៦យ៉ាងប្រុសៗ គួរធ្វើឲ្យអស់តាមចិត្តខ្លួនឯងសិន ចាំគិតគូររឿងរកប្រពន្ធ

2018-12-03 03:11:45
ស្នេហា

2018-12-03 03:11:45
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សម្នាក់ៗ មានការរៀបចំផែនការជីវិតផ្សេងៗពីគ្នា អាស្រ័យទៅលើស្ថានភាពជាក់ស្ដែងរបស់ពួកគេ។ អ្នកខ្លះបញ្ចប់ភាពនៅលីវរបស់ខ្លួន ទាំងមិនអស់ចិត្ត ព្រោះដោយសារហេតុផលណាមួយបង្ខំឲ្យជ្រើសរើស ជួនកាលក៏ជ្រើសរើសដោយពេញចិត្ត តែក្រោយរៀបការហើយ មានអ្នកខ្លះស្រណោះជីវិតកាលនៅលីវ មិនបានធ្វើអ្វីដើម្បីខ្លួនឯង។ ខាងក្រោមនេះ ជាគំនិតមួយជ្រុងអំពីរឿងមួយចំនួនប្រុសៗ គួរធ្វើឲ្យអស់ចិត្តសិន ចាំរៀបការ៖

រូបតំណាង

១. បើចិត្តនៅស្រលាញ់រឿងរៀនត្រូវរៀនបន្ថែមទៀត

បញ្ចប់ថ្នាក់បរិញ្ញាបត្រ មានការងារធ្វើ គឺតែងតែត្រូវបានឪពុកម្ដាយសួរ «កាលណាបានកូនគិតចង់យកប្រពន្ធ»? តែប្រសិនបើក្នុងចិត្តនៅចង់រៀនបន្តដូចជាថ្នាក់អនុបណ្ឌិត បណ្ឌិត ឬជំនាញអ្វីផ្សេងៗក៏រៀនឲ្យចប់សិនទៅ។ ព្រោះថា ពេលមានប្រពន្ធ មានកូន ទោះជាចង់រៀនក៏ពិបាកលៃលកពេល ម្យ៉ាងទៀតលុយកាក់ក៏ត្រូវសន្សំទក ដើម្បីកូន ឬប្រពន្ធ ជួនកាលលែងមានឱកាសបំពេញតាមក្ដីស្រមៃរបស់ខ្លួនឯង។

២. ប្រើសមត្ថភាពសាកល្បងការងារឲ្យបានច្រើន រហូតរកកន្លែងមួយដែលគិតថាស័ក្ដិសម

ពេលជីវិតយើងនៅលីវ មានតែខ្លួនមួយ គ្មានអីត្រូវខ្វល់រឿងចិញ្ចឹមកូនក្រមុំគេ។ ដូច្នេះយើងចង់ដូរការងារប៉ុន្មានដងក៏មិនអី ទោះជាធ្លាក់ប្រាក់ចំណូលក៏មានតែខ្លួនមួយ បែបនេះហើយទើបយើងមានឱកាសច្រើន ក្នុងការប្រឡូករឿងជីវិតការងារឲ្យអស់ចិត្ត រហូតទទួលបានតំណែង និងប្រាក់ខែមួយដែលយើងគិតថាស័ក្ដិសម។ ពេលនោះ យើងអាចមានលំនឹង ចង់បានបង្កើតគ្រួសារមួយ មិនសូវព្រួយបារម្ភពីរឿងការងារ និងប្រាក់ចំណូល។

រូបតំណាង

៣. ប្រើជីវិតនៅលីវជាមួយមិត្តភក្ដិល្អៗ សាងអនុស្សាវរីយ៍ជាមួយគ្នាឲ្យអស់ចិត្តសិន

ត្រូវដឹងថា ពេលរៀបការ មិត្តភាពក៏កាន់តែឃ្លាតឆ្ងាយ ម្នាក់ៗត្រូវខិតខំ ដើម្បីប្រពន្ធកូនរៀងខ្លួន។ ដូច្នេះមានតែពេលជីវិតនៅលីវ ពេលនៅសិក្សាជាមួយគ្នានេះហើយ ជាពេលវេលាដ៏ល្អបំផុត ដើម្បីសាងរឿងល្អៗជាមួយគ្នា។ ប្រសិនបើមិនទាន់ដាច់ចិត្តពីមិត្តភក្ដិ នៅស្ដាយភាពសប្បាយរីករាយនៅឡើយ កុំទាន់ដាក់សម្ពាធខ្លួនឯងទៅរកប្រពន្ធ គួរធ្វើតាមបេះដូង និងចិត្តសិន រហូតគិតថាដល់ពេលវេលាស័ក្ដិសម នោះចាំគិតគូរពីជីវិតគ្រួសារ។

