ចិត្តធម៌មែន! គម្រោងមួយ ធ្វើម្ហូបចែកអ្នកខ្វះខាតអំឡុងផ្ទុះជំងឺកូវីដ១៩

2020-08-15 21:35:21
ព័ត៌មាន

2020-08-15 21:35:21
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងមួយមានឈ្មោះថា Mama's Kitchen គឺជាគម្រោងមួយបង្កើតឡើងអំឡុងនៃការផ្ទុះឡើង នៃជំងឺកូវីដ១៩ដំបូងនៅកម្ពុជា ដើម្បីធ្វើការចែកចាយម្ហូបដល់សមាគមជាដៃគូដែលបានធ្វើការងារ យ៉ាងជិតស្និទ្ធជាមួយអ្នកខ្វះខាតនៅភ្នំពេញ។ គិតចាប់ពីថ្ងៃទី២៥ ខែឧសភា រហូតមកដល់បច្ចុប្បន្ននេះ បានចែកចាយម្ហូបអាហារដល់អ្នកកំពង់ខ្វះខាតសរុបចំនួនជាង ៥ពាន់កញ្ចប់ហើយ។

គម្រោង Mama's Kitchen បង្កើតឡើងដោយស្រ្តីជនជាតិកាណាដា មានដើមកំណើតនៅប្រទេស អ៊ុយហ្គ្រែន កញ្ញា Yulia Khouri ដែលជាអ្នកផ្ដួចផ្ដើមគំនិតបង្កើតដំបូង និងបានចំណាយប្រាក់ដោយ ខ្លួននឯងក្នុងន័យផ្ដល់ក្ដីស្រឡាញ់ដល់មនុស្សគ្រប់គ្នា ដែលកំពុងត្រូវការអាហារ។

«ខ្ញុំបង្កើតគំនិតនេះឡើងខ្ញុំធ្វើតាមលោកយាយរបស់ខ្ញុំ។ កាលណោះនៅសម័យសង្គ្រាមលោកលើកទី២ នៅតំបន់មួយក្នុងប្រទេសអ៊ុយហ្គ្រែន មនុស្សជាច្រើនខ្វះខាតពិសេសខ្វះម្ហូបអាហារ ដោយឃើញដូច្នេះលោកយាយរបស់ខ្ញុំជាមនុស្សដំបូងផ្ដើមធ្វើម្ហូបចែកចាយដល់ជនរងគ្រោះដោយសាររងផលប៉ះពាល់ពីសង្គ្រាម»។ Yulia Khouri និយាយប្រាប់ Sabay ។

Yulia Khouri អំឡុងផ្ដល់កិច្ចសម្ភាសន៍ឲ្យក្រុមការងារ Sabay នៅTLJ កាលពីពេលថ្មីៗនេះ

Yulia Khouri វ័យ៤៥ឆ្នាំ បានមកប្រទេសកម្ពុជាលើកដំបូងនៅអំឡុងឆ្នាំ ២០១០ ហើយការងារដែល អ្នកស្រីធ្វើជាឯកអគ្គរដ្ឋទូតសុឆន្ទៈ នៃអង្គការមួយ ដែលផ្ដោតសំខាន់លើការងារប្រមូលសត្វអនាថា និងសង្គ្រោះសត្វទាំងនោះ។ កញ្ញាក៏ធ្លាប់ជាអតីតបុគ្គលិករបស់អង្គការសហប្រជាជាតិ ដែលធ្លាប់ធ្វើការ ជាច្រើនប្រទេស ជាពិសេសនៅតំបន់អាហ្វ្រិក ជាដើម។

ផ្ដើមពីការងារទាំងអស់នេះហើយ ដែល Yulia Khouri មានចិត្តស្រឡាញ់សត្វ និងរមែងការពារសត្វ។ ម៉្លោះហើយគម្រោង Mama's Kitchen គឺជាគម្រោងចែកចាយម្ហូបអាហារប្រភេទម្ហូបបួស និង មិនប្រើប្រាស់ប្លាស្ទិក ដោយការវេចខ្ចប់ប្រើប្រាស់ស្លឹកចេក ឬស្លឹកឈូក។

