នៅពេលសួរថា តើពេលណាយកប្ដី? នារីមួយចំនួននៅលីវរមែងឆ្លើយថា មិនយកប្ដីទេជាតិនេះ ឬមិនដែលគិតទាល់តែសោះ។ តើចម្លើយបែបនេះពិតទេ ? បើពិតមានមូលហេតុអ្វីខ្លះ ដែលនារី មិនចង់បានប្ដី?

ទាក់ទងនឹងបញ្ហាខាងលើនេះ នារីមួយចំនួនបាន និយាយប្រាប់ Sabay ដូចខាងក្រោម៖

រូបភាពតំណាង៖ ប្រភពពី marriagemissions.com

១. ខ្លាចការឈឺចាប់៖ ចម្លើយមិនចង់បានប្ដី ឬមិនចង់គិតពីវាសោះ អាចជាការពិត ព្រោះនារីមួយចំនួន ឃើញមនុស្សប្រុស មួយចំនួនសាវ៉ា ផឹកស៊ី លេងល្បែង មានស្រី ដែលបានបង្ហាញទម្លាប់មិនល្អនេះ លើក្រុមគ្រួសារខ្លួន សាច់ញាតិ ឬ មិត្តភក្ដិ។ មួយទៀតធ្លាប់មានវិបត្តិស្នេហា នៅអំឡុងទំនាក់ទំនងជាដើម។ ទាំងអស់នេះហើយ បានជំរុញឲ្យនារីមួយចំនួន មិនចង់យកប្ដី ឬលែងខ្វល់រឿងនេះតែម្ដង ព្រោះខ្លាចការឈឺចាប់។

២. កតព្វកិច្ចគ្រួសារ៖ អាចជាការពិតនារីខ្លះ គាត់មិនចង់ខ្វល់ខ្វាយរឿងចង់បានប្ដី ព្រោះលះបង់ខ្លួនឯងដើម្បីទំនួលខុសត្រូវគ្រួសារ មើលថែពុក ម៉ែ ឬប្អូនៗ ខណៈគ្រួសារមានជីវភាពខ្វះខាត។ ពួកគេយល់ឃើញថា នៅពេលមានគ្រួសារប្រាកដណាស់ ការជ្រោមជ្រែងគ្រួសាររបស់ខ្លួននឹងថមថយ ដោយងាកគិតតែអភិវឌ្ឍន៍គ្រួសាររបស់ខ្លួនច្រើនជាង ហើយមិនសូវមានពេលមើលពុក ម៉ែ និងប្អូនៗជាដើម។

៣. ទុកពេលអភិវឌ្ឍន៏ខ្លួន៖ មិនមែននារីមិនចង់បានប្ដីនោះទេ ប៉ុន្ដែនារី សម័យថ្មី គឺចង់អភិវឌ្ឍន៏ខ្លួន ព្រោះនៅពេលមានគ្រួសារធ្វើឲ្យជាប់ដៃ-ជាប់ជើង (រវល់តែកិច្ចការផ្ទះ រៀបចំទុកដាក់ បាយ ទឹក សម្ល សម្រាប់ប្ដី និងកូន) ជាដើម។ ពួកគេចង់សិក្សាឲ្យបានខ្ពស់ និង ធ្វើការ រកស៊ី ឲ្យមានចំណូល សមរម្យ ដោយមិនពឹងផ្អែកលើប្ដី។ ក្រុម​នារី​ទាំង​នេះ​ ក៏​មាន​ទស្សនៈ​វែងឆ្ងាយ​លើ​ការ​អភិវឌ្ឈខ្លួន ហើយ​ពួកគេ​ រំពឹង​ថា វ័យ​ចាប់​ពី ៣០ឡើង ទើប​អាច​បើក​ចំហ​បេះដូង ទទួល​យក​បុរស​ក្នុង​ក្ដី​សុបិន​របស់​​ពួកគេ។

៤. សម្លឹងមើលបុរសក្នុងសុបិន៖ នារីមួយចំនួនរមែងឆ្លើយថាមិនចង់បានប្ដី ប៉ុន្ដែមិនមែនមានន័យថាមិនចង់បាននោះទេ ជួនកាលបុរសមួយចំនួនដែលមកក្បែរខ្លួន គឺមិនត្រូវចិត្ត។ ពួកគេរង់ចាំបុរសនៅក្នុងសុបិនមកដល់ ដែលជាទេវបុត្រជិះសេះស ចេះយល់ចិត្ត យល់ថ្លើម និងមានភាពទទួលខុសត្រូវសម្រាប់ខ្លួនឯង និងគ្រួសារ។

៥. កត្តាប្រពៃណី៖ ទំនៀមទំលាប់ខ្មែរ គឺកម្រ ឬគ្មានសោះឡើយនារីសារភាពស្នេហ៍ដាក់បុរស ឬ ប្រាប់គេឯងថាចង់បានប្ដី ដូច្នេះគ្រប់នារី គឺមិនចង់ឆ្លើយរឿងនេះទេ នៅពេលមានគេសួរអំពីរឿងប្ដី ក្រុមស្រ្តីទាំងនោះរមែងឆ្លើយថា មិនចង់បានប្ដីតែម្ដងទៅ ដើម្បីឲ្យឆាប់ចប់។

តើមានកត្តាអ្វីខ្លះទៀតដែលជាអាថ៍កំបាំងរបស់នារី ដែលតែងតែឆ្លើយថា មិនចង់បានប្ដី?

តោះ! ចូលរួមផ្ដល់យោបល់ទាំងអស់គ្នា។