កញ្ញា Chrisanti Indiana ជានិស្សិតសិក្សាផ្នែក រចនានៅទីក្រុងស៊ីដនី ប្រទេសអូស្ត្រាលី រហូតឈានដល់ការបង្កើត platform ថែសម្ផស្សនៅលើឌីជីថលដ៏ធំបំផុតមួយរបស់ប្រទេសឥណ្ឌូនេស៊ី។ ដំណើរជីវិតរបស់ Chrisanti Indiana បង្ហាញពីតម្លៃនៃការធ្វើតាមចំណង់ចំណូលចិត្ត រៀនពីអ្វីដែលល្អបំផុត និងស្វែងរកដំណោះស្រាយដ៏ឆ្លាតវៃចំពោះបញ្ហាស្មុគស្មាញ។

សព្វថ្ងៃ កញ្ញា Indiana ជាសហស្ថាបនិកនៃ Sociolla ដែលជា platform ពាណិជ្ជកម្មអេឡិចត្រូនិករបស់ឥណ្ឌូនេស៊ីសម្រាប់ផលិតផលសម្រស់ និងសុខភាព។ ឥឡូវនេះ Sociolla ដែលជា platform ដ៏ធំបំផុតមួយនៅក្នុងប្រទេស ក៏បានពង្រីកទៅប្រទេសវៀតណាមផងដែរ និងបានបន្ថែមវត្តមានលក់រាយនៅក្នុងប្រទេសឥណ្ឌូនេស៊ី ហើយគេហទំព័ររបស់ក្រុមហ៊ុននេះ ទទួលបានភ្ញៀវជិត 5 លាននាក់ក្នុងមួយខែ។

កញ្ញា Indiana បាននិយាយថា “ធំឡើងខ្ញុំស្រលាញ់សិល្បៈ និងភាពច្នៃប្រឌិត ហើយខ្ញុំសុបិនចង់ក្លាយជាអ្នករចនា។ វាជាពេលវេលារបស់ខ្ញុំក្នុងនាមជានិស្សិតផ្នែករចនានៅប្រទេសអូស្ត្រាលី ដែលបន្ទាប់មកបានជំរុញឱ្យខ្ញុំចាប់អារម្មណ៍លើភាពស្រស់ស្អាត ម៉ាកយីហោ និងទីផ្សារឌីជីថល។ ខ្ញុំបានសិក្សាបរិញ្ញាបត្រផ្នែករចនា នៅមហាវិទ្យាល័យ Billy Blue College of Design ក្នុងទីក្រុងស៊ីដនី ដែលត្រូវបានសមាជិកគ្រួសារម្នាក់ណែនាំខ្ញុំថាជាសាលារចនាដ៏ល្អមួយ។ ការសិក្សានៅប្រទេសអូស្ត្រាលី ពិតជារីករាយណាស់។ នៅទីនោះ មាន វប្បធម៌ចម្រុះ ហើយខ្ញុំបានជួបមនុស្សមកពីជុំវិញពិភពលោក។ អ្នករាល់គ្នាបានស្វាគមន៍យ៉ាងខ្លាំង ហើយខ្ញុំមានអារម្មណ៍កក់ក្តៅដូចជានៅផ្ទះដែរ”។

សហគ្រិនវ័យក្មេងរូបនេះ បន្ថែមថា “ប្រហែលជាមេរៀនដ៏សំខាន់បំផុតនោះគឺថា ការក្លាយជាអ្នករចនាគឺនិយាយអំពីការដោះស្រាយបញ្ហា។ វាជាអ្វីដែលខ្ញុំចងចាំនៅពេលដែលខ្ញុំត្រលប់មកប្រទេសឥណ្ឌូនេស៊ី ហើយបានដឹងថាវាពិបាកខ្លាំងណាស់ក្នុងការទិញផលិតផលថែរក្សាសម្ផស្សតាមអ៊ីនធឺណិត ទោះបីជាពាណិជ្ជកម្មអេឡិចត្រូនិចកំពុងរីកចម្រើនក៏ដោយ។ នៅប្រទេសអូស្ត្រាលី ខ្ញុំពិតជាចាប់អារម្មណ៍លើភាពស្រស់ស្អាត ហើយខ្ញុំអាចទិញម៉ាកយីហោអន្តរជាតិដែលខ្ញុំចូលចិត្តនៅលើវេទិកាឌីជីថល ដូច្នេះខ្ញុំបានសម្រេចចិត្តប្រើជំនាញដែលខ្ញុំបានរៀននៅទីនោះដើម្បីបង្កើតអ្វីដែលស្រដៀងគ្នាសម្រាប់អ្នកប្រើប្រាស់ឥណ្ឌូនេស៊ី”។

កញ្ញា Indiana បានសហការគ្នាជាមួយដៃគូទាំង 2 របស់ខ្លួន ហើយរួមគ្នាចាប់ផ្តើមបង្កើត Sociolla នៅក្នុងឆ្នាំ 2015។ សហស្ថាបនិកទាំង 3នាក់ មានប្រវត្តិផ្សេងគ្នា ហើយបទពិសោធន៍របស់ Indiana នៅប្រទេសអូស្ត្រាលីមានសារៈសំខាន់ខ្លាំងណាស់ក្នុងការកសាងអាជីវកម្ម។ កញ្ញា បានរៀនពីរបៀបធ្វើការជាមួយម៉ាកល្បីៗជាសកល របៀបបង្កើតម៉ាកយីហោ របៀបបង្កើតផលិតផល និងបទពិសោធន៍ដែលផ្តោតលើអ្នកប្រើប្រាស់។

កញ្ញា Indiana បាននិយាយថា “វាជាអារម្មណ៍ដ៏អស្ចារ្យដែលបានដឹងថាអ្វីមួយដែលយើងបានបង្កើតកំពុងមានឥទ្ធិពលយ៉ាងខ្លាំងដល់សហគមន៍របស់យើង។ អ្វីដែលខ្ញុំស្រឡាញ់បំផុតគឺរបៀបដែលការបើកដំណើរការ Sociolla បានផ្លាស់ប្តូរឧស្សាហកម្មទាំងមូល។ វាមិនមែនមានតែយើងទេឥឡូវនេះ។ យើងបានជួយពន្លឿនកំណើនឧស្សាហកម្មសម្រស់នៅទូទាំងប្រទេសឥណ្ឌូនេស៊ី”។