ព័ត៌មានជុំវិញ ត្រីយក្សមួយក្បាលទំហំប៉ុនមនុស្ស រកឃើញនៅក្នុងកស្សិណអង្គរ

2022-11-03 10:28:07
ព័ត៌មាន

2022-11-03 10:28:07
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅរសៀលថ្ងៃនេះ មានការភ្ញាក់ផ្អើលមួយនៅលើទឹកដីខេត្តសៀមរាប ក្រោយមានដំណឹងថា ត្រីយក្សមួយក្បាលមានទំហំប៉ុនមនុស្សម្នាក់ ត្រូវបានចាប់បាននៅក្នុងប្រឡាយកស្សិណអង្គរ។

រូបភាពស្ដីពីត្រីមួយក្បាលដ៏ធំនេះ ត្រូវបានអ្នកប្រើប្រាស់បណ្ដាញសង្គមបាន និងកំពុងចែកចាយ ដោយភ្ជាប់ជាមួយពោលសោកស្ដាយ។ មើលតាមភិនភាគ អ្នកនៅលើបណ្ដាញសង្គមបានសន្និដ្ឋានថា ជាត្រីរាជ និងមានទម្ងន់ប្រមាណ ៧០គីឡូក្រាម។

ជុំវិញបញ្ហានេះ ឯកឧត្តម ឡុង កុសល អ្នកនាំពាក្យអាជ្ញាធរអប្សរា បានប្រាប់ Sabay រសៀលនេះថា ពិតជាមានការរកឃើញត្រីធំមួយក្បាលនោះនៅក្នុងប្រឡាយកស្សិណអង្គរពិតមែន។ យ៉ាងណា ឯកឧត្តម បានបដិសេធថា នោះមិនមែនជាត្រីរាជនោះទេ។ "វាមិនមែនត្រីរាជទេ មិនមែនទេ វាជាត្រីស្អីទេ ខ្ញុំស្គាល់មិនច្បាស់ដែរ វាដូចត្រីអាម៉ាហ្សូននោះណា!”។

ឯកឧត្តម ប្រាប់ទៀតថា ត្រី១ក្បាលនោះ គឺបានស្លាប់ដោយខ្លួនវា មិនមានអ្នកចាប់នោះទេ។ និយាយពីវត្តមានត្រីដ៏ធំនេះនៅក្នុងកស្សិណអង្គរ ឯកឧត្តមអ្នកនាំពាក្យ ប្រាប់ថា ឯកឧត្តមមិនបានដឹងថា វាបាននៅក្នុងប្រឡាយកស្សិណអង្គរនេះតាំងពីពេលណា ហើយអ្នកណាជាអ្នកយកមកលែងនោះទេ។ អាជ្ញាធរអប្សរា ទើបនឹងដឹង ក្រោយឃើញខ្មោចរបស់វានាពេលនេះប៉ុណ្ណោះ។

រូបភាព៖ហ្វេសប៊ុក

នៅប្រឡាយកស្សិណអង្គរ មានប្រភេទត្រីក្នុងស្រុកជាច្រើនប្រភេទ ដែលជាការព្រលែងរបស់ក្រុមការងារអាជ្ញាធរអប្សរា។ ជាមួយគ្នា អាជ្ញារអប្សរាតែងហាមមិនឲ្យមានការព្រលែងត្រីប្រភេទផ្សេង(ប្រភេទក្រៅស្រុក) នោះឡើយ ពោលគឺចង់តែអភិរក្សប្រភេទត្រីក្នុងស្រុកប៉ុណ្ណោះ។ ដូច្នេះហើយ ចំពោះត្រីចម្លែកធំមួយនេះ អាជ្ញារមិនបានដឹងឡើយ។

តាមឯកឧត្តម ឡុង កុសល ខ្មោចត្រីដ៏ធំនោះ ត្រូវបានក្រុមការងាររបស់អាជ្ញាធរអប្សរា ចាត់ចែងកប់ចោលរួចរាល់ហើយ៕

អត្ថបទ៖ ទារិកា