Yulia Khouri បានប្រាប់បន្ដទៀតថា សព្វថ្ងៃនេះ ទីតាំងកន្លែងធ្វើម្ហូបបានមិត្តភក្ដិផ្ដល់កន្លែងឲ្យ ចម្អិនម្ហូប និងអ្នកធ្វើម្ហូបជាអ្នកស្ម័គ្រចិត្តចំនួន៥នាក់ ដែលពួកគេសុទ្ធសឹងស្រឡាញ់ការងារមនុស្សធម៌។ សព្វថ្ងៃនេះគម្រោងមានលទ្ធភាពធ្វើម្ហូបបាន៥០០កញ្ចប់ក្នុង១សប្ដាហ៍ ហើយចែកចាយដល់អង្គការ សមាគមជាដៃគូមួយចំនួន ដែលធ្វើការងារផ្ដោតលើការ បណ្ដុះបណ្ដាលវិជ្ជាជីវៈ ជាជនពិការ ជាដើម។ ជាក់ស្ដែងកន្លែងគម្រោងបានផ្ដល់អាហារដល់សមាគម Shanty Town Spirit & The Voice international ដែលធ្វើការបណ្ដុះបណ្ដាលវិជ្ជាជីវៈនានាដល់កូនខ្មែរ។

គម្រោង Mama's Kitchen ដំបូងឡើយបង្កើតឡើងដើម្បីចែកអាហារអំឡុងនៃការផ្ទុះជំងឺកូវីដ១៩ ដែលអ្នកផ្ដួចផ្ដើមរំពឹងថា ទំនងជាអូសបន្លាយត្រឹមរយៈពេល៣ខែប៉ុណ្ណោះ ប៉ុន្ដែស្ថានភាពប្រែប្រួល ជំងឺកូវីដ១៩នេះកំពុងវាយលុកពិភពលោកហើយក៏មិនទាន់ដឹងអំពីពេលវេលាជាក់ នៃការស្ងប់ស្ងាត់ទៅ វិញនៅពេលណានៅឡើយ។ ផ្ដើមពីការចំណាយលុយខ្លួនឯង ឥឡូវនេះមានដៃគូមួយចំនួនបាន ចូលរួមឧបត្ថម្ភ មានដូចជា៖

១. ក្រុមហ៊ុន IBS Rice បានបរិច្ចាគជាអង្ករប្រមាណជា ៥០គីឡូក្នុង១ខែ ផ្ដើមពីខែសីហា ២០២០នេះ។
២. Soma Community បានផ្ដល់ទីតាំងនៅក្នុងខុនដូមួយកន្លែងដើម្បីធ្វើម្ហូប ដោយឥតគិតថ្លៃ
៣. ក្រុមហ៊ុន GIBAM បានផ្ដល់ប្រាក់បានពីមូលនិធីឥណ្ឌូណេស៊ីជារៀងរាល់ខែ និងបណ្ដាដៃគូមួយចំនួនទៀត បានចូលរួមចំណែក។

ទោះជាយ៉ាងណាការអូសបន្លាយនៃជំងឺកូវីដ១៩ ហើយតម្រូវការរបស់អ្នកខ្វះខាតនៅតាមបណ្ដាអង្គការ សមាគមផ្សេងៗនៅតែមាន គម្រោង Mama's Kitchen មានឆន្ទៈបន្ដធ្វើការចែកចាយម្ហូបអាហារដោយ ឥតគិតថ្លៃដល់ដៃគូទាំងនោះ។

ប៉ុន្ដែ Yulia Khouri បានលើកឡើងថា *«យើងក៏នៅមានការខ្វះខាតផងដែរអំពីថវិកាដើម្បីទ្រទ្រង់ ដូច្នេះប្រសិនបើមានអង្គការ សមាគម ឬក្រុមហ៊ុនណាចង់ចូលរួមកិច្ចការងារមនុស្សធម៌មួយនេះ អាចចូលរួមបាន ដោយអាចបរិច្ចាគជាអង្ករ ឬសម្ភារៈផ្សេងៗទៅតាមលទ្ធភាព ជាមួយគម្រោង Mama's Kitchen»។