៤. ធ្វើដំណើរកម្សាន្តកន្លែងដែលខ្លួនឯងប្រាថ្នាឲ្យអស់ទៅ

ធ្វើដំណើរកម្សាន្តជាមួយជីវិតនៅលីវ និងមានគ្រួសារគឺមានលក្ខណៈខុសគ្នា ហើយភាពសប្បាយរីករាយក៏មានផ្សេងគ្នា។ ទាន់នៅមានក្មេង ពេលមានលុយ ចង់ទៅណាក៏ទៅចុះ តាមក្ដីប្រាថ្នា ផ្ដល់សុភមង្គលឲ្យខ្លួនឯង បង្កើតការចងចាំល្អៗ ធ្វើឲ្យជីវិតនៅម្នាក់ឯងពោរពេញដោយស្នាមញញឹម និងក្ដីសុខ។ ដូចនេះ ទោះជាយើងបញ្ចប់ភាពនៅលីវ ក៏មិនស្ដាយក្រោយនឹងជីវិតកាលយើងនៅម្នាក់ឯង ហើយយើងងាកមកសាងរឿងថ្មីមួយបែបផ្សេងទៀត ជាមួយមនុស្សដែលខ្លួនស្រលាញ់។

រូបតំណាង

៥. ទិញរបស់ដែលចាំបាច់ និងអ្វីដែលគិតថាសំខាន់សម្រាប់ខ្លួនឯងឲ្យអស់ចិត្ត

របស់ដែលគិតថាសំខាន់សម្រាប់ខ្លួនឯង មិនថារថយន្ត ម៉ូតូ ឡាន ទូរសព្ទទំនើប និងសម្ភារៈផ្សេងទៀត ប្រសិនបើចង់បាន គឺមានតែជីវិតនៅលីវនេះហើយ ជាឱកាសដ៏ល្អបំផុត។ ត្រូវចាំថាពេលរៀបការហើយ ទោះជាយើងមានប្រាក់ចំណូលផ្ទាល់ខ្លួនពិតមែន មិនមែនមានន័យថាចង់អីស្រេចតែចិត្តឡើយ គឺត្រូវពិភាក្សាជាមួយភរិយាសិន ជួនកាលរបស់នោះអាចមិនបានទិញ បើម្នាក់ទៀតមិនឯកភាព។

៦. ជួយដល់គ្រួសារសិនបើមានលទ្ធភាព

ពេលរៀបការហើយ មិនមែនមានតែឪពុកម្ដាយរបស់ខ្លួនឯងទេ គឺមានឪពុកម្ដាយក្មេកបន្ថែមទៀត ហើយមិនមានតែសាច់ញាតិខ្លួនឯងទេ គឺមានសាច់ញាតិខាងស្រីដែរ។ ក្រោយរៀបការហើយ អាចនិយាយបានថា មិនអាចជួយតែគ្រួសារខាងខ្លួនទេ គឺត្រូវយកចិត្តទុកដាក់ទាំងសងខាង បែបនេះហើយ ទើបលែងមានឱកាសធ្វើអ្វីៗ ដើម្បីឪពុកម្ដាយ។

ពេលមានលទ្ធភាពគ្រប់គ្រាន់ ប្រសិនបើអាចគួរតបស្នងទៅកាន់ឪពុកម្ដាយសិននូវអ្វីដែលយើងគិតថា សំខាន់សម្រាប់លោក រហូតដល់គិតថាល្មមដល់ពេលគិតពីខ្លួនឯង ចាំគិតគូរក៏មិនហួសពេល៕

អត្ថបទ៖ រាជ ប្រភព៖ គម្ពីស្នេហ៍