយាមសម្រិតសម្រាំងឲ្យស្នាដៃទាំងនោះ ឆ្លុះបញ្ចាំងពីសង្គមវិញ ដោយរូបថត មានលក្ខណៈជាស៊េរីបណ្ដាក់ទៅតាមសាច់រឿងឲ្យអ្នកចូលរួមបានយល់"។
លោក អ៊ុង ប៊ុនអ៊ី ប្រធានដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ បាននិយាយថា "ពិព័រណ៍រូបថត DMC Photo Festival នេះ បានផ្សារភ្ជាប់ទ្រឹស្ដីទៅនឹងការអនុវត្តជាក់ស្ដែងរបស់និស្សិត ក្នុងន័យលើកកម្ពស់ចំណេះដឹង និងចំណេះធ្វើរបស់និស្សិត DMC ផ្ទាល់។ លោកលើកឡើងថា ដេប៉ាតឺម៉ង់ ក៏ចង់ជំរុញឲ្យនិស្សិតយកឱកាសនេះ សិក្សាស្រាវជ្រាវពីបញ្ហាប្រឈម ក៏ដូចជាវឌ្ឍនភាពនានាក្នុងសង្គម ហើយយកមកឆ្លុះបញ្ចាំងតាមរយៈជំនាញដែលខ្លួនបានសិក្សា។
លោកបន្តថា "តាមរយៈពិព័រណ៍រូបថតនេះ សាធារណជនក៏មានឱកាសបានដឹងឮ ក៏ដូចជាយល់ដឹងពីរឿងរ៉ាវសង្គមទាំងនោះ និងចូលរួមជាផ្នែកមួយនៃដំណោះស្រាយ ព្រោះថាពួកគេក៏ជាផ្នែកមួយនៃរឿងរ៉ាវសង្គមទាំងនោះដែរ"។
ជានិស្សិតឆ្នាំទីពីរនៃដេប៉ាតឺម៉ង់ និងជាផលិតករម្នាក់នៃកម្មវិធីតាំងពិព័រណ៍រូបថតនេះ កញ្ញា សុខ ស្រីលុច បាននិយាយថា "ពួកយើងបានខិតខំប្រឹងប្រែងយ៉ាងខ្លាំង បើទោះបីជាពេលខ្លះ ត្រូវនៅហាលថ្ងៃ ចុះទូកកណ្ដាលទន្លេ និងត្រូវចុះទៅទីតាំងឆ្ងាយៗក៏ដោយ ក៏យើងនៅទ្រាំ ដើម្បីបានរូបមួយៗ"។ កញ្ញាសង្ឃឹមថា ពិព័រណ៍រូបថតលើកទី២ នេះ នឹងមានអ្នកគាំទ្រច្រើន។
លោក នូ វិរៈ ជានិស្សិតឆ្នាំទីពីរនៃដេប៉ាតឺម៉ង់ និងជាអ្នករៀបចំកម្មវិធី បាននិយាយថា "ពាក់ព័ន្ធជាមួយនឹងព្រឹត្តិការណ៍ពិព័រណ៍រូបថត DMC នេះ កាលពីមុនយើងចង់ឲ្យមានការរៀបចំការដាក់តាំងពិព័រណ៍នៅក្នុងបរវេណនៃសាកលវិទ្យាល័យភូមិន្ទភ្នំពេញ ក៏ប៉ុន្តែដោយសារតែជំងឺកូវីដ១៩ យើងអត់អាចបើកកម្មវិធីនេះជាសាធារណៈបាននោះទេ ដោយយើងគោរពតាមគោលការណ៍រក្សាគម្លាតសង្គមរបស់ក្រសួងសុខាភិបាល យើងក៏បានសម្រេចចិត្តជាមួយនឹងគណៈគ្រប់គ្រងដេប៉ាតឺម៉ង់ រៀបចំកម្មវិធីនេះទៅតាមប្រព័ន្ធឌីជីថលវិញ។ មានន័យថា រូបភាពរបស់ក្រុមនិស្សិតដែលបានផលិតទាំង ៩ ប្រធានបទ ស្មើនឹងប្រមាណជាង ២០០សន្លឹក នឹងត្រូវបានដាក់បង្ហាញនៅលើគេហទំព័រផ្លូវការរបស់យើង ដើម្បីអាចឲ្យសាធារណជនបានទស្សនា"។
លោក នូ វីរៈ បាននិយាយថា ក្រៅពីការទស្សនារូបថត សាធារណជន ក៏អាចតាមដានកម្មវិធីកិច្ចពិភាក្សារវាងវាគ្មិន និងទស្សនីយភាពផ្សេងទៀត រួមមាន៖
សប្ដាហ៍ទី១៖ ជួបជាមួយកិច្ចពិភាក្សាតាមក្រុមរបស់គម្រោងនៃពិព័រណ៍ រួមទាំងការបង្ហាញក្បាច់របាំខ្មែររបស់អ្នកគ្រូ វិធ ច័ន្ទម៉ូលី និងកិច្ចពិភាក្សាអំពីការថតរូបបែបកម្សាន្ត ដោយលោកសួង ម៉ារឌី (Suong Mardy)។
សប្ដាហ៍ទី២៖ កិច្ចពិភាក្សាតាមក្រុមរបស់គម្រោងនៃពិព័រណ៍ រួមទាំងការពិភាក្សាអំពីការថតរូបក្នុងវិស័យសារព័ត៌មាន ដោយលោក លន ហ្សាឌីណា (Lon Jadina) និងកិច្ចពិភាក្សាអំពីការថតរូបបែប Travel Photography ដោយលោក ឡា ម៉ូ (La Mo)។
សប្ដាហ៍ទី៣៖ កិច្ចពិភាក្សាតាមក្រុមរបស់គម្រោងនៃពិព័រណ៍ រួមទាំងការពិភាក្សាអំពីការអប់រំផ្លូវចិត្ត តាមរយៈការសមាធិ ដោយលោកគ្រូ នឹម ឈុន្នី (Noem Chhunny) និងការពិភាក្សាអំពីការថតរូបបែបពាណិជ្ជកម្ម ដោយលោក ថៃ វ៉ាន់ថា (Jerry Thai)។
សប្ដាហ៍ទី៤៖ កិច្ចពិភាក្សាតាមក្រុមរបស់គម្រោងនៃពិព័រណ៍ រួមទាំងការពិភាក្សាអំពីស្រ្ដីជាអ្នកថតរូបក្នុងវិស័យសារព័ត៌មាន ដោយលោកស្រី Lim Jessica។
សប្ដាហ៍ទី៥៖ ការបង្ហាញសិល្បៈរបស់តារាចម្រៀង លោក ម៉ា ច័ន្ទបញ្ញា។
សម្រាប់ព័ត៌មានបន្ថែម សូមទំនាក់ទំនងតាមរយៈទំព័រហ្វេសប៊ុកផ្លូវការរបស់យើង (DMC Photo Festival) ឬទំនាក់ទំនងកញ្ញា សួន ស្រីដែត តាមរយៈលេខទូរសព្ទ ០១៧ ៥៦៦ ៩២៦ និងលោកជា តារាពេជ្រ តាមរយៈលេខទូរសព្ទ ០៧០ ៩៩៣ ៩៦០៕