- 2021-09-18 05:10:00
- ព័ត៌មាន
តោះមកស្គាល់កន្លែងកម្សាន្តដែលភ្នាក់ងារទេសចរណ៍អាចនាំដើរដោយមិនគិតសេវា នៅសិង្ហបុរី
- 2021-09-18 05:10:00
- ចំនួនមតិ 0 | ចំនួនចែករំលែក 0
តោះមកស្គាល់កន្លែងកម្សាន្តដែលភ្នាក់ងារទេសចរណ៍អាចនាំដើរដោយមិនគិតសេវា នៅសិង្ហបុរី
ចន្លោះមិនឃើញ
នៅពេលដែលអ្នកធ្វើដំណើរទៅកាន់សិង្ហបុរី មិនថា ទៅទស្សនកិច្ច ទៅសិក្សា ឬទៅបែបធុរកិច្ចក៏ដោយ ការធ្វើដំណើរទៅកាន់តែកន្លែងកម្សាន្តនានាដោយថ្មើរជើង ដើម្បីទទួលយកបទពិសោធថ្មីៗ តែងតែជាបំណងប្រាថ្នារបស់យើងគ្រប់គ្នា។ អ្វីដែលកាន់តែពិសេសទៅទៀតនោះគឺថា នៅសិង្ហបុរី មានភ្នាក់ងារទេសចរណ៍ជាច្រើនដែលអាចនាំលោកអ្នកដើរកម្សាន្តដោយដោយមិនគិតថ្លៃសេវា។
ហេតុនេះ លោកអ្នកអាចធ្វើដំណើរទៅកន្លែងកម្សាន្តនានា ដើម្បីមើលទស្សនីយភាពដ៏ប្លែកភ្នែកបែបវប្បធម៌ ធម្មជាតិ សិល្បៈ និងភាពស៊ីវីល័យជាច្រើនបានដោយងាយស្រួល។ មិនត្រឹមតែប៉ុណ្ណោះ ប្រសិនបើអ្នកជាមនុស្សចូលចិត្តដើរ និងស្វែងយល់បន្ថែមលើតំបន់ទេសចរណ៍នានា លោកអ្នកអាចសាកល្បងទៅកាន់កន្លែងខាងក្រោមនេះបាន ជាមួយនឹងភ្នាក់ងារទេសចរណ៍នានា ប្រសិនបើអ្នកទៅលេងសិង្ហបុរី។
១. ដំណើរកម្សាន្តដោយថ្មើរជើងទៅស្រុក Little India ជាមួយភ្នាក់ងារទេសចរណ៍ Monster Day Tours
នៅទីនេះ មានកន្លែងកម្សាន្តដ៏សម្បូរបែប ដោយលោកអ្នកអាចធ្វើដំណើរទៅកាន់កន្លែងជាទីសក្ការៈបូជា ជាច្រើនដូចជា ប្រាសាទ Sri Veeramakaliamman និងប្រាសាទ Shree Lakshminarayan ជាដើម។
បន្ទាប់មក លោកអ្នកអាចធ្វើដំណើរទៅកាន់ទឹកដីតម្បាញ Haniffa Textiles នៅលើវិថី Serangoon Road និងផ្ទះដែលមានអាយុកាល១០០ឆ្នាំរបស់អាជីវករដ៏ជោគជ័យគឺលោក Tan Teng Niah។ ក្រៅពីនេះ លោកអ្នកក៏អាចសាកល្បងភ្លក្សម្ហូបអាហារតាមបែបប្រពៃណីឥណ្ឌា briyani (បាយលាយសាច់ និងបន្លែ មានរសជាតិហឹរខ្លាំង) ជាដើម។
២. ដំណើរកម្សាន្តដោយថ្មើរជើងនៅតំបន់ Chinatown ជាមួយភ្នាក់ងារទេសចរណ៍ Monster Day Tours
នៅ Chinatown លោកអ្នកអាចដើរកម្សាន្តនៅតាមទីកន្លែងជាច្រើន ដូចជា សារមន្ទីរ Fuk Tak Chi ដែលធ្លាប់ជាប្រាសាទបុរាណចិនមានវ័យចំណាស់ជាងគេនៅសិង្ហបុរី និង Thian Hock Keng ដែលជាប្រាសាទមានវ័យចាស់ជាងគេបំផុត។
ក្រៅពីនេះ លោកអ្នកក៏អាចដើរកម្សាន្តនៅកន្លែងជាច្រើនទៀតដូចជា ប្រាសាទ និងសារមន្ទីរ Buddha Tooth Relic និងផ្សារលក់ទំនិញចម្រុះ Chinatown Complex ដើម្បីដឹងកាន់តែច្បាស់បន្ថែមទៀតពីជនអន្តោប្រវេសន៍ចិន។ ជាមួយគ្នានេះ លោកអ្នកក៏អាចពិសារអាហារជាច្រើនប្រភេទផងដែរ ដូចជា បបែលអាំង និងអយស្ទើរ ជាដើម នៅតាមដងវិថីអាហារចិន Chinatown Food Street។ បន្ទាប់មក លោកអ្នកអាចបន្តដំណើរទៅវិថី Sago Lane ដែលប្រមូលផ្តុំដោយភោជនីយដ្ឋានជាច្រើនទៀត។
