អ្នកតា ៦កន្លែងនៅកម្ពុជាល្បីស័ក្ដិសិទ្ធិណាស់ ចង់បានប្ដី ទារលុយអ្នកជំពាក់មិនសង ចង់ឡើងតំណែង បន់ច្រើនតែបានសម្រេច

2021-10-21 02:58:19
ព័ត៌មាន

2021-10-21 02:58:19
ចំនួនមតិ 0 | ចំនួនចែករំលែក 0

ចន្លោះមិនឃើញ

កន្លែងបន់ស្រន់ទាំង ៦នៅកម្ពុជា ត្រូវបានប្រជាពលរដ្ឋល្បីតៗគ្នាថា ពូកែស័ក្ដិសិទ្ធបំផុត ចង់បានអ្វីក៏បានហ្នឹង។ ដូច្នេះចង់ដឹងថា ទីតាំងបន់ស្រន់ទាំងនោះ នៅក្នុងខេត្តណាខ្លះ? ខាងក្រោមនេះជាកន្លែងបន់ស្រន់ល្បីៗទាំង ៦ក្នុងខេត្តផ្សេងៗគ្នា៖

១. អ្នកតាក្រហម ក នៅភ្នំសន្ទុកបន់ដើម្បីឱ្យគេសងលុយ

កូនបំណុលជំពាក់រាប់ឆ្នាំស្ទើរមិនសង គឺម្ចាស់លុយបានទៅបន់ស្រន់ លោកតាក្រហមក នៅភ្នំសន្ទុកស្ថិតនៅក្នុងខេត្តកំពង់ធំ បានសម្រេចស្ទើរគ្រប់គ្នា។ ទន្ទឹមនឹងនេះ អ្នកប៉ងចូចែចូវស្ដីដណ្ដឹងកូនគេ ឬ ចង់លក់ដីដាច់ សុទ្ធតែទៅបន់ស្រន់នៅទីនេះបានដូចសេចក្ដីប្រាថ្នា។ នេះបើតាមការលើកឡើងរបស់ លោកយាយ ម៉ៅ អ្នកថែរក្សាកន្លែងអ្នកតាក្រហមក លើភ្នំសន្ទុក។

២.អណ្ដូងទឹក ៧ពណ៌ឬរូងនាគភ្នំគូលែនបន់ដើម្បីបានប្ដី

ភ្នំគូលែនស្ថិតនៅក្នុងស្រុកស្វាយលើ និងស្រុកវ៉ារិន ចម្ងាយ ៦០គីឡូម៉ែត្រពីក្រុងសៀមរាប និងប្រហែល ២៥គីឡូម៉ែត្រពីប្រាសាទបន្ទាយស្រី។ ភ្នំនេះមានឈ្មោះដើមថា មហិន្រ្ទបព៌ត ជាកន្លែងដែលព្រះបាទជ័យវរ្ម័នទី២ ប្រារព្ធធ្វើពិធីទេវរាជ និងប្រកាសឯករាជ្យពីប្រទេសជ្វាក្នុងឆ្នាំ៨០២ ដែលជាពេលដែលសម័យអង្គរកើតឡើង។

នៅលើភ្នំនេះដែរ មានកន្លែងមួយដែលគេបានឱ្យឈ្មោះថាជាអណ្ដូង៧ពណ៌ឬហៅម្យ៉ាងទៀតថារូងនាគ ដែលល្បីថាសក្ដិសិទ្ធិខ្លាំងណាស់ ពោលគឺទាំងភ្ញៀវជាតិនិងអន្តរជាតិមិនដែលរំលងនោះទេ។ អ្វីដែលកាន់តែពិសេសថែមទៀតនោះ បើតាមអ្នកនាំភ្ញៀវម្នាក់នៅលើភ្នំគូលែន បានប្រាប់ដូច្នេះថាបរទេសឱ្យតែមកដល់កន្លែងនេះ តែងតែមានជំនឿបន់ស្រន់សុំសេចក្ដីសុខជានិច្ច ហើយនារីៗខ្លះក៏ឆ្លៀតសុំរកគូស្រករថែមទៀតផង ដោយមានពាក្យតៗគ្នាថាអាចនឹងបានដូចបំណងច្រើន។

៣.រូងពស់ត្បាល់នៅវត្តត្រឡែងកែងបន់អ្វីក៏បានដូចបំណង

វត្តត្រឡែងកែង ស្ថិតនៅក្នុងឃុំលង្វែក ស្រុកកំពង់ត្រឡាច ខេត្ដកំពង់ឆ្នាំង ហើយជាកន្លែងចំកណ្ដាលអតីតរាជធានីលង្វែកដែលត្រូវបានកសាងឡើងនៅ ស.វ. ទី ១៦។ វត្តនេះមានវ័យចំណាស់ធ្លាប់មានប្រវត្តិសាស្ត្រដ៏សែនជូរចត់ក្នុងសម័យសង្គ្រាមរវាងកម្ពុជានិងសៀម ដោយកងទ័ពសៀមបានប្រើគោលនយោបាយបាចប្រាក់ឌួង ចូលរនាំងព្រៃឫស្សី។

