- 2017-09-04 04:11:55
- ព័ត៌មាន
យុវជនពិការភ្នែកនិងក្តីប្រាថ្នារៀននៅថ្នាក់ឧត្តមសិក្សា
- 2017-09-04 04:11:55
- ចំនួនមតិ 0 | ចំនួនចែករំលែក 0
យុវជនពិការភ្នែកនិងក្តីប្រាថ្នារៀននៅថ្នាក់ឧត្តមសិក្សា
ចន្លោះមិនឃើញ
យ៉ាង សារូន ជាយុវជនពិការភ្នែកទាំងសងខាងមួយរូបដែលមិនអស់សង្ឃឹមក្នុងជីវិត និងថែមទាំងមានក្តីប្រាថ្នារៀនបន្តនៅមហាវិទ្យាល័យដូចយុវជនដទៃទៀតដែរ។ យ៉ាង សារូន ឆ្នាំនេះមានវ័យ២៣ឆ្នាំ និងជាបេក្ខជនប្រឡងបាក់ឌុប ឆ្នាំនេះផងដែរ។
សារូនមានសង្ឃឹមពី៦០ទៅ៧០ភាគរយថាខ្លួននឹងប្រឡងជាប់ ហើយរំពឹងថាខ្លួននឹងអាចរៀនបន្តនៅសាកលវិទ្យាល័យមួយនៅខេត្តកំពង់ចាម លើមុខវិជ្ជាអក្សរសាស្រ្តខ្មែរ។ តើសារុន នឹងបានថវិកាពីណាដើម្បីផ្គត់ផ្គង់ការសិក្សាបើខ្លួនជាជនពិការភ្នែកទាំងសងខាងបែបនេះ?
សារូន ឲ្យដឹងថាបើសិនជាគាត់ប្រឡងជាប់នោះ គាត់នឹងទទួលបានការជួយឧត្ថម្ភពីអង្គការមួយលើការសិក្សារបស់គាត់រយៈពេលមួយឆ្នាំ។ សម្រាប់ឆ្នាំបន្ទាប់ សារូន រំពឹងលើទំនាញលេងភ្លេងពិណពាទ្យរបស់ខ្លួនដើម្បីរកចំណូលសម្រាប់បន្តកាសិក្សា។
សារូន រៀបរាប់ប្រាប់ Sabay យ៉ាងដូច្នេះទៀតថាៈ «បន្ទាប់ពីខ្ញុំរៀនចំបរិញ្ញាបត្រអក្សរសាស្ត្រខ្មែរ ខ្ញុំនឹងរកការងារធ្វើនៅតាមស្ថាប័នរដ្ឋ ឬឯកជនដែលគេទទួលខ្ញុំជាពិសេសខ្ញុំចង់ប្រឡងធ្វើជាគ្រូបង្រៀនដែរ ហើយខ្ញុំនឹងដាក់ពាក្យបង្រៀននៅសាលា ឬ អង្គការដែលគេបង្រៀនសិស្សពិការភ្នែក ម្យ៉ាងទៀតបើមានឱកាសខ្ញុំនឹងរកដៃគូម្នាក់ទៀតដើម្បីរៀបចំឯកសារសម្រាប់អ្នកពិការដែលជាចំណេះដឹងខ្ញុំខំរៀននៅមហាវិទ្យាល័យ ទុកសម្រាប់អ្នកពិការផ្សេងៗទៀតយកទៅស្រាវជ្រាវបន្ត»។
សារូន ត្រូវបានអង្គការគ្រួសារថ្មី ទទួលយកមកឲ្យសិក្សា និងស្នាក់នៅក្នុងអង្គការនេះតាំងពី សារូន រៀនថ្នាក់ទី១មកម្លេះ។ បច្ចុប្បន្ន សារូន កំពុងរង់ចាំដោយអន្ទះសានូវលទ្ធផលប្រឡងបាក់ឌុប ដោយរំពឹងថានឹងបានលទ្ធផលដូចក្តីប្រាថ្នា។
បើតាមក្រសួងអប់រំ លទ្ធផលប្រឡងបាក់ឌុបនឹងបិទផ្សាយនៅរសៀលថ្ងៃទី១២ ខែកញ្ញា នៅរាជធានីភ្នំពេញ និងខេត្តកណ្តាល និងនៅតាមបណ្តាខេត្តដទៃទៀតនឹងត្រូវបិទផ្សាយនៅថ្ងៃទី១៣ ខែកញ្ញា ឆ្នាំ២០១៧៕
