ប្រយ័ត្ន! ជាប់ពន្ធនាគារជិត ១០ឆ្នាំ ព្រោះជក់បារីលើយន្តហោះ

2024-12-17 01:39:00
ព័ត៌មាន

2024-12-17 01:39:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិអង់គ្លេសម្នាក់ត្រូវបានកាត់ទោសឲ្យជាប់ពន្ធនាគាររយៈពេល ៩ឆ្នាំ និង ៦ខែ បន្ទាប់ពីជក់បារី រួចចោលកន្ទុយបារីទៅក្នុងបន្ទប់ទឹកលើយន្តហោះ ត្រូវបានគេប្រទះឃើញ។

លោក John Cox អាយុ ៤៦ឆ្នាំ បានធ្វើឲ្យគេភ្ញាក់ផ្អើលរហូតដល់ចុចកណ្ដឹងប្រកាសអាសន្នលើយន្តហោះ Monarch Airbus ក្រោយបោះចោលកន្ទុយបារីទៅក្នុងធុងសំរាមបន្ទប់ទឹក និងបង្កឲ្យមានភ្លើងឆេះក្រដាសផ្សេងទៀត។ បន្ទាប់មក អ្នកបើកយន្តហោះបានប្រកាសអាសន្ន និងបានចុះចតជាបន្ទាន់ ខណៈក្រុមការងារលើយន្តហោះផ្សេងទៀតចូលទៅពន្លត់ភ្លើង។

លោក Cox ធ្លាប់បានសុំឲ្យលើកលែងទោសចំពោះការធ្វេសប្រហែសរបស់ខ្លួនដែលបានគំរាមកំហែងដល់អាយុជីវិតអ្នកដទៃ តែត្រូវប្រកាសឃុំខ្លួនលើកដំបូងរយៈពេល ៤ឆ្នាំ និង ៦ខែ នៅតុលាការ Birmingham Crown Court ។

ទោះយ៉ាងណា តុលាការឧទ្ធរណ៍បានសម្រេចទោសចុងក្រោយឲ្យលោក Cox ជាប់ពន្ធនាគាររយៈពេល ៩ឆ្នាំ និង ៦ខែកាលពីពេលថ្មីៗនេះ។

យន្តហោះខាងលើបានធ្វើដំណើរពីទីក្រុង Birmingham ប្រទេសអង់គ្លេស ទៅកាន់ទីក្រុង Sharm el-Shekh ប្រទេសអេហ្ស៊ីប និងកំពុងស្ថិតនៅរយៈកម្ពស់ជាង ១០គីឡូម៉ែត្រកាលពីខែសីហា ឆ្នាំ ២០១៥។ លោក Cox ត្រូវអាជ្ញាធរអេហ្ស៊ីបឃុំខ្លួនបណ្ដោះអាសន្ន រួចបញ្ជូនឲ្យទៅកាន់ប្រទេសអង់គ្លេសវិញ។

អ្នកបើកបរយន្តហោះដែលមានបទពិសោធន៍ជាង ២០ឆ្នាំខាងលើរៀបរាប់ថា លោកមិនធ្លាប់ជួបហេតុការណ៍បែបនេះឡើយ ព្រោះធ្វើឲ្យគ្រោះថ្នាក់ខ្លាំងដល់អ្នកដំណើរលើយន្តហោះទាំងអស់៕