អនុឡោម​តាមព្រឹត្តិការណ៍​ស៊ីហ្គេម​ដែល​កម្ពុជា​ធ្វើ​ជា​ម្ចាស់​ផ្ទះ រាជរដ្ឋាភិបាលដាក់ចេញ​យុទ្ធសាស្ត្រ​ផ្សព្វផ្សាយ​ពី​ទេសចរណ៍​កម្ពុជា “ឆ្នាំទស្សនាកម្ពុជា ២០២៣" (Visit Cambodia Year 2023 Campalgn) ក្រោមពាក្យស្លោក " គ្រប់ថ្ងៃគឺជាអច្ឆរិយភាព" (Every day Is a Wonder)ដែលត្រូវបានអនុម័តដោយរាជរដ្ឋាភិបាលកាលពីថ្ងៃទី២៧ ខែកុម្ភៈ ឆ្នាំ២០២៣ ។

ថ្មី​ៗ​នេះ​ទៀត​សោត ក្នុង​កិច្ច​ប្រជុំជំរុញ​ការ​ផ្សព្វផ្សាយ ក៏​បំផុស​ការ​អនុវត្តន៍​យុទ្ធនាការ​នេះ រាជរដ្ឋាភិបាល តាម​រយៈ​ក្រសួង​ទេសចរណ៍ បាន​លើក​ឡើង​ទៀត​ថា កម្ពុជា​បាន​ត្រៀម​ខ្លួន​ជា​ស្រេចដើម្បីបង្ហាញពី “អច្ឆរិយភាព" របស់ខ្លួនដល់ភ្ញៀវទេសចរគ្រប់រូប ឈរលើសក្តានុពលរបស់ គោលដៅទេសចរណ៍ដែលមានភាពលេចធ្លោ ជាអាទិ៍ កម្ពុជាផ្តល់នូវបទពិសោធន៍ទេសចរណ៍ល្អៗក្នុងការធ្វើដំណើរកម្សាន្ត តាមរយៈសសរស្តម្ភសក្តានុពល​ទេសចរណ៍ទាំង ៤ គឺ បេតិកភណ្ឌវប្បធម៌, អេកូទេសចរណ៍, ទេសចរណ៍ឆ្នេរ និងភាពជាខ្មែរ ។

នេះ​គឺ​យុទ្ធសាស្ត្រ​របស់​ក្រសួងទេសចរណ៍ និងក្រុមការងារ រាជរដ្ឋាភិបាល និងឯកជន ដើម្បីស្ដារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ-១៩ ស្រប​តាមកម្ពុជាមានអច្ឆរិយភាពជាច្រើន ហើយអច្ឆរិយភាពទាំងនោះផ្តុំគ្នាក្លាយទៅជា “កម្ពុជា៖ ព្រះជា- ណាចក្រអច្ឆរិយៈ” បន្ទាប់​ពីវិបត្តិ​ជំងឺកូវីដ-១៩ មានភាពធូរស្បើយ ហើយ​ចរន្តនៃភ្ញៀវទេសចរអន្តរជាតិបានចាប់ផ្ដើមកម្រើកឡើងវិញ នៅកម្រិតសកល ក៏ដូចជាកម្រិតតំបន់អាស៊ី និងអាស៊ាន។ ។

ដូច្នេះ រាល់ដំណើរកម្សាន្តរបស់ភ្ញៀវទេសចរលើទឹកដីកម្ពុជានៅគ្រប់ថ្ងៃទាំងអស់នៃសប្តាហ៍ គឺសុទ្ធតែមានភាពពិសេស និងអាចទទួលបានបទពិសោធន៍ទេសចរណ៍ផ្សេងៗ ប្លែកៗពីគ្នា។

តាមការ​សិក្សាស្រាវជ្រាវរបស់​ក្រសួង​ទេសចរណ៍ ភ្ញៀវទេសចរអន្តរជាតិ ប្រមាណ ៤៩% បានឆ្លើយថា កត្តាដែលទាក់ទាញ ឲ្យមកកាន់កម្ពុជាគឺ “ប្រាសាទអង្គរវត្ត” និង ៦២% ផ្សេង​ទៀត បានឆ្លើយថា “កត្តាមនុស្ស គឺជាកត្តាវិជ្ជមានរបស់កម្ពុជាពេលដែលពួកគេបានមកដល់ និងធ្វើដំណើរទស្សនកិច្ចកម្សាន្ធរួចមក។

កំណត់​សម្គាល់​អំពី​ប្រាសាទអង្គរវត្ត គឺមានក្បាច់ និងចម្លាក់លើជញ្ជាំងប្រាសាទ និងមានបាតុភូតធម្មជាតិព្រះអាទិត្យចំ កណ្តាលកំពូលប្រាសាទ ឬ បាតុភូតសមរាត្រី(Equinox) - ធាតុសំខាន់ៗ ដូចជា “ការរចនាក្បាច់ប្រាសាទ” និង “ពណ៌ត្នោត ដែលតំណាងឱ្យពណ៌របស់ប្រាសាទ។ ដោយ​ឡែកកត្តាមនុស្ស សំដៅដល់ប្រជាពលរដ្ឋខ្មែរដែលផ្តល់នូវបដិសណ្ឋារកិច្ចយ៉ាងល្អ និងទទួលស្វាគមន៍ជាមួយ ស្នាមញញឹមពោរពេញដោយក្តីស្រលាញ់ និងកក់ក្ដៅ៕