មូលហេតុ ៨យ៉ាងនេះហើយដែលធ្វើឲ្យអ្នកចេះតែឃ្លានមិនឈប់

2019-07-31 00:30:00
សុខភាព

2019-07-31 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកអ្នកធ្លាប់ជួបបញ្ហារឿងឃ្លានចេះតែចង់នេះចង់នោះគ្រប់ពេលទេ? ពេលខ្លះទើបតែបាយហើយសោះ នឹកចង់បង្អែម ចង់នំទំពារលេងនេះនោះជាដើម។ ទម្លាប់ទាំងនេះហើយដែលធ្វើឲ្យទម្ងន់របស់លោកអ្នកចេះតែឡើងដោយមិនដឹងខ្លួន។

១. ជាតិអាល់កុល

ជឿថាអ្នកខ្លះឲ្យតែរាងស្រវឹងតិចៗគឺឃ្លានហើយ មិនថាញ៉ាំស្រាប្រភេទណានោះទេ។ ពេលលោកអ្នកទទួលទានជាតិអាល់កុលចូលទៅ រាងកាយរបស់យើងនឹងបញ្ចេញសារជាតិម្យ៉ាងដែលធ្វើឲ្យយើងឃ្លានភ្លាម។ លោកស្រី Suzanne Dixon អ្នកជំនាញផ្នែកចំណីអាហារពេលដែលមនុស្សយើងញ៉ាំបាយរួចរាល់ហើយ ខួរក្បាលនឹងបញ្ជាប្រាប់រាងកាយយើងថា មិនចាំបាច់ញ៉ាំអ្វីទៀតទេ។ តែពេលមានជាតិអាល់កុលចូលខ្លួនហើយ វានឹងធ្វើឲ្យរាងកាយយើងចង់ញ៉ាំអ្វីម្យ៉ាងម្ដងទៀត។

២. ខ្វះជាតិទឹកក្នុងខ្លួន

បើសិនលោកអ្នកចេះតែឃ្លានគ្រប់ពេល វាអាចមកពីរាងកាយរបស់លោកអ្នកខ្វះជាតិទឹកនោះឯង។ បើសិនមានអាការៈឃ្លាន សូមសាកល្បងពិសាទឹកមួយកែវ ហើយរង់ចាំមើល ១៥នាទីក្រោយពីនោះ ថាតើលោកអ្នកនៅតែឃ្លានទៀតដែរឬទេ?

៣. បង្អត់អាហារហួសកម្រិត

ការដែលលោកអ្នកព្យាយាមគ្រប់គ្រងរបបអាហារខ្លាំងពេក ក៏អាចធ្វើឲ្យរាងកាយលោកអ្នកហេវហត់គ្រប់ពេលវេលាបានដែរ។ អាហារខ្លះពេលញ៉ាំចូលទៅមិននឹងពោះ ហើយក៏មិនបានផ្ដល់ថាមពលគ្រប់គ្រាន់ឲ្យយើងដែរ ដូចនេះលោកអ្នកគួរព្យាយាមបន្ថយបន្តិចម្ដងៗវិញប្រសើរជាង។

៤. គេងមិនគ្រប់

ជាហេតុផលងាយៗដែលជាដើមហេតុស្ទើរគ្រប់បញ្ហាសុខភាព។ ការគេងមិនលក់ គេងមិនគ្រប់គ្រាន់ផ្ដល់ផលអាក្រក់ដល់សុខភាពយ៉ាងច្រើន ជាពិសេសបញ្ហាដល់ដំណើរអរម៉ូនរបស់លោកអ្នកនោះឯង។

៥. មិនញ៉ាំអាហារពេលព្រឹក

មានការជជែកវែកញែកជាច្រើនថា អាហារពេលព្រឹកពិតជាចំបាច់ឬអត់ទេ តែអ្នកជំនាញជាច្រើននាក់នៅតែដាក់ការសន្និដ្ឋានថា វានៅតែជារឿងចាំបាច់។អ្នកជំនាញផ្នែកការគ្រប់គ្រងរបបអាហារបានបញ្ចាក់ថា អាហារពេលព្រឹកមានផលប៉ះពាល់ដល់អាហារថ្ងៃត្រង់ និងអាហារពេលល្ងាចរបស់លោកអ្នកទៀតផង ព្រោះវានឹងធ្វើឲ្យលោកអ្នកចេះតែចង់ញ៉ាំនំកំប៉ិកកំប៉ុកកំដរមាត់ពេញមួយថ្ងៃបាន។

៦. ស្រ្តេស

ថ្ងៃដែលលោកអ្នកមិនសប្បាយចិត្ត មានបញ្ហាស្រ្តេសខ្លាំងសុទ្ធតែមានផលដល់អាការៈឃ្លានអាហារ។ កាន់តែស្រ្តេស កាន់តែញ៉ាំច្រើន ជាពិសេសពេលស្រ្តេសកាន់តែខ្លាំង មនុស្សនឹងកាន់តែធ្វើអ្វីមិនសូវគិតពីសុខភាពដូចជាហាត់ប្រាណ ឬញ៉ាំអីតែផ្ដេសតែផ្ដាសជាដើម។

៧. ញ៉ាំកាបូហាយដ្រេតខុសប្រភេទ

អាហារពួកកាបូហាយដ្រេតប្រភេទខ្លះដែលបានឆ្លងកាត់ការចម្រាញ់ពណ៌និងស្កររួចរាល់ហើយ អាចធ្វើឲ្យលោកអ្នកឆ្អែតពេលដំបូងតែប៉ុណ្ណោះ។ មួយសន្ទុះក្រោយពីនោះ លោកអ្នកនឹងឃ្លានម្ដងទៀត ដូចនេះគួរចៀសវាងកុំញ៉ាំអាហារប្រភេទនោះ។

៨. ញ៉ាំតិចតែធ្វើការច្រើន

សូមកុំភ្លេចថា បើសិនលោកអ្នកធ្វើការធ្ងន់ ឬហាត់ប្រាណជាប្រចាំនោះចំនួនកាឡូរីរបស់លោកអ្នកក៏ត្រូវតែបន្ថែមតាមដែរ។ ។ ការព្យាយាមញ៉ាំអាហារតិចតែប្រើថាមពលច្រើន អាចជាវិធីដែលជួយឲ្យលោកអ្នកស្រកទម្ងន់បាន តែកុំភ្លេចថាបើសិនរាងកាយចេះតែហេវហត់អស់កម្លាំង ក៏អាចជាមូលហេតុនៃជំងឺណាមួយក៏ថាបាន។

ទាំងអស់នេះសុទ្ធតែជាសារហេតុដែលអាចធ្វើឲ្យលោកអ្នកចេះតែឃ្លាន ប៉ុន្តែបើសិនលោកអ្នកមានអារម្មណ៍ថាខ្លួនឯងចេះតែឃ្លាន អស់កម្លាំងជាប្រចាំខុសធម្មតា គួរតែប្រញាប់ទៅពិគ្រោះជាមួយគ្រូពេទ្យជំនាញជាបន្ទាន់៕

អត្ថបទ៖ Sokchea Heng