- 2019-07-11 07:26:30
- ការអប់រំ
អតីតបេក្ខភាពគណិតវិទ្យាអូឡាំព្យា៖ ចង់បាននិទ្ទេសល្អពេលប្រលងបាក់ឌុប គឺត្រូវខំរៀន
- 2019-07-11 07:26:30
- ចំនួនមតិ 0 | ចំនួនចែករំលែក 0
អតីតបេក្ខភាពគណិតវិទ្យាអូឡាំព្យា៖ ចង់បាននិទ្ទេសល្អពេលប្រលងបាក់ឌុប គឺត្រូវខំរៀន
ចន្លោះមិនឃើញ
«ចង់បាននិទ្ទេសល្អមែនទេ? ចម្លើយងាយណាស់គឺ ខំរៀន។ ខំហើយមែនទេ តែមិនទាន់បានផល? អ៊ីចឹងសំនួរសំខាន់បន្ទាប់គឺ តើខំរៀនរបៀបណា? តើខំរៀនយ៉ាងណាឱ្យមានប្រសិទ្ធភាព?» នេះជាទ្រឹស្ដីរបស់អតីតបេក្ខភាពគណិតវិទ្យាអូឡាំព្យាឆ្នាំ ២០១៦។
ជានិស្សិតឆ្នាំទី ៣ ឯកទេសគណិតវិទ្យា នៃសាកលវិទ្យាល័យ ភូមិន្ទភ្នំពេញ សារ៉ែន សុទ្ធា បានប្រាប់ពីវិធីសាស្ត្រមួយចំនួន ដើម្បីជួយដល់សិស្សប្អូនទី ១២ ទាំងអស់ ក្នុងការប្រលងបាក់ឌុប ថែមទាំងបកស្រាយពីបញ្ហា ដែលសិស្សវិទ្យាល័យមួយចំនួន ខិតខំប្រឹងរៀនតែបែរជាមិនបានលទ្ធផលល្អ។
សុទ្ធានិយាយថា ៖ «ធម្មតាសិស្សភាគច្រើនគាត់ដឹងតា៎ខំរៀនហើយ អ្នកខ្លះខំទៅបានផល ហើយអ្នកខ្លះទៀតខំទៅក៏អត់បានផល អ៊ីចឹងសម្រាប់អ្នកដែលខំហើយ អត់បានផល គឺត្រូវចាប់ផ្ដើមពិនិត្យឡើងវិញ មើលការរៀន។ របៀបរៀនរបស់យើង បានន័យថាត្រូវផ្លាស់ប្តូរបៀបរៀន មិនមែនខំរៀនតាមរបៀបដដែលៗនោះទេ គឺត្រូវផ្លាស់ប្ដូរវិធីសាស្ត្រ និងបែបផែនទិសដៅរបស់យើង»។
ចំពោះបញ្ហារៀនត្រៀមយកនិទ្ទេសល្អ ពេលប្រលងបាក់ឌុប និស្សិតគណិតវិទ្យារូបនេះ បានបញ្ជាក់ថា ការរៀនត្រៀមមិនមែនសំដៅតែការរៀនគួរតែប៉ុណ្ណោះនោះទេ ប៉ុន្តែសិស្សទី១២ គួររៀនមេរៀន និងធ្វើលំហាត់ដោយខ្លួនឯងផងដែរ លើមុខវិជ្ជាសំខាន់ៗដូចជា គណិត រូប គីមី ជីវៈ និង អក្សរសាស្ត្រខ្មែរជាដើម។
យុវជនម្នាក់នេះបន្ថែមទៀតថា កុំរៀនអោយឆាប់ចប់ តែត្រូវរៀនអោយយល់។ ពេលយល់មេរៀន ខួរក្បាលយើងអាចចាំបានយូរជាងការទន្ទេញ។ ហើយក៏មិនគួរទន្ទេញអោយចាំទាំងមិនយល់មេរៀននោះដែរ។ បើមិនយល់ ត្រូវសួរគ្រូ ឬមិត្តភ័ក្ដិ ព្រោះនៅពេលយើងបៀមទុកសំនួរ វាធ្វើអោយចម្ងល់យើង កើនឡើងបន្តិចម្ដងៗ រហូតគរដូចភ្នំ ហើយនៅពេលជិតប្រឡង វាអាចធ្វើអោយយើងស្រ្តេស ភ័យ និង ធ្លាក់ខ្លួនឈឺ មុន ឬ ក្នុងពេល ប្រឡងបាក់ឌុប។
ក្រៅពីនេះ លោកក៏បានដាស់តឿន សិស្សទី ១២ ទាំងអស់ឱ្យធ្វើតេស្តសមត្ថភាពខ្លួនឯងជាប្រចាំ មួយមេរៀនម្ដងៗ ឬមួយអាទិត្យម្ដងៗ ធ្វើលំហាត់អោយបានច្រើន និងរៀនបន្ថែម លើចំណុចដែលខ្វះខាត។
លោកបន្តថា៖ «គួរប្រមូលឯកសារមេរៀន រូបមន្ត លំហាត់ និងវិញ្ញាសាប្រឡងមុនៗទុក ហើយភាគច្រើនអាចរកបាន free free តាមអ៊ីនធឺណិត និង App ផ្សេងៗ»។
ទោះបីជា អតីតសិស្សនិទ្ទេស A ឆ្នាំ ២០១៦ ម្នាក់នេះ បានណែនាំឱ្យសិស្សប្អូនទាំងអស់ខិតខំរៀន តែក៏ដាស់តឿនដល់ប្អូនៗទាំងអស់ មិនគួររៀនរហូតភ្លេចបាយ ភ្លេចទឹកនោះទេ! ហើយត្រូវគេង សម្រាក និងកម្សាន្តអោយបានគ្រប់គ្រាន់ ដើម្បីជាជំនួយដល់ការសិក្សា ព្រោះពេលយើងសម្រាក និងសប្បាយចិត្ត ខួរក្បាលក៏ដំណើរការបានល្អផងដែរ៕