របាយការណ៍ចុងក្រោយរបស់ក្រសួងពាណិជ្ជកម្មកម្ពុជា បានបង្ហាញថា ការនាំចេញសរុបរបស់កម្ពុជាទៅកាន់ប្រទេសសមាជិកជាដៃគូសេដ្ឋកិច្ចទូលំទូលាយក្នុងតំបន់ (RCEP) មានចំនួន 2.89 ពាន់លានដុល្លារអាមេរិក ក្នុងរយៈពេល 4 ខែដំបូងនៃឆ្នាំ 2023 កើនឡើង 16 ភាគរយពី 2.49 ពាន់លានដុល្លារក្នុងរយៈពេលដូចគ្នាកាលពីឆ្នាំមុន។

ក្នុងអំឡុងខែមករា ដល់ខែមេសា ឆ្នាំ 2023នេះ គោលដៅនាំចេញកំពូលទាំងបីរបស់កម្ពុជាក្រោម RCEP គឺវៀតណាម ចិន និងថៃ ដោយកម្ពុជា បាននាំចេញផលិតផលមានតម្លៃ 1.18 ពាន់លានដុល្លារទៅវៀតណាម 440 លានដុល្លារទៅប្រទេសចិន និង 393 លានដុល្លារ ទៅប្រទេសថៃ។

អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា លោក ប៉ែន សុវិជាតិ បានឱ្យដឹងថា RCEP ដែលចូលជាធរមាននៅថ្ងៃទី 1 ខែមករា ឆ្នាំ 2022 គឺជាកត្តាជំរុញដ៏សំខាន់សម្រាប់កំណើនពាណិជ្ជកម្មប្រកបដោយនិរន្តរភាពរបស់កម្ពុជាក្នុងយុគសម័យជំងឺរាតត្បាតកូវីដ-១៩។ លោកបានប្រាប់ Xinhua ថា "កំណើននៃការនាំចេញរបស់យើងគឺជាសក្ខីភាពមួយចំពោះការចូលទៅកាន់ទីផ្សារកាន់តែច្រើននៃផលិតផលរបស់យើងទៅកាន់ប្រទេសសមាជិក RCEP ជាមួយនឹងពន្ធអនុគ្រោះ" ។ លោកបន្តថា “កិច្ចព្រមព្រៀងពាណិជ្ជកម្មសេរីដ៏ធំបំផុតរបស់ពិភពលោកនេះ មិនត្រឹមតែផ្តល់ការជំរុញដល់កំណើនពាណិជ្ជកម្មរបស់យើងប៉ុណ្ណោះទេ ប៉ុន្តែថែមទាំងក្លាយជាមេដែកដើម្បីទាក់ទាញការវិនិយោគផ្ទាល់ពីបរទេសកាន់តែច្រើនមកកម្ពុជាផងដែរ”។

លោក ប៉ែន សុវិជាតិ បាននិយាយថា RCEP នឹងជួយកម្ពុជាឱ្យបញ្ចប់ពីស្ថានភាពប្រទេសអភិវឌ្ឍន៍តិចតួច (LDC) នៅឆ្នាំ 2028 និងសម្រេចបាននូវគោលដៅរបស់ខ្លួនក្នុងការក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ 2030 និងជាប្រទេសដែលមានចំណូលខ្ពស់នៅឆ្នាំ 2050។

លោក គី សេរីវឌ្ឍន៍ អគ្គនាយកវិទ្យាស្ថានសិក្សាចិន នៃរាជបណ្ឌិត្យសភាកម្ពុជា មានប្រសាសន៍ថា ការធ្វើពាណិជ្ជកម្មខ្នាតធំក្នុងតំបន់បានរក្សាទីផ្សារបើកចំហ ពង្រឹងសមាហរណកម្មសេដ្ឋកិច្ចក្នុងតំបន់ និងគាំទ្រដល់ការបើកចំហ សេរី យុត្តិធម៌ ការរួមបញ្ចូល និង ប្រព័ន្ធពាណិជ្ជកម្មពហុភាគី។ លោកបានប្រាប់សារព័ត៍មានស៊ីនហួថា "RCEP បានជួយកម្ពុជា និងប្រទេសសមាជិកផ្សេងទៀតឱ្យឆាប់ងើបឡើងវិញនូវសេដ្ឋកិច្ច និងពាណិជ្ជកម្មរបស់ពួកគេ ដែលរងគ្រោះពីជំងឺរាតត្បាត។

លោក Joseph Matthews សាស្ត្រាចារ្យជាន់ខ្ពស់នៅសាកលវិទ្យាល័យ ប៊ែលធី អន្តរជាតិ ក្នុងរាជធានីភ្នំពេញ បានឱ្យដឹងថា RCEP កំពុងក្លាយជាកត្តាជំរុញកំណើនសេដ្ឋកិច្ច និងពាណិជ្ជកម្មក្នុងតំបន់ក្នុងយុគសម័យក្រោយជំងឺរាតត្បាត។ លោកបានបន្តថា៖ “វាបានផ្តល់នូវកិច្ចសហប្រតិបត្តិការដែលមានផលប្រយោជន៍ទៅវិញទៅមក និងលទ្ធផលឈ្នះឈ្នះសម្រាប់ប្រទេសដែលចូលរួមទាំងអស់។ ប្រទេសជាសមាជិកទាំងអស់បានច្រូតកាត់ ហើយនឹងបន្តប្រមូលផលពី RCEP សម្រាប់រយៈពេលវែង"។

មូលនិធិរូបិយវត្ថុអន្តរជាតិ (IMF) បាននិយាយនៅក្នុងទស្សនវិស័យសេដ្ឋកិច្ចពិភពលោកប្រចាំឆ្នាំរបស់ខ្លួនដែលបានចេញផ្សាយកាលពីខែមុនថា ប្រទេសកម្ពុជាស្ថិតក្នុងចំណោមប្រទេសដែលមានសេដ្ឋកិច្ច RCEP ដ៏រឹងមាំបំផុតចំនួនបីក្នុងឆ្នាំ 2023 ជាមួយនឹងប្រទេសហ្វីលីពីន និងប្រទេសវៀតណាម។

IMF បាននិយាយថា ប្រទេសកម្ពុជាជាប់ចំណាត់ថ្នាក់ទីពីរស្មើគ្នាជាមួយនឹងប្រទេសវៀតណាម ដោយសេដ្ឋកិច្ចទាំងពីរត្រូវបានព្យាករណ៍ថានឹងកើនឡើង 5.8 ភាគរយនៅឆ្នាំនេះ ខណៈដែលសេដ្ឋកិច្ចហ្វីលីពីនត្រូវបានគេព្យាករណ៍ថានឹងកើនឡើង 6 ភាគរយ។ កិច្ចព្រមព្រៀងពាណិជ្ជកម្មសេរី RCEP រួមមានប្រទេសអាស៊ីប៉ាស៊ីហ្វិកចំនួន 15 រួមទាំងរដ្ឋសមាជិកអាស៊ានចំនួន 10 និងដៃគូពាណិជ្ជកម្មចំនួន 5 គឺប្រទេសចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់៕