- 2019-05-09 10:40:31
- សុខភាព
ចៃដន្យហូបចំសាច់ជ្រូកដែលកើតជំងឺប៉េស្តជ្រូកអាហ្វ្រិក អ្នកហូបមានបញ្ហាសុខភាពទេ?
- 2019-05-09 10:40:31
- ចំនួនមតិ 0 | ចំនួនចែករំលែក 0
ចៃដន្យហូបចំសាច់ជ្រូកដែលកើតជំងឺប៉េស្តជ្រូកអាហ្វ្រិក អ្នកហូបមានបញ្ហាសុខភាពទេ?
ចន្លោះមិនឃើញ
បច្ចុប្បន្នជំងឺប៉េស្តជ្រូកអាហ្វ្រិកបានកើតមាននៅប្រទេសចិន វៀតណាម និងនៅក្នុងខេត្តរតនគិរីនៃប្រទេសកម្ពុជាផងដែរ។ ទោះយ៉ាងណាជំងឺនេះត្រូវបានអ្នកជំនាញអះអាងថាមិនបង្កផលប៉ះពាល់ដល់ខុសភាពមនុស្សនោះទេ ប៉ុន្តែប៉ះពាល់ផ្នែកសេដ្ឋកិច្ច និងសង្គម ។
នៅថ្ងៃទី០៩ ខែឧសភានេះ ក្រុមហ៊ុន ស៊ី.ភី. ខេមបូឌា ចំកាត់ បានរៀបចំកម្មវិធីសិក្ខាសិលាពីជំងឺប៉េស្តជ្រូកអាហ្រិ្វកក្រោមប្រធានបទ «ចិញ្ចឹមជ្រូកបាន បើយល់ដឹងពី ជំងឺប៉េស្តជ្រូកអាហ្រិ្វក (ASF)» នៅសណ្ឋាគារហ្គោដិន ស៊ីធី ភ្នំពេញ ក្នុងគោលបំណងផ្សព្វផ្សាយលើការយល់ដឹងពីស្ថានភាពនៃជំងឺប៉េស្តជ្រូកអាហ្រិ្វក (ASF) ផលប៉ះពាល់ ការប្រុងប្រយ័ត្ន និងការការពារការរាតត្បាតពីជំងឺប៉េស្តជ្រូកអាហ្រ្វិក។
កម្វិធីនេះមានអ្នកចូលរួមដូចជាមន្រ្តីជំនាញនៃអគ្គនាយកដ្ឋានសុខភាពសត្វនិងផលិតកម្មសត្វ អង្គការស្បៀងអាហារនិងកសិកម្ម(FAO) ព្រឹទ្ធបុរសមហាវិទ្យាល័យវិទ្យាសាស្រ្តសត្វ នៃសកលវិទ្យាល័យជូឡាឡុងកន (Chulalongkorn)ប្រទេសថៃ ម្ចាស់កសិដ្ឋានចិញ្ចឹមសត្វឯកជន កសិករមកពីខេត្តនានា និងដៃគូអាជីវកម្មដែលសហការជាមួយក្រុមហ៊ុនស៊ី.ភី ខេមបូឌាជាដើម។
លោកវេជ្ជបណ្ឌិត Roongroje Thanawongnuwech ព្រឹទ្ធបុរសមហាវិទ្យាល័យវិទ្យាសាស្រ្តសត្វ នៃសាកលវិទ្យាល័យជូឡាឡុងកន មានប្រសាសន៍ថាជំងឺប៉េស្តជ្រូកអាហ្រិ្វក ត្រូវបានរាតត្បាតពីប្រទេសអាហ្វ្រិក ទៅដល់អឺរ៉ុប និងអាស៊ី ហើយជំងឺនេះអាចបង្ករជាបញ្ហាចោទលើផ្នែកសេដ្ឋកិច្ច និងសង្គម ប្រសិនបើគ្មានការទប់ស្កាត់ទាន់ពេលវេលា។ លោកបន្តថាជំងឺនេះ ជាជំងឺដែលបង្កដោយវីរុសដែលធន់នឹងបរិយាកាសខាងក្រៅ វានៅក្នុងលាមកសត្វ កាកសំនល់អាហារ សម្លៀកបំពាក់ និងអាចជាប់នៅនឹងយានយន្តជាដើម។
