- 2019-11-19 06:53:40
- សេដ្ឋកិច្ច
សហគមន៍ទេសចរណ៍ជាង១០០កន្លែងកំពុងដំណើរការក្នុងចំណោមជាងពីរពាន់
- 2019-11-19 06:53:40
- ចំនួនមតិ 0 | ចំនួនចែករំលែក 0
សហគមន៍ទេសចរណ៍ជាង១០០កន្លែងកំពុងដំណើរការក្នុងចំណោមជាងពីរពាន់
ចន្លោះមិនឃើញ
រដ្ឋមន្ត្រីក្រសួងទេសចរណ៍លើកឡើងថាអេកូទេសចរណ៍ជាសសរស្ដម្ភក្នុងការធានាការអភិវឌ្ឍន៍វិស័យទេសចរណ៍ប្រកបដោយនិរន្តរភាពប៉ុន្តែនៅកម្ពុជាមានតែជាង១០០សហគមន៍ប៉ុណ្ណោះដែលកំពុងដំណើរការ ខណៈនៅលើពិភពលោកកំណើតទេសចរណ៍ប្រភេទនេះកើនឡើង២០ភាគរយជារៀងរាល់ឆ្នាំ។
ថ្លែងក្នុងវេទិកាជាតិអេកូទេសចរណ៍លើកទី១ និង ពិធីប្រកាសដាក់ឲ្យប្រើប្រាស់គោលនយោបាយ ជាតិអេកូទេសចរណ៍ ឆ្នាំ២០១៩-២០៣០ នៅព្រឹកនេះ រដ្ឋមន្ត្រីក្រសួងទេចរណ៍ឯកឧត្តម ថោង ខុន បានលើកឡើងថាក្នុងរយៈពេលប្រាំបួនខែដើមឆ្នាំ២០១៩នេះ កម្ពុជាបានទទួលភ្ញៀវទេសចរបរទេសចំនួន៤,៨លាននាក់ដែលមានកំណើន១០ភាគរយ។
បើតាមឯកឧត្តមរដ្ឋមន្ត្រីកាលពីឆ្នាំកន្លងទៅវិស័យទេសចរណ៍បានផ្ដល់ការងារដោយផ្ទាល់ដល់ប្រជាពលរដ្ឋប្រហែលជា៦សែននាក់ និងដោយប្រយោលរាប់សែននាក់ផ្សេងទៀត។
ឯកឧត្តមបញ្ជាក់ថាអេកូទេសចរណ៍ត្រូវបានគេចាត់ទុកថាជាសសរស្ដម្ភនៃការអភិវឌ្ឍវិស័យទេសចរណ៍ប្រកបដោយនិរន្តរភាព។ ឯកឧត្តមបន្ថែមថា៖ «ដើម្បីជំរុញបង្កើតសហគមន៍ទេសចរណ៍ អេកូទេសចរណ៍ រាជរដ្ឋាភិបាលបានបង្កើតក្រុមការងារអន្តរក្រសួងគ្រប់គ្រងនិងអនុវត្ត...ដែលមានក្រសួងទេសចរណ៍ជាប្រធាន ក្រសួងបរិស្ថានជាអនុប្រធានអចិន្រ្តៃយ៍ និងក្រសួងកសិកម្មជាអនុប្រធាន»។
ឯកឧត្តមបន្ថែមថា៖ «បច្ចុប្បន្នយើងមានសហគមន៍ទេសចរណ៍ជិត២៣០០កន្លែងដែលត្រូវបង្កើតឡើងដែលគ្រប់គ្រងដោយក្រសួងទាំងបី ប៉ុន្តែក្នុងចំណោមសហគមន៍ទាំងនេះមានតែសហគមន៍ទេសចរណ៍តែ១២៥កន្លែងប៉ុណ្ណោះដែលកំពុងមានសកម្មភាពទេសចរណ៍ និងអេកូទេសចរណ៍ ដែលមាន៧៩នៅក្រោមសមត្ថកិច្ចក្រសួងទេសចរណ៍»។
បើតាមក្រសួងទេសចរណ៍វេទិកាជាតិលើកទី១នេះ គឺជាព្រឹត្តិការណ៍ដ៏មានអត្ថន័យជ្រាលជ្រៅ ឆ្លុះបញ្ចាំងឲ្យឃើញពីការយកចិត្តទុកដាក់របស់រាជរដ្ឋាភិបាលក្នុងការអភិវឌ្ឍវិស័យអេកូទេសចរណ៍ និងទេសចរណ៍សហគមន៍។ វេទិកានេះគឺជាការជួបជុំថ្នាក់ជាតិដ៏ធំជាលើកដំបូងរវាងថ្នាក់ដឹកនាំរាជរដ្ឋាភិបាល ក្រសួងស្ថាប័នពាក់ព័ន្ធ ផ្នែកឯកជន តំណាងសហគមន៍ទេសចរណ៍ និងអេកូទេសចរណ៍ទូទាំងប្រទេស អង្គការជាតិ-អន្តរជាតិ និងដៃគូអភិវឌ្ឍន៍នានា ដែលនឹងរួមគ្នាពិភាក្សា ផ្លាស់ប្តូរយោបល់ និងទទួលយកចំណេះដឹងថ្មីៗ និងបទពិសោធន៍ល្អៗក្នុងវិស័យអេកូទេសចរណ៍ និងទេសចរណ៍សហគមន៍៕