ក្នុងឱកាសព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីបឆ្នាំនេះមានទូកជិត៣០០​ នឹងចូលរួមប្រណាំងក្នុងរយៈពេល៣ ថ្ងៃ ។ នេះបើតាមប្រសាសន៍លោកប៊ូ ជុំសេរី អនុប្រធានគណៈកម្មការបច្ចេកទេស និងជាប្រធានគណៈមេប្រយោគរៀបចំព្រះរាជពិធីបុណ្យអុំទូក។

លោកបានឱ្យដឹងថា ក្រុមការងារបច្ចេកទេសបានបិទបញ្ជីកាលពីថ្ងៃទី២៣ ខែតុលា កន្លងមកនេះ ដោយមានទូកសរុប ២៧០ទូក ក្នុងនោះចែកចេញជាបីប្រភេទ គឺទូកខ្នាតអន្តរជាតិ ទូកអុំបុរសនារី និងទូកចែវបុរសនារី។

លោកបានបន្ថែមថា កីឡាករ កីឡាការិនី មានប្រមាណជា១ម៉ឺន៤ពាន់នាក់ និងកីឡាករ កីឡាការិនីបម្រុង មានជាង​៣ពាន់នាក់ សរុបប្រមាណ១ម៉ឺន៨ពាន់នាក់ដែលនឹងចូលរួមប្រកួតប្រជែង ក្នុងព្រះរាជពិធីអុំទូកអក អំបុក និងសំពះព្រះខែ នាពេលដ៏ខ្លីខាងមុខនេះ។

អនុប្រធានគណៈកម្មការបច្ចេកទេស និងជាប្រធានគណៈមេប្រយោគរៀបចំព្រះរាជពិធីបុណ្យអុំទូក ឱ្យដឹងទៀតថា ការរៀបចំព្រះរាជពិធីបុណ្យអុំទូក សម្រាប់ឆ្នាំនេះ គឺពុំមានអ្វីជាឧបសគ្គឡើយ ទាំងបញ្ហាអាកាសធាតុ និងកម្ពស់ទឹកគឺក៏ល្អប្រសើរ ដែលអនុញ្ញាតឲ្យ​កីឡាករ កីឡាការិនី បានចូលរួមប្រកួតប្រជែង ជូនភ្ញៀវជាតិ និងអន្តរជាតិ បានទស្សនាកំសាន្ត។ បន្ថែមលើនេះ ដើម្បីឲ្យ​ដំណើរការ នៃព្រះរាជពិធីបុណ្យនេះ ប្រព្រឹត្តទៅដោយរលូននោះ លោក​ថា​ខាងគណៈកម្មការ​បច្ចេកទេស ផ្គូរ​ផ្គង​ទូក ​បានរៀប​ចំទូក តាមលក្ខណៈ​បច្ចេកទេស​ត្រឹមត្រូវ ទៅតាម​ប្រភេទ​ទូក​និមួយៗ​ដែលចូល​រួមប្រគួត​៕​ ​