លោកឲ្យដឹងដែរថាស្ថានភាពជំងឺនេះមានរាតត្បាតនៅប្រទេសចិន និងប្រទេសវៀតណាមជាដើម។ សម្រាប់នៅកម្ពុជាវិញក្រសួងកសិកម្មបានឲ្យដឹងកន្លងមកថាជំងឺនេះក៏មានកើតនៅខេត្តរតនគិរីដែរ។ ការរកឃើញនេះគឺមានកើតនៅលើជ្រូកដែលចិញ្ចឹមជាលក្ខណៈគ្រួសារ ប៉ុន្តែទាំងស្ថាប័នរដ្ឋនិងអង្គភាពឯកជនបានគ្រប់គ្រងស្ថានភាពជំងឺនេះទាន់ពេលវេលា។
បើតាមលោកវេជ្ជបណ្ឌិត ក្នុងករណីចៃដន្យណាមួយប្រជាពលរដ្ឋបានទទួលទានប៉ះសាច់ជ្រូកដែលជាជ្រូកកើតជំងឺប៉េស្តជ្រូកអាហ្វ្រិកនេះក៏មិនមានបញ្ហាសុខភាពដែរ ដោយថាជំងឺនេះមិនចម្លងមកមនុស្សទេ។ លោកឲ្យដឹងថាបើមនុស្សទទួលទានចំណីអាហារណាមានផ្ទុកមេរោគជំងឺនេះវាមិនប៉ះពាល់ខុសភាពមនុស្សទេ តែកាលសំណល់អាហារទាំងនោះនឹងចម្លងជំងឺទៅជ្រូកបើកជ្រូកបានស៊ី ឬប៉ះជាមួយកាកសំណល់អាហារនោះ។
លោកវេជ្ជបណ្ឌិត Roongroje ក៏បានលើកឡើងថា៖ «ខ្ញុំសូមលើកទឹកចិត្តឱ្យអ្នកពាក់ព័ន្ធ ទាំង មន្រ្តីជំនាញក្នុងជួរដ្ឋាភិបាល ស្ថាប័នឯកជន ម្ចាស់កសិដ្ឋាន និងកសិករទាំងអស់ ចូលរួមទប់ស្កាត់ និងកម្ចាត់ការរាលដាលពីជំងឺប៉េស្តជ្រូកអាហ្រិ្វក (African Swine Fever) នេះ ហើយចូលរួមផងដែរ ក្នុងរាយការណ៍លើការសង្ស័យណាមួយនៃជំងឺទៅមន្ត្រីជំនាញ នៅស្ថាប័នរដ្ឋ អង្គការ និង ឯកជនដែលកំពុងធ្វើការលើបញ្ហានេះ»។
សម្រាប់លោក គុជ សុខគ្រុយ ជាម្ចាស់កសិដ្ឋានចិញ្ចឹមជ្រូកនៅខេត្តកណ្តាលបាននិយាយថា សិក្ខាសាលានេះបានផ្តល់ចំណេះដឹងពីជំងឺប៉េស្តជ្រូកអាហ្រិ្វក (ASF) និងវិធីបង្ការមេរោគនេះកុំឱ្យឆ្លងរាលដាលពីជ្រូកមួយទៅជ្រូកមួយទៀត។ ទោះបីជាមានជំងឺនេះ កើតមានឡើងនៅលើសត្វជ្រូក ប៉ុន្តែលោកថាវាមិនអាចចម្លងដល់មនុស្សទេ ដែលជាហេតុធ្វើឱ្យរូបលោកនៅតែបន្តការចិញ្ចឹមសត្វជ្រូក