- 2018-05-28 04:36:05
- ស្នេហា
ស្រលាញ់គេម្នាក់ឯងទាំងគ្មានសង្ឃឹមឈឺណាស់! ៥វិធីនេះទើបអាចកាត់ចិត្តពីគេបាន
- 2018-05-28 04:36:05
- ចំនួនមតិ 0 | ចំនួនចែករំលែក 0
ស្រលាញ់គេម្នាក់ឯងទាំងគ្មានសង្ឃឹមឈឺណាស់! ៥វិធីនេះទើបអាចកាត់ចិត្តពីគេបាន
ចន្លោះមិនឃើញ
លួចស្រលាញ់នរណាម្នាក់ ពេលខ្លះអាចជំរុញឲ្យយើងហ៊ានសារភាពប្រាប់គេ នៅពេលដែលគេឲ្យសញ្ញាណាមួយថា គេក៏ចាប់អារម្មណ៍យើងដែរ ហើយក៏អាចជោគជ័យបាន។ តែមួយទៀត គឺការលួចស្រលាញ់នរណាម្នាក់ ដែលគេហាក់នៅឆ្ងាយពីយើង ហើយក៏ដឹងថា វាមិនអាចទៅរួច គ្មានផ្លូវ គ្មានសង្ឃឹម នោះហើយជារឿងដែលលំបាកបំផុត ព្រោះមិនហ៊ានប្រឈមការពិត គឺការពិតដែលគេមិនបានស្រលាញ់យើងវិញទេ។ តទៅនេះសូមបង្ហាញវិធីដកចិត្តពីគេវិញ ដូចខាងក្រោម៖
១. កុំមើលឃើញតែចំណុចល្អរបស់គេពេក
ពេលដែលស្រលាញ់នរណាម្នាក់ងប់ហើយ គឺលែងមើលឃើញពីចំណុចអាក្រក់របស់គេ ក្នុងកែវភ្នែកយើងគេល្អគ្រប់យ៉ាង។ ពេលខ្លះយើងសាកគិតពីចំណុចអាក្រក់របស់គេខ្លះ ក៏អាចសម្រាលចិត្តស្រលាញ់ទៅលើគេបានខ្លះដែរ។ នេះមិនមែនមានន័យថា ប្រែចិត្តស្រលាញ់ទៅស្អប់គេទេ តែមានន័យថា កុំងប់ងុលនឹងគេខ្លាំងពេក ជួនកាលមានមនុស្សល្អជាងគេរាប់ដងទៀត គ្រាន់តែយើងមិនព្រមបើកចិត្តខ្លួនឯង នៅឆ្កួតវង្វេងតែជាមួយមនុស្សម្នាក់ហ្នឹងតែប៉ុណ្ណោះ។
២. បើដឹងថាខ្លួនឯងកំពុងឈឺព្រោះគេហើយ កុំព្យាយាមអោបក្រសោបវាទៀត
ស្រលាញ់គេម្នាក់ឯង វាគឺជាកំហុសរបស់ខ្លួនឯងមួយហើយ ព្រោះគ្មាននរណាមកបង្ខំយើងទេ តែកំហុសធំជាងនេះទៀតនោះ គឺយកខ្លួនឯងទៅត្រាំត្រែងជាមួយរឿងដែលគ្មានសង្ឃឹម បន្តទៅមុខទៀត។ កុំព្យាយាមរំលឹកពីពាក្យសម្ដី កាយវិការ និងអ្វីដែលពាក់ព័ន្ធជាមួយគេពេក ព្រោះវាគ្មានបានអីក្រៅពីស្រក់ទឹកភ្នែកអត់អំពើ។
ព្យាយាមដកខ្លួនចេញពីគេ ដោយងាកមកធ្វើអ្វីដែលនាំយើងសប្បាយចិត្ត ហើយកុំព្យាយាមគិតពីគេ ពេលដែលអារម្មណ៍ធម្មតាហើយកុំព្យាយាម គិតពីគេនាំឲ្យសោកសៅទៀត។ ការឈឺចាប់នឹងអូសបន្លាយកាន់យូរបើនៅតែមិនព្រម ដកគេចេញពីខួរក្បាល តែបើព្យាយាមគិតអ្វីដែលចាំបាច់ជាងគិតពីគេ វាក៏អាចធ្វើឲ្យភ្លេចគេបានទាំងមិនដឹងខ្លួន។
៣. កុំសូវតាមដាន ហើយចង់ដឹងរឿងទាក់ទងនឹងគេទៀត