៣. ការដើរកម្សាន្តនៅ Kampong រាល់ថ្ងៃពុធ ជាមួយភ្នាក់ងារទេសចរណ៍ Tribe Tours
ការធ្វើដំណើរឆ្លងកាត់ព្រះរាជវាំងបុរាណរបស់អតីតស្តេចស៊ុលតង់ នឹងធ្វើឲ្យលោកអ្នកមានអារម្មណ៍ប្លែកជាមួយនឹងរូបគំនូរលើជញ្ជាំងធំៗជាច្រើននៅតំបន់ Kampong Gelam។ Kampong Gelam គឺជាកន្លែងដ៏ល្អក្នុងការសិក្សាបន្ថែមទៅលើស្មារតីគ្រហគ្រិនទាំងលើអាជីវកម្មបែបប្រពៃណី និងសម័យទំនើប។ ជាមួយគ្នានេះ លោកអ្នកក៏អាចសាកល្បងរសជាតិតែ ឬកាហ្វេ នៅក្បែរនោះផងដែរ។
លោកអ្នកក៏អាចស្វែងយល់ពីស្នាដៃសិល្បៈបែបប្រពៃណី និងវប្បធម៌សម័យទំនើប ក៏ដូចជាដឹងកាន់តែច្បាស់បន្ថែមទៀតពីរបៀបដែលក្រុមជនជាតិនានានៅ Kampong Gelam បានចូលរួមសាងសង់ព្រះវិហារ Sultan Mosque ផងដែរ ហើយលោកអាចទៅមើលការសម្តែងនានានៅមជ្ឈមណ្ឌលសិល្បៈ Aliwal ឬទស្សនាតន្ត្រីករនៅតាមបាផឹកស៊ីជាច្រើនកន្លែង។
៤. ការធ្វើដំណើរកម្សាន្តនៅតាមមាត់ទន្លេ រាល់ថ្ងៃព្រហស្បតិ៍ ជាមួយភ្នាក់ងារទេសចរណ៍ Tribe Tours
ការធ្វើដំណើរកម្សាន្តនៅតំបន់នេះ នឹងជួយឲ្យលោកអ្នកទទួលបានអារម្មណ៍រីករាយជាពិសេស ព្រោះលោកអ្នកនឹងឃើញហាងជាប់មាត់ទន្លេជាច្រើន ដែលមានការរៀបចំដ៏គួរឲ្យប្លែកភ្នែក ក៏ដូចជា បា និងភោជនីយដ្ឋាន ដ៏រស់រវើក។ នៅទីនោះ លោកអ្នកអាចដើរឆ្លងកាត់ស្ពានជាច្រើន ដែលត្រូវបានដាក់ឈ្មោះបន្ទាប់ពីជនល្បីៗ ដែលបានធ្វើដំណើរទស្សនកិច្ចទៅកាន់កំពង់ផែបុរាណនេះ ហើយលោកអ្នកក៏នឹងទទួលបានចំណីអារម្មណ៍បែបរ៉ូមែនទិក ក្នុងពេលថ្ងៃលិចនៅ Marina Bay Sands ផងដែរ។
៥. ការធ្វើដំណើរកម្សាន្តនៅ Bukit Brown ជាមួយភ្នាក់ងារទេសចរណ៍ Sneak Peek Singapore
ការដើរមើលផ្នូរជាច្រើនរបស់បិតាស្ថាបនិកសិង្ហបុរី នៅ Bukit Brown នឹងជួយឲ្យលោកមានអារម្មណ៍ប្លែក ក៏ដូចជាទទួលបានបទពិសោធថ្មីមួយ។ អ្នកទេសចរក៏អាចស្វែងយល់បន្ថែមពីប្រវត្តិសាស្ត្រសម្បូរបែបនៅទីស្មសានបុរាណនោះ ក្រោមការរៀបរាប់របស់ភ្នាក់ងារទេសចរណ៍ ក៏ដូចជារូបចម្លាក់នានា រួមជាមួយនឹងលក្ខខណៈពិសេសនៃផ្នូរនីមួយៗផងដែរ។
៦. កន្លែកម្សាន្ត Sungei Buloh Wetland Reserve ជាមួយភ្នាក់ងារទេសចរណ៍ All things Bukit Brown
នៅភាគពាយ័ព្យប្រទេសសិង្ហបុរី ប្រមូលផ្តុំដោយតំបន់ធម្មជាតិជាច្រើន ហើយប្រសិនបើអ្នកចូលចិត្តធម្មជាតិ លោកអ្នកអាចធ្វើដំណើរកម្សាន្តដោយថ្មើរជើងទៅកាន់ព្រៃកោងកាង ស្របពេលដែលលោកអ្នកក៏អាចថតរូបភាពរបស់សត្វជាច្រើននៅក្នុងតំបន់ Sungei Buloh Wetland Reserve ផងដែរ។
ជាមួយគ្នានេះ លោកអ្នកក៏អាចធ្វើដំណើរទៅកាន់កន្លែងបេតិកភណ្ឌជាច្រើនដូចជា MacRitchie Reservoir ជាដើម ដែលជាប់ពាក់ព័ន្ធនឹងសង្គ្រាមលោកលើកទី២ និងការត្រួតត្រាបស់ជប៉ុន៕
ប្រភពព័ត៌មាន៖ visitsingapore.com