- 2015-08-14 18:40:12
- ព័ត៌មាន
យុវតីម្នាក់ ធ្វើវីដេអូបង្ហាញសម្រស់ស្រ្តីខ្មែរតាំងពីបុរាណដល់បច្ចុប្បន្ន
- 2015-08-14 18:40:12
- ចំនួនមតិ 0 | ចំនួនចែករំលែក 0
យុវតីម្នាក់ ធ្វើវីដេអូបង្ហាញសម្រស់ស្រ្តីខ្មែរតាំងពីបុរាណដល់បច្ចុប្បន្ន
ចន្លោះមិនឃើញ
វីដេអូ ប្រហែលជាង២នាទីបង្ហាញពីសម្រស់ស្រ្តីខ្មែរតាំងពីជំនាន់សម័យកាលបុរាណរហូតមកដល់បច្ចុប្បន្ន ធ្វើឲ្យមានការចាប់អារម្មណ៍លើបណ្ដាញសង្គម។ វីដេអូនេះ ធ្វើដោយយុវតីម្នាក់ ដើម្បីផ្សព្វផ្សាយពីសម្រស់ស្ត្រីខ្មែរតាមរយៈតុបតែងខ្លួនតាមសម័យកាលនីមួយៗ។
ឌូ ពុធម៉ូលីតា អ្នកដឹកនាំវីដេអូខាងលើបានប្រាប់ពីគោលបំណងសំខាន់ក្នុងការបង្កើតវីដេអូនេះឡើងគឺចង់ចែករំលែកនិងផ្សព្វផ្សាយទៅដល់បងប្អូនប្រជាពលរដ្ឋខ្មែរជំនាន់ក្រោយរួមទាំងបណ្ដាប្រទេសដទៃទៀតឲ្យបានដឹងពីសម្រស់ដ៏ស្រស់ស្អាតរបស់នារីខ្មែរ។យ៉ាងណាមិញ ម៉ូលីតា និយាយថាវីដេអូនេះមិនបានបង្ហាញគ្រប់ទម្រង់ទាំងអស់នោះទេគឺនៅចន្លោះខ្លះៗព្រោះតែមិនមានឯកសារគ្រប់គ្រាន់។
ចំពោះវីដេអូបែបនេះមានភាពស្រដៀងទៅនឹងវីដេអូបរទេសដែលធ្លាប់បានធ្វើរួចហើយ។ បញ្ហានេះ ម៉ូលីតា ថ្លែងថា នេះជាគំនិតរួមរបស់ពិភពលោកដែលគេធ្វើដើម្បីផ្សព្វផ្សាយពីខ្លួនគេ។ ដោយឡែកនាង ធ្វើដើម្បីចែករំលែក និងផ្សព្វផ្សាយទៅពិភពលោកឲ្យបានយល់ពីអ្វីដែលជាវប្បធម៌ខ្មែរ និងសម្ផស្សនារីខ្មែរតាមសម័យកាលដែរ។
“មានប្រទេសជាច្រើនគេធ្វើពាក់ព័ន្ធនឹងវីដេអូហ្នឹងហើយបង គេធ្វើគឺបង្ហាញពីវប្បធម៌របស់ប្រទេសគេ អីចឹងយើងធ្វើដើម្បីបង្ហាញពីប្រទេសយើងដែរទៅ ណាមួយក៏ចង់ឲ្យមានគេស្គាល់ និងបង្ហាញពីអ្វីដែលជាវប្បធម៌ខ្មែរ"។ ម៉ូលីតា ថ្លែង។
អ្នកដឹកនាំវីដេអូមានស្រុកកំណើតមកពីខេត្តស្ទឹងត្រែងរូបនេះ បានប្រាប់ទៀតថា ពីដំបូងឡើយមិត្តភក្តិនាងបានផ្ញើវីដេអូបរទេសមកឲ្យនាងមើលរួចហើយក៏ចាប់ផ្តើមគិតគូរថានឹងត្រូវធ្វើយ៉ាងណា។ បន្ទាប់មក ម៉ូលីតា ក៏សម្រេចចិត្តថាធ្វើជាវីដេអូមួយបង្ហាញពីប្រវត្តិសាស្រ្តសម្រស់ស្រ្តីខ្មែរតាំងពីពីបុរាណរហូតដល់ឆ្នាំ២០១៥នេះតែម្តង។
ជាមួយគំនិតនេះ នាងជាមួយប្អូនស្រីបានទៅបណ្ណាល័យ ស្រាវជ្រាវថាសម័យនីមួយៗគេស្លៀកពាក់យ៉ាងម៉េច? នាងបានប្រើពេល២អាទិត្យក្នុងការស្វែងរកនូវឯកសារពាក់ព័ន្ធនានា និងចំណាយពេលផលិតជាវីដេអូមួយថ្ងៃពេញ។
លីតា លើកឡើងថា “អូបង...ចំពោះវីដេអូហ្នឹងខ្ញុំធ្វើប្រហែលមានជាង១០ជំនាន់ ទោះជាយ៉ាងណាគង់តែមានកង្វះខាត បើសិនជាប្រិយមិត្តបានឃើញ ថាមានខ្វះសម័យកាលណាមួយ សូមអភ័យទោស និងជួយប្រាប់ខ្ញុំបន្ថែមផង"៕
អត្ថបទ៖ ថា ម៉ាលីដា
