កុមារាកំសត់មកសិក្សាដោយសម្លៀកបំពាក់ចាស់ ហើយអ្វីដែលកាន់តែអាណិតអាសូរដល់ប្អូនប្រុសទៀតនោះ គឺថាគ្មានសូម្បីតែស្បែកជើងពាក់។ ខុសពីសិស្សដទៃទៀតដែលគេមានសម្លៀកបំពាក់ថ្មីៗ និងសម្ភារៈសិក្សាគ្រប់គ្រាន់​។ បើតាមការបញ្ជាក់ពីក្រុមការងារ JCI ប្អូនប្រុសរូបនេះ គឺជាសិស្សនៅសាលាបឋមសិក្សាជ័យ ក្នុងខេត្តសៀមរាប។ តាមការសន្និដ្ឋាន ប្រហែលជាគ្រួសាររបស់ប្អូនប្រុសដែលបានរៀបរាប់ខាងលើ មានជីវភាពខ្វះខាត ប៉ុន្តែទោះជាយ៉ាងណា ប្អូនប្រុសមិនបោះបង់ការសិក្សាចោល តស៊ូមកក្រេបយកចំណេះវិជ្ជា ដើម្បីជាស្ពានចំលងទៅរកអនាគតមួយដែលល្អប្រសើរ។

បន្ទាប់ពីរូបភាពរបស់កុមារកំសត់ ត្រូវបានចែកចាយពេញបណ្តាញសង្គមហ្វេសប៊ុក ពេលនេះបានដឹងទៅដល់សម្តេចតេជោ ហ៊ុន សែន ហើយ។ ដោយសម្តេច លោកបានមានប្រសាសន៍នៅលើទំព័រហ្វេសប៊ុក នៅថ្ងៃទី២ ខែវិច្ឆិកា ឆ្នាំ២០២១ ដោយមានន័យខ្លឹមសារថា "ទោះជារូបភាពមួយសន្លឹកនេះខ្ញុំមិនដឹងថានៅទីណា?និងចៅតូចនេះឈ្មោះអី អាយុប៉ុន្មាន? តែខ្ញុំពិតជាមានមោទនភាពចំពោះចៅៗដែលចង់រៀនសូត្រ។ ប័ណ្ណចាក់វ៉ាក់សាំងពាក់នៅកបង្ហាញថាខ្ញុំបានចាក់វ៉ាក់សាំងរួចហើយនិងចូលរៀនដោយគ្មានការភ័យខ្លាចជាមួយនិងការពាក់ម៉ាស់បានត្រឹមត្រូវ។ ទោះចៅមិនមានស្បែកជើងពាក់តែតាជឿថាចៅច្បាស់ជាលាងដៃនិងរក្សាអនាម័យបានល្អ។ សូមជូនពរចៅៗប្រកបដោយសេចក្តីសុខ សេចក្តីចំរើននិងរៀនសូត្របានល្អ" ។

ក្នុងនោះក៏មានសប្បុរសជនជាច្រើនចង់ធ្វើការជួយទៅដល់កុមារាកំសត់ខាងលើ ដោយឃើញសម្លៀកបំពាក់មានសភាពចាស់ ហើយថែមទាំងគ្មានស្បែកជើងពាក់ទៀត មើលទៅពិតជាគួរឱ្យអាណិតអាសូរខ្លាំងណាស់។ សង្ឃឹមថាឆាប់ៗប្អូនប្រុសនឹងមានសម្លៀកបំពាក់ថ្មីស្អាតសម្រាប់ពាក់មកសិក្សា រួមទាំងស្បែកជើង និងសម្ភារៈសិក្សាគ្រប់គ្រាន់ សមរម្យដូចសិស្សដទៃទៀត៕