និងលើកទឹកចិត្តដល់កសិករដទៃទៀតបន្តចិញ្ចឹម។ ជាមួយគ្នានេះដែរ លោក និន បូរ៉ា ជាម្ចាស់កសិដ្ឋាននៅខេត្តតាកែវ បានឲ្យដឹងថា៖ «ខ្ញុំទទួលបានចំណេះដឹងស៊ីជម្រៅជាងមុនអំពីជំងឺប៉េស្តជ្រូកអាហ្រិ្វកនេះ និងបានស្រាយចម្ងល់មួយចំនួន និងទទួលបានចំណេះដឹងក្នុងការសង្កេតមើលស្ថានភាពជំងឺ និងវិធីបង្ការជាដើម»។
ដោយសារជំងឺប៉េស្តជ្រូកអាហ្រ្វិក ជាជំងឺដែលឆ្លងរាលដាលទៅលើសត្វជ្រូក ហើយមេរោគនេះរស់នៅជុំវិញបរិស្ថានបានយូរ ជំងឺនេះអាចឆ្លងតាមរយៈការប៉ះពាល់សំបោរ ទឹកមាត់ ទឹកភ្នែក ទឹកនោម និងលាមកជ្រូកមានជំងឺ តាមរយៈការដកដង្ហើមចូលដែលមានមេរោគក្នុងខ្យល់ ការស៊ីចំណីដែលជាកាកសំណល់ផ្ទះបាយដែលមានមេរោគ ហើយជ្រូកព្រៃក៏ជាភ្នាក់ងារចម្លងជំងឺបាន តែវាមិនបង្ហាញអាការៈជំងឺឲ្យឃើញនោះទេ។ ជាមួយគ្នានេះ ដែរមេរោគនេះក៏អាចតោងជាប់នៅជាមួយយានយន្ត សម្លៀកបំពាក់ដែលបានប្រើប្រាក់ក្នុងតំបន់មានមេរោគនេះ។
លោកវេជ្ជបណ្ឌិត Roongroje បានបន្ថែមថា មធ្យោបាយដ៏ល្អបំផុតក្នុងការបង្ការជំងឺនេះ ប្រជាជនត្រូវស្វែងយល់ឲ្យបានច្បាស់ពីការគ្រប់គ្រងផ្នែកបច្ចេកទេស ដឹងពីរបៀបបង្ការក្នុងការអនុវត្តតាមជីវៈសុវត្ថិភាពរបស់កសិដ្ឋាន និងសហការផ្តល់ព័ត៌មានដល់ភ្នាក់ងារសុខភាពសត្វ។
ចំពោះអាការៈជំងឺនេះគឺ ជ្រូកមានកម្តៅខ្ពស់ ស្បែកឡើងក្រហមមានកន្ទួលឈាមហើយមានស្នាមជាំលើស្លឹកត្រចៀក ពោះ និងជើងក្រោយ មានអាការៈពិបាកក្នុងការដកដង្ហើម បញ្ហារខាងប្រព័ន្ធរំលាយអាហារ លាមករាកមានលាយឈាម ជ្រូកមានការរលូតកូន ឬកូនកើតមកភ្លាមងាប់ភ្លាម និងជ្រូកអាចងាប់ភ្លាមៗដោយមិនមានរោគសញ្ញាអ្វីទំាងអស់។
គួរបញ្ជាក់ដែរថា ប្រសិនបើសត្វជ្រូកឆ្លងជំងឺប៉េស្តជ្រូកអាហ្រ្វិក នឹងធ្វើឱ្យសត្វជ្រូកងាប់ជាច្រើន(អាចនឹងមានអាត្រាងាប់១០០ភាគរយ) ដែលជំងឺនេះមិនទាន់មានវ៉ាក់សាំង និងវិធីព្យាបាលនៅឡើយទេ ប៉ុន្តែវាជាជំងឺដែលមិនឆ្លងទៅមនុស្ស៕
