អាយុ ៥០ បើចង់បានភាពស្ងប់សុខ ដាច់ខាតត្រូវលះបង់រឿង៧យ៉ាងនេះចោល

2020-11-25 07:56:00
សុខភាព

2020-11-25 07:56:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បើចង់ឲ្យជីវិតដែលនៅសេសសល់របស់អ្នកកាន់តែមានភាពស្ងប់សុខ និងសប្បាយចិត្ត បន្ទាប់ពីអាយុ៥០ឆ្នាំ អ្នកគួរតែបោះបង់នូវរឿងទាំង៧យ៉ាងនេះចោល។

១. គុំគួន

គុំគួន នឹងមិនធ្វើឲ្យជីវិតរបស់មនុស្សណាម្នាក់មានសេចក្តីសុខឡើយ។ ផ្ទុយទៅវិញ មានតែធ្វើឲ្យពួកគេមិនរីករាយ គ្មានលទ្ធភាពសាងទំនាក់ទំនងជាមួយមនុស្សជុំវិញ។ លើសពីនេះ នៅពេលអ្នកចេះអត់អោនដល់អ្នកដទៃ វាក៏ជួយដល់សុខភាពរបស់អ្នកឲ្យល្អប្រសើរបានដែរ។ ក្នុងនោះ បើយោងតាមការស្រាវជ្រាវផ្នែកវេជ្ជសាស្រ្ត បង្ហាញថា ការអត់អោនបានជួយឲ្យអ្នកមិនស្រ្តេស សម្ពាធឈាមមិនឡើងខ្ពស់ ស្មារតីនិងផ្លូវចិត្តប្រសើរ ព្រមទាំងកាត់បន្ថយហានិភ័យនៃការសេពគ្រឿងស្រវឹងនិងគ្រឿងញៀនបាន។

២. ឈ្លោះប្រកែក

ជិតចូលដល់វ័យ៥០ឆ្នាំ អ្វីដែលអ្នកត្រូវបំភ្លេចចោល គឺការឈ្លោះប្រកែក។ បើទោះជាអ្នកឈ្នះលើការឈ្លោះគ្នានោះក៏ពិតមែន ក៏និយមន័យឈ្នះពិតប្រាកដ មិនមែនជាអ្នកដែលទទួលបាននោះដែរ ។ដូច្នេះវិធីដែលល្អបំផុត គឺចេះសម្របសម្រួល រហូតដល់ម្ខាងទៀតស្ងប់ចិត្ត និងរីករាយឡើងវិញ។

៣. រង់ចាំពេលវេលាល្អមកដល់

ឈានចូលជិតវ័យ៥០ឆ្នាំទៅហើយ អ្នកមិនចាំបាច់នៅរង់ចាំឱកាសដែលជាពេលស្រស់ស្អាតបំផុតទៀតនោះឡើយ។ អ្វីដែលចង់ធ្វើ ក៏ធ្វើទៅ កន្លែងដែលចង់ដើរលេងកម្សាន្ត ក៏ទៅៗ កុំនូវស្ទាក់ស្ទើរបន្តទៀត។

៤. ញ៉ាំច្រើនអត់ចេះគិត

នៅពេលអាយុកាន់តែច្រើន មុខងាររបស់រាងកាយលែងដំណើរការល្អដូចមុនទៀតហើយ។ សូម្បីតែប្រព័ន្ធរំលាយអាហារក៏ធ្លាក់ចុះ បរិមាណកាឡូរីក្នុងរាងកាយក៏ថយចុះផងដែរ។ ហេតុនេះ បើអ្នកញ៉ាំនិងផឹកតាមអំពើចិត្ត អ្នកច្បាស់ជាមិនត្រឹមឡើងគីឡូហួសហេតុទេ ថែមទាំងបណ្តាលឲ្យមានបញ្ហាដល់សុខភាពថែមទៀត។ វិធីល្អដើម្បីរក្សាសុខភាព គឺរក្សាតុល្យភាពអាហារឲ្យសមរម្យ និងធ្វើលំហាត់ប្រាណឲ្យទៀងទាត់។

៥. យល់ព្រមគ្រប់រឿង

ក្នុងជីវិតមនុស្សយើង តែងតែចង់ទទួលបានការស្រលាញ់ និងការចូលចិត្តពីមនុស្សគ្រប់គ្នា ។ ប៉ុន្តែអ្នកត្រូវចាំថា ក្នុងសង្គមនេះទាំងមូល អ្នកមិនចាំបាច់ត្រូវស្គាល់គេឯងគ្រប់គ្នា គ្រប់ទីកន្លែងឡើយ។ ទន្ទឹមនឹងនេះ ពេលកាន់តែចូលអាយុ៥០ឆ្នាំ អ្នកក៏ត្រូវហា៊នឆ្លើយបដិសេធចំពោះមនុស្សមួយចំនួនផងដែរ។ បើទោះបីជា ពេលខ្លះ ការនិយាយពាក្យថា "ទេ" មិនងាយស្រួលក៏ដោយ តែជីវិតមួយនេះជាកម្មសិទ្ធរបស់អ្នក ហើយក៏គ្មានពេលទំនេរឯណាចាំតែយល់ព្រមគ្រប់រឿងដែរ។

៦. បរិហារកេរ្តិ៍រឿងអ្នកដទៃ

បើសិនគ្មានរឿងល្អៗនិយាយទេ កុំនិយាយអី។ ទោះបីជាអ្នកចាប់បានថាមិត្តម្នាក់នោះកំពុងនិយាយដើមអ្នកក៏ដោយ អ្នកត្រូវរម្ងាប់អារម្មណ៍ កុំច្រលោត និងត្រូវបកស្រាយឲ្យបានច្បាស់លាស់ ចៀសវាងការយល់ច្រឡំបន្តទៀត។

៧. ស្វែងរកភាពជោគជ័យហួសហេតុ

និយមន័យភាពជោគជ័យរបស់បុគ្គលម្នាក់ៗ គឺដោយឡែកពីគ្នា។ ដូច្នេះ កុំយកត្រឹមពាក្យថា ជោគជ័យលើការងារ ឬអាជីព ដើម្បីកំណត់វាអី។ ភាពជោគជ័យក៏មិនសម្តៅលើទ្រព្យសម្បត្តិ ឬអំណាចដែលកំពុងមានដែរ ព្រោះភាពជោគជ័យនិងសុភមង្គលពិតប្រាកដ មិនអាចវាស់ស្ទង់ និងទិញបានឡើយ។

ឈានដល់អាយុ៥០ឆ្នាំ គឺជាពេលវេលាល្អ ដើម្បីផ្លាស់ប្តូរផ្នត់គំនិតនៅក្នុងជីវិតរបស់អ្នក។ សម្លឹងមើលកូន ចៅរបស់អ្នកធំធាត់ឡើងដោយភាពរីករាយ នោះហើយគឺជាភាពស្នាមញញឹមដ៏ពិតប្រាកដ។ ស្នាមញញឹមដែលគ្រប់គ្នាផ្តល់ឲ្យ នៅពេលជួបអ្នក គឺនោះហើយជាកម្រិតមួយជោគជ័យមួយផ្នែកទៀត៕

ប្រភព៖ vietgiaitri ប្រែសម្រួល៖ លឹម សុនា