ឯកឧត្តម វ៉េង សាខុន រដ្ឋមន្ត្រី​ក្រសួង​កសិកម្ម បាន​កោត​សរសើរ​ម្នាក់​រស់​នៅ​ស្រុក​ថ្មគោល និង​បាន​លើក​ទឹក​ចិត្ត​ឲ្យ​កសិករ​ខ្មែរ​ផ្សេង​ទៀត យក​ជា​គំរូរ ក្រោយ​ឃើញ​កសិករ​រូប​នោះ មាន​កម្រិត​ជីវភាព​ល្អ​ប្រសើរ​ដោយ​សារ​ការ​ធ្វើ​ដំណាំ​រួម​ផ្សំ​ជុំវិញ​ផ្ទះ។

កសិករ​ខាង​លើ​មាន​ឈ្មោះ ឡាយ ជីវ ភេទ​ប្រុស អាយុ ៦៥ឆ្នាំ រស់នៅក្នុងភូមិត្រោះ ឃុំអូរតាគី ស្រុកថ្មគោល។ លោក​ពូ បានប្រកាន់យករបបដាំក្រសាំងទាប និងជីថ្ពាល់ត្រី បន្ទាប់ពីដំណាំស្រូវ គ្រាន់ជាប្រភពចំណូលបន្ថែម។ តាម​ឯកឧត្តម​រដ្ឋមន្ត្រី ជាមធ្យម កសិករ ឡាយ ជីវ អាចរកចំណូលបាន ២,៥លានរៀលក្នុង ១ខែ។ តួលេខ​នេះ ឯកឧត្តម​ថា មានចំណូលល្អជាងដំណាំស្រូវ​ទៅ​ទៀត។

នៅ​ក្នុងភូមិ​របស់​លោក​ពូ ឡាយ ជីវ មាន​ដំណាំ​រួម​ផ្សំ​ផ្សេង​ទៀត​​ដូច​ជាចេក បន្លែ ជី ក្រូចឆ្មា និងមាន់ ទុកគ្រាន់ដោះស្រាយជីវភាពប្រចាំថ្ងៃ។ ត្បិត​ថា​ មានកូនក្នុងបន្ទុក ៩នាក់ ខ្លះជាគ្រូបង្រៀន កំពុងសិក្សា និងបម្រើការក្នុងរោងចក្រ ប៉ុន្តែ​គ្រួសារ​របស់​កសិករ​គំរូរ​រូប​នេះ មាន​ជីវភាព​ល្អ​ប្រសើរ។ បែប​នេះ​ហើយ ឯកឧត្តមរដ្ឋមន្ត្រីបានកោតសរសើរ និងគាំទ្រ ឲ្យលោកពូខិតខំបន្តទៀត ទាន់មានឱកាស ដើម្បីលើកកម្ពស់កម្រិតជីវភាព ក្នុងបរិបទដែលប្រទេសទើបងើបចេញពីវិបត្តិជំងឺឆ្លងកូវីដ-១៩។

ឯកឧត្តមរដ្ឋមន្ត្រី ក៏សុំឲ្យកសិករផ្សេងទៀត ដែលធ្វើតែស្រែ គួរយកលោកពូ ឡាយ ជីវ ជាគំរូ គឺត្រូវដាំដំណាំរួមផ្សំ ចិញ្ចឹមសត្វ និងត្រី ដើម្បីជួយកាត់ បន្ថយការចំណាយប្រចាំថ្ងៃ។ ជាមួយ​គ្នា ឯកឧត្តម​គូស​បញ្ជាក់​ថា មន្ទីរកសិកម្ម ត្រូវជំរុញ លើកទឹកចិត្ត និងគាំទ្របន្ថែមលើការងារបច្ចេកទេស និងផ្គត់ផ្គង់ធាតុចូលកសិកម្មតាមរយ:គម្រោង ឬកម្មវិធីផ្សេងៗ ដែលស្ថិតនៅក្រោយក្រសួងកសិកម្ម រុក្ខាប្រមាញ់ និងនេសាទ។ ឯកឧត្តម​លើក​ឡើង​ថា ការជួយជាគំនិត និងបច្ចេកទេស គឺជាដើមទុកយ៉ាងសំខាន់សម្រាប់ប្រជាកសិករយើងពង្រឹង និងពង្រីកមុខរបរឲ្យកាត់តែរឹងមាំ និងនិរន្តរភាព៕