- 2015-01-23 00:24:38
- ព័ត៌មាន
ស្តង់ចំនួន ៣៧ ត្រៀមសម្រាប់ផលិតផលជនជាតិដើមភាគតិចនៅរតនគិរី
- 2015-01-23 00:24:38
- ចំនួនមតិ 0 | ចំនួនចែករំលែក 0
ស្តង់ចំនួន ៣៧ ត្រៀមសម្រាប់ផលិតផលជនជាតិដើមភាគតិចនៅរតនគិរី
ចន្លោះមិនឃើញ
យ៉ាងហោចណាស់ មានស្តង់ចំនួន ៣៧ ត្រៀមសម្រាប់ដាក់តាំងបង្ហាញផលិតផល និង អនុផលព្រៃឈើរបស់ជនជាតិដើមភាគតិច មកពីបណ្ដាស្រុកនានា នៃខេត្តរតនគិរីចាប់ពីថ្ងៃស្អែកនេះ។ នេះបើតាមការលើកឡើងពី លោក យន់ សំណល់។
លោក យន់ សំណល់ មន្ត្រីសម្របសម្រួលថ្នាក់ជាតិ នៃគម្រោង អាណាឌីយ៉ា បាននិយាយថា ការតាំងពិព័រណ៌នេះ ធ្វើឡើងចាប់ពីថ្ងៃទី ២៣-២៥ ខែ មករា។ ពិព័រណ៍មានគោលបំណងជំរុញផលិតផលកសិកម្មរបស់ជនជាតិដើមភាគតិចឲ្យដល់ទីផ្សារ។
ទន្ទឹមនឹងគ្នានេះ ការតាំងបង្ហាញផលិតផល ដើម្បីបង្កើតឲ្យមានការសហការរវាងអង្គការ មន្ទីរកសិកម្ម និង អ្នកភូមិ ធ្វើយ៉ាងណាជំរុញវិស័យកសិកម្មបន្ថែមទៀត ដើម្បីធានានូវសន្តិសុខស្បៀងសម្រាប់ជនជាតិដើម។ ចែករំលែកបទពិសោធន៍រវាងកសិករ និង កសិករដូចគ្នា អំពីរបៀបនៃការដាំដុះ និង ចិញ្ចឹមសត្វ ដែលទទួលបានជោគជ័យ បន្ទាប់ពីគម្រោងបានដំណើរការ ៣ ឆ្នាំ កន្លងមក។
លោក យន់ សំណល់ បាននិយាយទៀតថា ការតាំងពិព័រណ៍ មានការតាំងបង្ហាញផលិតផលកសិកម្ម និង អនុផលព្រៃឈើរបស់បងប្អូនជនដើមភាគតិចមកពីស្រុកចំនួន ៥ រួមមាន ស្រុកអូរជុំ, វ៉ឺនសៃ, លំផាត់, បរកែវ និង ស្រុកអូរយ៉ាដាវ ជាដើម។
ការតាំងពិព័រណ៍នេះ រៀបចំឡើងដោយអង្គការ CEDAC ដោយមានការចូលរួមពីអង្គការដៃគូនានានៅក្នុងខេត្ត ក្រោមជំនួយឧបត្ថម្ភពីសហគមន៍អឺរ៉ុប នៅក្នុងឱកាសនៃសិក្ខាសាលាបិទគម្រោងមានឈ្មោះថា "គម្រោងផ្សព្វផ្សាយបច្ចេកវិទ្យាសមស្រប ដើម្បីបង្កើនសន្តិសុខស្បៀងកសិករក្រីក្រ និង ជនជាតិដើមភាគតិចនៅក្នុងប្រទេសកម្ពុជា និង ប្រទេសឡាវ "ឬហៅថា អាណាឌីយ៉ា"៕
អត្ថបទ៖ សំ ជំនាញ
