- 2018-01-17 07:00:54
- ការអប់រំ
ពិសាម្លូ ស្លា ជាទម្លាប់តពីដូនតា តែវាអាចជាឃាតករលាក់មុខ
- 2018-01-17 07:00:54
- ចំនួនមតិ 0 | ចំនួនចែករំលែក 0
ពិសាម្លូ ស្លា ជាទម្លាប់តពីដូនតា តែវាអាចជាឃាតករលាក់មុខ
ចន្លោះមិនឃើញ
ទម្លាប់ពិសាម្លូ ស្លា របស់ប្រជាពលរដ្ឋខ្មែរវ័យចំណាស់មួយចំនួននៅតែមាននៅឡើយបើទោះបីជាការពិសារបស់ទាំងនេះមានការអះអាងថាអាចប៉ះពាល់ដល់សុខភាពក៏ដោយ តែពួកគាត់ហាក់មិនជឿនោះទេ និងបានបង្ហាញទឡ្ហីករណ៍ផ្សេងទៅវិញ។
ម្យ៉ាងវិញទៀត ទម្លាប់ពិសារឬប្រើប្រាស់ ម្លូ ស្លា នេះក៏ជាផ្នែកមួយនៃអរិយធម៌ខ្មែរដែលគេឃើញមាននៅក្នុងពិធិសែនព្រេនផ្សេងៗ និងពិធីអាពាហ៍ពិពាហ៍ជាដើម។
កំពុងអង្គុយក្រោមផ្ទះជាមួយនឹងកន្រ្តកស្លា ម្លូ ផង អ្នកស្រី សុខ នីម ប្រាប់Sabay ថាអ្នកស្រីចេះទទួលទានស្លាម្លូតាំងពីវ័យ៣០ឆ្នាំមកម្លេះ។ ស្រ្តីវ័យ៥៨ឆ្នាំ ដដែលបន្តថាអ្នកស្រីចេះហូបស្លា ម្លូ នេះតាមម្តាយរបស់អ្នកស្រី។
នៅពេលសួរថាតើអ្នស្រីមិនយល់ថាការពិសាស្លាម្លូនេះធ្វើឲ្យប៉ះពាល់ដល់សុខភាពទេឬយ៉ាងណា? អ្នកស្រី សុខ នីម ហាក់មិនទាន់ឆ្លើយភ្លាមៗទេ ដោយដៃគាត់កំពុងជាប់បៀកកំបោរ ដាក់លើស្លឹកម្លូ មានផ្ទាប់ជាមួយចំណិតស្លាផង រួចដាក់ចូលមាត់ ទើបគាត់មានប្រសាសន៍បន្តថា មិនបារម្ភពីបញ្ហាសុខភាពនោះទេ។ ផ្ទុយទៅវិញអ្នកស្រីថាវាបានជួយឲ្យអ្នកស្រីមានអារម្មណ៍ល្អទៅវិញផង។
អ្នកស្រីបន្ថែមថាៈ « មិនដែលឈឺ ក ឬផ្តាសាយអីទេ...ជាពិសេសធ្វើឲ្យសុខភាពមាត់ធ្មេញកាន់តែ ប្រសើរ... ជាមធ្យមខ្ញុំហូបស្លា ម្លូ ប្រហែលជាប្រាំទៅប្រាំមួយដងក្នុង១ថ្ងៃ...បើហូបបាយរួចមិនបានហូបស្លា១ម៉ាត់...ហាក់ដូចជាខ្វះអ្វីម្យ៉ាង...និយាយទៅដូចមនុស្សញៀនបារីចឹងក្មួយ...ទាល់តែបានហូបទើបមានអារម្មណ៍ស្ងប់ល្អ»។
ទម្លាប់ហូបស្លាម្លូ នេះមិនមែនមានតែនៅប្រទេសកម្ពុជាប៉ុណ្ណោះទេ ក៏មានដែរប្រជាពលនៅប្រទេសក្នុងតំបន់អាស៊ីផ្សេងទៀតដូចជាថៃ វៀតណាម ឡាវ មីយ៉ាន់ម៉ា តៃវ៉ាន់ ប៊ូតាន់ ស្រីលង្ការ និងឥណ្ឌា ជាដើម។
សាស្រ្តាចារ្យបុរាណវិទ្យា និងជាអគ្គនាយករងវិទ្យាស្ថានវប្បធម៌ និងសិល្បៈ នៃរាជបណ្ឌិត្យសភាកម្ពុជា លោក ធុយ ចាន់ធួន លើកឡើងថាប្រពៃណី និងទម្លាប់ហូបស្លាម្លូ របស់ខ្មែរនេះ គឺដូចគ្នាទៅនឹងទម្លាប់របស់ជនជាតិឥណ្ឌាដែរ។ លោកសាស្រ្តាចារ្យឲ្យដឹងថានៅប្រទេសឥណ្ឌាតាំងពីបុរាណកាល រហូតដល់បច្ចុប្បន្ននៅតែមានទម្លាប់ហូប ស្លាម្លូ នេះ និងថាស្លា ម្លូ ក៏ជារបស់សម្រាប់ទទួលភ្ញៀវផងដែរ។ មិនខុសពីឥណ្ឌា ប្រជាជនខ្មែរ លោកថាក៏មានដូចគ្នានូវទម្លាប់បែបនេះ។
