- 2017-12-13 10:07:48
- ព័ត៌មាន
ឱកាសកម្រមាន មិនចូលរួមច្បាស់ជាស្តាយក្រោយ ក្រសួងរៀបចំពិព័រណ៍គ្រឿងអលង្ការមាសបុរាណខ្មែរ
- 2017-12-13 10:07:48
- ចំនួនមតិ 0 | ចំនួនចែករំលែក 0
ឱកាសកម្រមាន មិនចូលរួមច្បាស់ជាស្តាយក្រោយ ក្រសួងរៀបចំពិព័រណ៍គ្រឿងអលង្ការមាសបុរាណខ្មែរ
ចន្លោះមិនឃើញ
មន្ដ្រីជំនាញរបស់ក្រសួងវប្បធម៌ និងវិចិត្រសិល្បៈ ឲ្យដឹងថា ក្រសួងនឹងរៀបចំការតាំងពិព័រណ៍ពិសេសមួយមានរយៈបីខែនៅសារមន្ទីរជាតិភ្នំពេញ ដើម្បីបង្ហាញពីគ្រឿងអលង្ការដែលទើបទទួលបានពីប្រទេសអង់គ្លេស និងគ្រឿងមាសប្រាក់មួយចំនួនទៀត ជូនដល់សាធារណជនបានទស្សនា។
ថ្លែងនៅក្នុងពិធីប្រគល់ និងទទួល មកុដមាស និងវត្ថុបុរាណមួយចំនួន នៅអាជ្ញាធរជាតិអប្សរា កាលពីថ្ងៃទី១២ ខែធ្នូ ឆ្នាំ២០១៧ លោក គង់ វីរៈ ប្រធាននាយកដ្ឋានសារមន្ទីរនៃក្រសួងវប្បធម៌ ឲ្យដឹងថា ក្រសួងកំពុងប្រមែប្រមូលគ្រឿងអលង្ការដែលធ្វើពីមាស និងប្រាក់ជាច្រើនប្រភេទ មានដូចជាចិញ្ចៀន ក្រវិល និងមកុដជាដើម ដែលមានអាយុកាលចាប់តាំងពីសម័យបុរេប្រវត្តិ ដល់សម័យក្រោយអង្គរ ដាក់តាំងបង្ហាញក្នុងពិព័រណ៍ពិសេសមួយ។
លោកបន្តថាពិព័រណ៍នេះធ្វើឡើងក្រោមប្រធានបទ «ការប្រើប្រាស់មាសនៅក្នុងសិល្បៈខ្មែរ»។ ពិព័រណ៍នេះគ្រោងធ្វើឡើងរយៈពេលបីខែដោយត្រូវសម្ពោធជាផ្លូវការនៅថ្ងៃទី៤ ខែមករា ឆ្នាំ២០១៨ ខាងមុខ នៅសាលពិព័រណ៍មិនអចិន្ដ្រៃយ៍នៃសារមន្ទីរជាតិ។ នេះបើតាមប្រភពដដែល។
លោក គង់ វីរៈ បញ្ជាក់បន្ថែមថាៈ «តាមពិតទៅក្រសួងវប្បធម៌មានគោលដៅសំខាន់ក្នុងការដាក់តាំងបង្ហាញគ្រឿងអលង្ការមាសបំពាក់លើរូបចម្លាក់ ដែលយើងទើបទទួលបានពីប្រទេសអង់គ្លេសជូនដល់មហាជនទស្សនា ប៉ុន្ដែយើងមិនអាចដាក់តាំងតែគ្រឿងអលង្ការតែមួយមុខនោះទេ។ ដូច្នេះហើយទើបយើងខិតខំប្រមែប្រមូលគ្រឿងអលង្ការជាច្រើនមុខទៀតដើម្បីតាំងបង្ហាញរួមគ្នាក្នុងពេលតែមួយ ជាក់ស្ដែងដូចជាគ្រឿងអលង្ការជាភ្នួងសក់មាស មានអាយុកាលតាំងពីស.វទី១២ ដែលយើងទើបទទួលបានពីអាជ្ញាធរអប្សរានេះក៏យើងត្រូវយកទៅបង្ហាញក្នុងពិព័រណ៍នេះដែរ»។
លោកឲ្យដឹងដែរថា គ្រឿងអលង្ការដែលក្រសួងវប្បធម៌ជ្រើសយកមកតាំងពិព័រណ៍មានប្រភពមកពីកំណាយនានានៅក្នុងប្រទេស ជាពិសេសកំណាយនៅភូមិវិហារ និងភូមិបិតមាស ខេត្តព្រៃវែង។
ប្រធាននាយកដ្ឋានសារមន្ទីររូបនេះរំពឹងថា នឹងមានភ្ញៀវជាតិ និងអន្ដរជាតិច្រើនម៉ឺននាក់នឹងចូលទស្សនាពិព័រណ៍គ្រឿងអលង្ការមាសនេះ ព្រោះថាចាប់ពីខែមករាដល់ខែមីនា ជារដូវសម្បូរភ្ញៀវទេសចរ ហើយនេះក៏ជាលើកទីមួយដែរដែលមានការតាំងពិព័រណ៍បែបនេះ៕