បច្ចុប្បន្ននៅក្នុងវត្តនេះ ត្រូវបានប្រជាជនដាំដើមឫស្សីជាច្រើនគុម្ពដើម្បីរក្សាការចងចាំសម្រាប់ដាស់តឿនដល់កូនចៅជំនាន់ក្រោយ កុំឱ្យភ្លេចពីប្រវត្តិសាស្ត្ររបស់ខ្លួន។ អ្វីដែលកាន់តែពិសេសទៀតនោះ ក្នុងវត្តនេះដែរ មានរូងស័ក្ដិសិទ្ធិមួយ ដែលតាំងពីដើមមកគេឱ្យឈ្មោះថា រូងពស់ត្បាល់។ រូងនេះ មានប្រវែងចាប់ពីវត្តត្រឡែងកែងនេះ រហូតដល់ភ្នំបាសិតឯណោះ ដែលមានរឿងប្រវត្តិសាស្ត្រតំណាលជាច្រើន។

៤.ទួលបារាយណ៍អណ្ដែតបន់ដើម្បីឡើងតំណែង

ទួលបារាយណ៍អណ្ដែត ឬទួលអស់លោក នៅស្រុកកំពង់លាវ ខេត្តព្រៃវែង ជាកន្លែងដ៏ស័ក្ដិសិទ្ធិមួយ ដែលល្បីថាអ្នកបន់ស្រន់សុំឡើងតំណែងតែងសម្រេចដូចបំណង ហើយអ្នកធំភាគច្រើននាំគ្នាទៅលាបំណន់វិញ ក្រោយពេលជោគជ័យតាមសេចក្ដីប្រាថ្នា។ ប្រជាជនជាច្រើនមានជំនឿលើទួលនេះ ដោយសារពេលបន់ស្រន់សុំអ្វីមួយ តែងសម្រេចដូចបំណង ហើយអ្នកឈឺថ្កាត់ ក៏បានជាវិញ ចំណែកអ្នកបន់ស្រន់ឲ្យឡើងស័ក្ដិ(តំណែង)ក៏បានជោគជ័យ។

៥. ព្រះអង្គវត្តភ្នំក្លែង

វត្តភ្នំខ្លែងជាវត្តបុរាណតាំងពីសតវត្សទី១៨ ដែលសង់នៅទីកំពូលភ្នំដែលពលរដ្ឋជាច្រើនជំនាន់ ល្បីថាមានបារមីពូកែស័ក្ដិសិទ្ធិ។

បារមីជាច្រើននៅគ្រងរក្សាទីសក្ការដ៏ចំណាស់នេះដូចជាបារមីព្រះអង្គបញ្ចគីចំនួន ២១ អង្គ សម្រាប់អ្នកដែលចង់បន់ស្រន់មុខរបររកស៊ីចម្រុងចម្រើន បារមីយាយរំដួលសម្រាប់អ្នកផ្សងរកគូស្នេហ៍ បារមីលោកតាដំបងដែក បារមីព្រះគោព្រះកែវ បារមីអណ្ដូងទឹកដែលមានកុមារពេជ្រ កុមារទេពថែរក្សា សម្រាប់អ្នកបន់ស្រន់សុំបុត្រ ប្រុស-ស្រី សមតាមបំណងប្រាថ្នា។

វត្តភ្នំខ្លែង មានទីតាំងស្ថិតនៅក្នុងឃុំព្រៃស្លឹក ស្រុកទ្រាំង ខេត្តតាកែវ មានចម្ងាយ ១០០ គីឡូម៉ែត្រពីទីក្រុងភ្នំពេញ និងមានចម្ងាយជាង ១៥ គីឡូម៉ែត្រពីក្រុងដូនកែវខេត្តតាកែវ។

៦. ព្រះអង្គខ្មៅវត្តព្រៃអង្គរ

ព្រះអង្គខ្មៅ ជាព្រះពុទ្ធរូបតែមួយអង្គគត់ ដែលនៅសល់តាំងពីសម័យហ្លួងព្រះស្ដេចកន នៅចន្លោះសតវត្សទី១៥-១៦។ ព្រះអង្គខ្មៅ បច្ចុប្បន្នស្ថិតនៅវត្តព្រៃអង្គរក្នុង ភូមិបន្ទាយព្រៃនគរ ឃុំដូនតី ស្រុកពញាក្រែក ខេត្តត្បូងឃ្មុំ គឺធ្វើឡើងពីមាសខ្មៅ លាយជាមួយសំរឹទ្ធិ និងព្រះនេត្រដាំពេជ្រ ហើយល្បីថាមានបារមីសក្ដិសិទ្ធិណាស់ ខណៈអ្នកធំៗមន្ត្រីរាជការ និងអ្នកនៅក្រៅប្រទេស ក៏តែងទៅបន់ស្រន់បានសម្រេចដូចបំណង។

ព្រះតេជគុណ កុសល មានសង្ឃដីកាថា«សម័យស្ដេចកន ព្រះអង្គខ្មៅមានបារមីឫទ្ធិខ្លាំងក្លាណាស់ នៅពេលដែលមេទ័ពចេញច្បាំងជាមួយសៀមតែងបន់ស្រន់ និងទទួលបានជ័យជម្នះ។ បច្ចុប្បន្នប្រជាពលរដ្ឋនៅខេត្តត្បូងឃ្មុំ ខេត្តផ្សេងៗ ឬអ្នកក្រៅប្រទេសក៏តែងមកបន់ស្រន់សុំសេចក្ដីសុខ និងបួងសួងសុំឲ្យក្ដីប្រាថ្នាជាដើម ហើយពេលខ្លះមានអ្នកមកបន់ដល់ម៉ោង១២យប់ក៏មាន ព្រោះតែពួកគេនៅឆ្ងាយ។ ភាគច្រើនពួកគេតែងទទួលបានសម្រេច ហើយក៏មកថ្វាយព្រះពុទ្ធរូបនៅវត្តនេះ»៕