- 2017-01-06 08:20:39
- ព័ត៌មាន
ទឹកជ្រោះព្រះកេសព្រះ ទីកន្លែងដែលភ្ញៀវទេសចរជាតិតិចតួចបានទៅដល់
- 2017-01-06 08:20:39
- ចំនួនមតិ 0 | ចំនួនចែករំលែក 0
ទឹកជ្រោះព្រះកេសព្រះ ទីកន្លែងដែលភ្ញៀវទេសចរជាតិតិចតួចបានទៅដល់
ចន្លោះមិនឃើញ
ស្ថិតនៅចម្ងាយប្រមាណ ១៧គីឡូម៉ែត្រពីក្រុងសែនមនោរម្យនៃខេត្តមណ្ឌលគីរី និងត្រូវដើរដោយថ្មើរជើងកាត់តាមព្រៃភ្នំប្រមាណជា ៧គីឡូម៉ែត្របន្ថែមទៀត ទឹកជ្រោះព្រះកេសព្រះ គឺជាតំបន់ធម្មជាតិដ៏ពិសេសមួយដែលមានភ្ញៀវទេសចរណ៍ជាតិតិចតួចប៉ុណ្ណោះបានទៅដល់។
លោក អាង ចំរុង អ្នកចាត់ការទូទៅនៃម៉ូតែល អរុណរៈ និងជាអ្នកគ្រប់គ្រងមគ្គុទ្ទេសក៍ទេសចរសម្រាប់ភ្ញៀវ បានប្រាប់អោយដឹងថា ទឹកជ្រោះព្រះកេសព្រះ មានទីតាំងស្ថិតនៅភូមិដំរីជាន់ ឃុំសុខដុម នៃខេត្តមណ្ឌលគីរី ដែលជាតំបន់ដាច់ស្រយាលមួយ។
លោកបានបន្តទៀតថា ភាគច្រើនមិនសូវមានភ្ញៀវជាតិទៅកាន់តំបន់នោះទេ គឺមានតែអ្នកដែលចូលចិត្តធ្វើដំណើរផ្សងព្រេង អ្នកបោះជុំរុំ អ្នកថតរូបធម្មជាតិ និង ប្រជាជនដែលរុករកផលពីព្រៃឈើប៉ុណ្ណោះដែលបានទៅដល់ទឹកជ្រោះតំបន់នោះ។ នៅទីនោះ គេអាចទស្សនាដើមឈើធំៗដែលដុះនៅតាមផ្លូវ សត្វបក្សីព្រៃស្អាតៗ ការថតរូបកម្សាន្ត ហើយ ជាពិសេសគឺងូតទឹកជ្រោះដ៏ថ្លាត្រជាក់ផងដែរ។
លោកបានបន្ថែមទៀតថា ទឹកជ្រោះមួយនេះត្រូវបានភ្ញៀវទេសចរបរទេសចាប់អារម្មណ៍មកលេង តាំងពីឆ្នាំ២០០៣មកម្ល៉េះ ប៉ុន្តែក្នុងមួយថ្ងៃៗមានប្រហែលពី៥ ទៅ ២០នាក់ប៉ុណ្ណោះ។ ចំណែកតម្លៃសេវាកម្មសម្រាប់ជូនភ្ញៀវដើរទៅទីនោះវិញគឺ ២០ ដុល្លារក្នុងមួយថ្ងៃ សម្រាប់មគ្គុទ្ទេសក៍ទេសចរម្នាក់៕