បើនិយាយពីការប្រើប្រាស់ម្លូ ស្លា នេះវិញនៅឥណ្ឌា លោកសាស្រ្តាចារ្យថាគេប្រើម្លូ ស្លាដើម្បីថ្វាយដល់ព្រះរបស់ពួកគេ។ បើនិយាយពីកម្ពុជាវិញ ស្លា ម្លូនេះ ត្រូវបានគេប្រើក្នុងពិធីផ្សេងៗដូចជាអាពាហ៍ពិពាហ៍ ជាដើម។ ស្លឹកម្លូ តាមជំនឿលោកថា ជាស្លឹកជ័យមង្គល ជាស្លឹកជោគជ័យ ឬជាស្លឹកមានឫទ្ធិជាដើម ហើយស្លឹកម្លូនេះលោកថាមានដុះតែនៅប្រទេសក្នុងតំបន់អាស៊ីតែប៉ុណ្ណោះ។
លោកប្តថាៈ «អ៊ីចឹងអរិយធម៌ខ្មែរយើងក៏ជាអរិយធម៌មួយដែលប្រតិបត្តិមានជំនឿទៅលើស្លឹកម្លូ ដែលមាននៅក្នុងពិធីអាពាហ៍ពិពាហ៍ មានន័យយ៉ាងម៉េច ម្លូ ស្លា កំបោរ ពេលណាយើងញ៉ាំចូលគ្នាទៅវាមានពណ៌ក្រហម តំណាងឲ្យឈាម...ហើយអរិយធម៌ចិន ស្លា ម្លូ កំបោរ ញ៉ាំចូលគ្នាស្តោះមកក្រហមហ្នឹង គេថាអាហ្នឹងសាច់ឈាមបញ្ចូលគ្នា...បងប្អូនបង្កើត (បងប្អូនថ្លៃ) ប្តីប្រពន្ធ តែរៀបការជាមួយគ្នា វាជាឈាមជ័រជាមួយគ្នា»។
ថ្វីត្បិតតែការទទួលទានស្លា ម្លូ នេះជាផ្នែកមួយនៃប្រពៃណីទំនៀមទម្លាប់របស់ជាតិសាសន៍ជាច្រើនក៏ដោយ អង្គការសុខភាពពិភពលោក (WHO)លើកឡើងថាអ្នកទទួលទានរបស់ទាំងនេះអាចប្រឈមនឹងការកើតជំងឺមហារីកមាត់ ច្រើនជាងអ្នកដែលមិនទទួលទាន។ លើសពីនេះបើទទួលទានស្លា ម្លូ ជាមួយថ្នាំជក់ទៀត នោះភាគរយកើតជំងឺមហារីកមាត់ក៏មានកាន់តែខ្ពស់។
បើតាមការចុះផ្សាយរបស់BBC News កាលពីឆ្នាំ២០១៥ ប្រទេសថៃ ឥណ្ឌា និងតៃវ៉ាន់ជាដើមបានបើកយុទ្ធនាការផ្សព្វផ្សាយកុំឲ្យមានការទទួលទានស្លា ម្លូ នេះ។ ចំពោះតៃវ៉ាន់វិញ ក៏បានផ្តល់ជាប្រាក់ឧបត្ថម្ភខ្លះៗផងដល់កសិករដើម្បីកាប់ដើមស្លាចោល។
សម្រាប់នៅកម្ពុជាវិញ លោក វេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាលឲ្យដឹងដែរថាកន្លងមកក្រសួងបានអប់រំប្រជាពលរដ្ឋខ្មែរអំពីផលប៉ះពាល់មួយចំនួនដែលអាចកើតពីការពិសាស្លា ម្លូ នេះនៅតាមសហគមផងដែរ។ ទោះយ៉ាងណាលោកថាក្រសួងក៏មិនមានជាច្បាប់ ឬគោលនយោបាយណាមួយក្នុងការហាមឃាត់នៅឡើយដែរ ដោយថានេះជាទម្លាប់បស់ពលរដ្ឋខ្មែរជាយូរណាស់មកហើយ។
លោកបន្ថែមថាៈ «យើងត្រឹមតែបាន អប់រំ យើងមិនទាន់បានរកឃើញជាល្ខណៈវិទ្យាសាស្រ្តណាមួយថាការញ៉ាំស្លាម្លូហ្នឹងវាជួយដល់សុខភាពរបស់យើង ឬជួយសុខភាពមាត់ធ្មេញនោះទេ ធម្មតា តែយើងមានចំណីអាហារ ជាប់នៅក្នុងមាត់តែមានការបំលែងទៅជាជាតិអាស៊ីត បាក់តេរី...វាអាចមានឱកាសធ្វើឲ្យខូចធ្មេញ...យើងអប់រំជាសហគមន៍នៅឡើយទេ យើងអប់រំថាវាមិនបានជួយ អ្វីដល់យើងទេ»។
ថ្វីត្បិតតែអ្នកស្រី សុខ នីម មានទម្លាប់ទទួលទានម្លូ ស្លា បែបនេះ មែន តែទម្លាប់នេះមិនបានបន្តទៅកូនៗរបស់អ្នកស្រីទេ ដោយថាកូនៗអ្នកស្រីមិនចូលចិត្តពិសារស្លា ម្លូ ឡើយ។ មួយវិញទៀត អ្នកស្រី ក៏សង្កេតឃើញដែរថាចំនួនអ្នកចេះទទួលទានស្លា ម្លូ នៅក្នុងភូមិអ្នកស្រីក៏មិនសូវមានច្រើនដែរ។ មិនសូវមានច្រើន ដោយសារថា មកពីអ្នកចេះពិសាបានថយចុះ ឯក្មេងៗជំនាន់ក្រោយមិនចូលចិត្តទទួលទានទៀត៕
