- 2019-02-09 03:11:36
- ចរាចរណ៍
សាលារាជធានី ប្រកាសរៀបចំសណ្ដាប់ធ្នាប់ចិញ្ចើមផ្លូវ តាមបណ្ដោយផ្លូវសហព័ន្ធរុស្ស៊ីចាប់ពីផ្លូវព្រះនរោត្តមរហូតដល់មុខអាកាសយានដ្ឋានភ្នំពេញ
- 2019-02-09 03:11:36
- ចំនួនមតិ 0 | ចំនួនចែករំលែក 0
សាលារាជធានី ប្រកាសរៀបចំសណ្ដាប់ធ្នាប់ចិញ្ចើមផ្លូវ តាមបណ្ដោយផ្លូវសហព័ន្ធរុស្ស៊ីចាប់ពីផ្លូវព្រះនរោត្តមរហូតដល់មុខអាកាសយានដ្ឋានភ្នំពេញ
ចន្លោះមិនឃើញ
រដ្ឋបាលរាជធានីភ្នំពេញ នឹងធ្វើការកែលម្អសោភ័ណភាព និងរៀបចំសណ្ដាប់ធ្នាប់នៅលើចិញ្ចើមផ្លូវសាធារណៈសងខាងតាមបណ្ដោយមហាវិថីសហព័ន្ធរុស្ស៊ី ចាប់ពីមហាវិថីព្រះនរោត្ដម ដល់មុខអាកាសយានដ្ឋានអន្តរជាតិភ្នំពេញ។ នេះបើយោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញ ដែលចុះហត្ថលេខាដោយ អភិបាលនៃគណៈអភិបាលរាជធានីភ្នំពេញ ឯកឧត្ដម ឃួង ស្រេង។
សេចក្ដីជូនដំណឹងរបស់រដ្ឋបាលរាជធានីភ្នំពេញ ចុះកាលបរិច្ឆេទថ្ងៃទី ០៨ ខែកុម្ភៈ ឆ្នាំ ២០១៩ បានប្រាប់ ដល់បងប្អូនប្រជាពលរដ្ឋម្ចាស់អាជីវកម្ម និងគ្រប់ស្ថាប័នរដ្ឋ-ឯកជនទាំងអស់ ដែលមានទីតាំងស្ថិតនៅតាមបណ្ដោយមហាវិថីសហព័ន្ធរុស្ស៊ី ចាប់ពីមហាវិថីព្រះនរោត្តមដល់មុខអាកាសយានដ្ឋានអន្តរជាតិភ្នំពេញ ស្ថិតក្នុងខណ្ឌដូនពេញ ខណ្ឌ៧មករា ខណ្ឌទួលគោក ខណ្ឌសែនសុខ និងខណ្ឌពោធិ៍សែនជ័យ រាជធានីភ្នំពេញ ឲ្យបានជម្រាបថា កន្លងមក រដ្ឋបាលរាជធានីភ្នំពេញបានសង្កេតឃើញថា ចិញ្ចើមផ្លូវសាធារណៈសងខាងតាមបណ្ដោយមហាវិថីសហព័ន្ធរុស្ស៊ីចាប់ពីមហាវិថីព្រះនរោត្តមដល់អាកាសយានដ្ឋានភ្នំពេញមានសភាពចាស់ទ្រុឌទ្រោមដោយសារបងប្អូនប្រជាពលរដ្ឋ និងម្ចាស់អាជីវកម្មមួយចំនួនបានប្រើប្រាស់ធ្វើជាទីតាំងលក់ដូរ ធ្វើចរាចរណ៍លើការីឡា និងមួយចំនួនទៀតបានរៀបចំក្រាលការីឡាលក្ខណៈឯកជន និងជួសជុលនៅពេលដែលរងការខូចខាតម្ដងៗដោយខ្លួនឯង មិនស្របតាមបទដ្ឋានបច្ចេកទេស ធ្វើឲ្យចិញ្ចើមផ្លូវមានកម្រិតកម្ពស់មិនស្មើគ្នា បណ្ដាលឲ្យបាត់សោភណភាព ព្រមទាំងប៉ះពាល់ដល់សណ្ដាប់ធ្នាប់សាធារណៈផងដែរ។
ឯកឧត្តម ឃួង ស្រេង បានមានប្រសាសន៍នៅក្នុងលិខិតជូនដំណឹងទៀតថា ដើម្បីកែលម្អសោភ័ណភាព និងរៀបចំសណ្ដាប់ធ្នាប់នៅលើចិញ្ចើមផ្លូវសាធារណៈសងខាងតាមបណ្ដោយមហាវិថីសហព័ន្ធរុស្ស៊ី ចាប់ពី មហាវិថីព្រះនរោត្តមដល់មុខអាកាសយានដ្ឋានអន្តរជាតិភ្នំពេញឲ្យកាន់តែមានភាពទាក់ទាញក្នុងទិសដៅអភិវឌ្ឍន៍រាជធានីភ្នំពេញ ព្រមទាំងអនុលោមតាមបទដ្ឋានបច្ចេកទេសផងនោះរដ្ឋបាលរាជធានីភ្នំពេញនឹងអនុវត្តគម្រោងក្រាលការីឡាថ្មី ការីឡាសម្រាប់ជនពិការនៅលើចិញ្ចើមផ្លូវរៀបចំខឿនចិញ្ចើមផ្លូវ និងខឿនស៊ុំដើមឈើ ចាប់ពីថ្ងៃជូនដំណឹងនេះតទៅ។
អាស្រ័យហេតុនេះ សូមបងប្អូនប្រជាពលរដ្ឋម្ចាស់អាជីវកម្ម និងគ្រប់ស្ថាប័នរដ្ឋ-ឯកជនទាំងអស់ដែលមានទីតាំងចាប់ពីមហាវិថីព្រះនរោត្តមដល់មុខអាកាសយានដ្ឋានអន្តរជាតិភ្នំពេញត្រូវរុះរើសំណង់ទាំងឡាយណាដែលសាងសង់នៅលើចិញ្ចើមផ្លូវសាធារណៈ និងមេត្តាយោគយល់អធ្យាស្រ័យចំពោះការរំខានក្នុងការធ្វើដំណើរចេញ-ចូលគេហដ្ឋាន ឬទីតាំងស្ថាប័ន-ឯកជន ដើម្បីឲ្យការអនុវត្តគម្រោងខាងលើនេះ ដំណើរការទៅដោយរលូនស្របតាមផែនការដែលបានកំណត់ទុក។
សេចក្ដីជូនដំណឹងក៏បានប្រាប់ទៅ ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ រដ្ឋបាលខណ្ឌពាក់ព័ន្ធ មន្ទីរសាធារណការ និងដឹកជញ្ជូនរាជធានីភ្នំពេញ និងមន្ទីរ-អង្គភាពជំនាញពាក់ព័ន្ធត្រូវសហការអនុវត្ត និងសម្របសម្រួលសណ្ដាប់ធ្នាប់ក្នុងការធ្វើចរាចរណ៍លើកំណាត់ផ្លូវខាងលើនេះ ឲ្យទទួលបានប្រសិទ្ធភាពខ្ពស់។
សូមអាន សេចក្ដីជូនដំណឹងទាំងស្រុងខាងក្រោមនេះ៖