បេក្ខភាពប្រធានាធិបតីឯករាជ្យមួយរូបគាំទ្រលោកត្រាំ ជាថ្នូរនឹងតំណែងក្នុងរដ្ឋាភិបាលថ្មី

2024-08-29 11:56:35
ព័ត៌មាន

2024-08-29 11:56:35
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក រ៉ូបឺត កេណ្ណឌី ជូញៀរ (Robert F. Kennedy Jr.) ប្រកាសគាំទ្រលោកប្រធានាធិបតីដូណាល់ ត្រាំ សម្រាប់ការបោះឆ្នោតជ្រើសរើសប្រធានាធិបតីនៅក្នុងខែវិច្ឆិកា ឆ្នាំ២០២៤នេះ។ លោកកេណ្ណឌី ដែលជាក្មួយប្រុសរបស់អតីតប្រធានាធិបតីអាមេរិក ចន អេហ្វ កេណ្ណឌី បានដកខ្លួនចេញពីការបោះឆ្នោត ខណៈលោកបានឈរឈ្មោះជាបេក្ខភាពប្រធានាធិបតីក្នុងនាមជាបេក្ខជនឯករាជ្យ។

លោក កេណ្ណឌី ធ្លាប់ជាសមាជិកគណបក្សប្រជាធិបតេយ្យ ដែលជាគណបក្សរបស់លោក ចូ បៃដិន និងអ្នកស្រី កមាលា ហារីស។ ប៉ុន្តែលោកប្រកាសផ្ដាច់ចេញពីគណបក្សនេះ ហើយឈរឈ្មោះជាបេក្ខជនឯករាជ្យ។ យ៉ាងណាមិញ ក្រោយធ្វើយុទ្ធនាការឃោសនាបានមួយរយៈ លោកក៏បានប្រកាសដកខ្លួនពីការបោះឆ្នោតកាលពីថ្ងៃសុក្រសប្ដាហ៍មុន ហើយប្រកាសគាំទ្របេក្ខភាពប្រធានាធិបតីមកពីគណបក្សសាធារណរដ្ឋ លោក ដូណាល់ ត្រាំ។

សារព័ត៌មានអាមេរិកមួយចំនួនបានចុះផ្សាយថា លោក កេណ្ណឌី នឹងទទួលបានតំណែងក្នុងជួររដ្ឋាភិបាល ដែលដឹកនាំដោយលោក ត្រាំ ប្រសិនបើលោក ត្រាំ ឈ្នះឆ្នោតនៅខែវិច្ឆិកា ខាងមុខនេះ។

លោក កេណ្ណឌី អាចនឹងទទួលតំណែងជានាយកអង្គភាពចារកម្មមជ្ឈិមអាមេរិក ដែលហៅកាត់ថា ស៊ីអាយអេ (CIA)។ នេះបើតាមការចុះផ្សាយរបស់សារព័ត៌មាន Newsweek។

បើយោងតាមការចុះផ្សាយរបស់សារព័ត៌មាន Washington Post ក្រោយពីបង្ហាញខ្លួនជាមួយលោក ត្រាំ កាលពីសប្ដាហ៍មុន ក្រុមការងារយុទ្ធនាការឃោនាការបោះឆ្នោតរបស់លោក ត្រាំ បានដាក់បញ្ចូលលោក កេណ្ណឌី ទៅក្នុងបញ្ជីឈ្មោះនៃក្រុមការងាររដ្ឋាភិបាលអន្តរកាល ដែលជាបេក្ខភាពត្រៀមធ្វើរដ្ឋមន្ត្រី និងកាន់មុខតំណែងសំខាន់ៗ សម្រាប់រដ្ឋាភិបាលជាប់ឆ្នោត៕