សម្ដេចតេជោ ហ៊ុន សែន អំពាវនាវអ្នកពាក់ព័ន្ធមកទទួលសេវាឥតគិតថ្លៃ ធ្វើតេស្តកូវីដ១៩

2020-11-29 15:15:15
ព័ត៌មាន

2020-11-29 15:15:15
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអំពាវនាវឲ្យពលរដ្ឋដែលពាក់ព័ន្ធមកទទួលសេវាឥតគិតថ្លៃ ដើម្បីធ្វើតេស្តពាក់ព័ន្ធនឹងកូវីដ១៩ ហើយដើម្បីដាក់ខ្លួនឲ្យនៅដាច់ដោយឡែក (ចត្តាឡីស័ក) ហើយអំឡុងអ្នកធ្វើចត្តាឡីស័ក គឺរដ្ឋជាអ្នកទទួលបន្ទុកទាំងអស់ ប្រសិនបើអ្នកធ្វើចត្តាឡីស័ក ដែលទទួលសេវាដោយក្រសួងសុខាភិបាលរៀបចំ។

សូមចុចអាន៖ កូវីដ១៩៖ សម្ដេចតេជោ ហ៊ុន សែន ផ្ដល់សិទ្ធិដល់រដ្ឋមន្រ្តី និងអភិបាលខេត្ត សម្រេចចិត្តធ្វើរឿងមួយ

តាមរយៈសារសំឡេងដែលចែកចាយតាមតេឡេក្រាម សម្ដេចតេជោ ហ៊ុន សែន បានបញ្ជាក់ថា «ខ្ញុំសូមពាវនាវឲ្យប្រជាពលរដ្ឋដែលមានការពាក់ព័ន្ធការឆ្លងកូវីដ១៩ សុំប្រញាប់ប្រញាលមកធ្វើតេស្តវិជ្ជមានកូវីដ១៩ ហើយកុំព្រួយថា នឹងមានការយកលុយ យកកាក់ពីសំណាក់ប្រជាពលរដ្ឋឲ្យសោះ។ គ្មាននរណាមានសិទ្ធិ ដើម្បីទទួលយកប្រាក់ពីប្រជាពលរដ្ឋ សម្រាប់ការធ្វើតេស្តរកមេរោគកូវីដនោះទេ។ អ្វីដែលរាជរដ្ឋាភិបាលត្រូវការនោះ គឺចង់ឲ្យបងប្អូន មានសុវត្ថិភាព ធានាបានអាយុជីវិត និងមិនមានការឆ្លងរីករាលដាល នៅក្នុងប្រទេសរបស់យើង។»

សម្ដេចតេជោ ក៏បានលើកឡើងទៀតថា «កុំភ័យ កុំស្លន់ស្លោរ ត្រូវគ្រប់គ្រងទៅលើសភាពការនេះ ដោយភាពម្ចាស់ការ ហើយម្ខាងទៀតត្រូវតែមានការប្រុងប្រយ័ត្ន អ្នកដែលមិនទាន់មានការប៉ះពាល់ សុំកុំឲ្យចូលទៅរកការពាក់ព័ន្ធ ហើយអ្នកដែលមានការពាក់ព័ន្ធត្រូវតែភ្ជាក់រលឹក ដើម្បីទៅរកគ្រូពេទ្យ នៅទីកន្លែងដែលកំពុងធ្វើតេស្ត ដើម្បីយកសំណាក ហើយទៅចុះឈ្មោះធ្វើតេស្ត និងដាក់ខ្លួនឯងឲ្យដាច់ដោយឡែក (ចត្តាឡីស័ក១៤ថ្ងៃ)»។

«យើងមិនត្រឹមតែមិនយកប្រាក់សម្រាប់ការធ្វើតេស្តនោះទេ តែយើងក៏នឹងផ្គត់ផ្គង់ចំណីអាហារ ចំពោះបងប្អូនដែលធ្វើចត្តាឡីស័ក តាមទីកន្លែង ដែលរៀបចំដោយក្រសួងសុខាភិបាល។ សូមបងប្អូនងើបឈរឡើង ដើម្បីប្រឆាំងនឹងកូវីដ១៩នេះ»។ សម្ដេចតេជោ ហ៊ុន សែនលើកឡើងបន្ថែម៕

សូមចុចអាន៖ ដំណឹងល្អ! សម្ដេចក្រឡាហោម ស ខេង និងក្រុមគ្រួសារ អវិជ្ជមានកូវីដ១៩ ក្រោយតេស្តលើកទី១

អត្ថបទ៖ ប៊ិន ប៊ុណ្ណា