តើវាមានប្រយោជន៍អ្វី ដែលត្រូវដឹងឮពីគេទៀត ពេលដឹងហើយតើយើងបានអីមកវិញក្រៅពីខូចចិត្ត តូចចិត្ត? តើបំភ្លេចគេបានរបៀបម៉េចបើយើងនៅតែព្យាយាមតាមដាន កកូរកកាយ រឿងដែលពាក់ព័ន្ធនឹងគេរាល់ថ្ងៃបែបនេះ? បើដឹងច្បាស់ថា វាមិនអាចទៅរួចហើយ គួរឈប់ចង់ពាក់ព័ន្ធនឹងគេទៀត គេចង់ទៅណា ធ្វើអ្វីនៅជាមួយអ្នកណា ស្រលាញ់អ្នកណា ឈប់ខ្វល់ទៅ វាគ្មានបានអីត្រឡប់មកវិញទេ។
៤. ព្យាយាមធ្វើអ្វីដែលមានប្រយោជន៍ជាងនេះ
សួរថាបានអីមកវិញ ទើបទៅចំណាយពេលឥតប្រយោជន៍ជាមួយមនុស្ស គ្មានយើងក្នុងបេះដូងគេផង។ គួរចំណាយពេលផ្ដោតលើអ្វីដែលវាសំខាន់សម្រាប់យើងបន្តទៀត ហើយកុំទៅភ័យព្រួយរឿងគូនឹងពេក គង់តែនឹងជួបអ្នកដែលស្រលាញ់យើង ដោយមិនចាំបាច់ហត់ចិត្តទៅឈឺចាប់ផង។ ដកខ្លួនពីភពដ៏ខ្មៅងងឹតនេះ ហើយមកចាប់ផ្ដើមទំព័រជីវិតថ្មី ជួបអ្វីដែលថ្មី អ្វីដែលធ្វើឲ្យយើងរីករាយ ក៏អាចភ្លេចគេបានយ៉ាងងាយ។ ពេលនោះយើងប្រាកដជាហួសចិត្តនឹងខ្លួនឯង ពេលរំលឹកពីអតីតកាលមិនគួរណាឆ្កួតដល់ម្ល៉ឹងសោះ។
៥. ងាកមកក្បែរជាមួយមនុស្សដែលនៅជុំវិញខ្លួនយើងវិញ
ទទួលស្គាល់ថា ពេលឆ្កួតនឹងស្រលាញ់នរណាម្នាក់ហើយ ធ្វើឲ្យយើងភ្លេចគិតពីមនុស្សជុំវិញខ្លួន ដែលសុទ្ធជាមនុស្សល្អៗ។ យើងយល់ថាខ្លួនឯងឯកា គ្មានអ្នកណាសំខាន់ជាង ក្រៅពីគេម្នាក់នោះឡើយ។ តែយើងគួរឈានថយមួយជំហានហើយសួរខ្លួនឯងមុខកញ្ចក់វិញថា បើគេមិនត្រូវការយើងទោះយើងធ្វើល្អ១០០០ដងទៀតក៏គេមើលមិនឃើញដែរ តើយើងបន្តទៀតដើម្បីអី?
គួរក្រឡេកមកមើលគ្រួសារ មិត្តភក្ដិ និងអ្នកនៅជុំវិញខ្លួនយើងជាច្រើនទៀត ដែលត្រូវការយើង ហើយអ្នកទាំងនោះហើយជួយឲ្យយើងលែងខ្វល់ពីម្នាក់នោះបានក្នុងថ្ងៃណាមួយ។ ពេលខ្លះអាចឲ្យយើងគិតថា មិនចាំបាច់មានស្នេហាក៏អាចឲ្យជីវិតយើងរីករាយបានដែរ។
សូមបញ្ជាក់ថា ៥ចំណុចខាងលើនេះ គឺសប្បាយបានធ្វើបទសម្ភាសន៍ជាមួយយុវវ័យធ្លាប់ឆ្លងកាត់បញ្ហានេះ ចំនួន៥រូប។ ពួកគេសុទ្ធតែបានលើកឡើងចំណុចស្រដៀងៗគ្នា ដើម្បីដកចិត្តពីមនុស្សម្នាក់ដែលគ្មានសង្ឃឹម អាចបន្តទៅមុខ។ ៥ចំណុចខាងលើនេះ គឺជាការសម្រិតសម្រាំងមតិជាច្រើនដើម្បីរួមបញ្ចូលគ្នា ក្នុងចែករំលែកដល់ប្រិយមិត្តអ្នកអាន អាចដកស្រង់ជាបទពិសោធន៍បាន៕