៦យ៉ាងប្លែកគេ ទើបបណ្ណាល័យល្បី១ មានអ្នកអានសន្ធឹក និងសៀវភៅរាប់ម៉ឺនក្បាល

2018-06-07 07:33:04
ការអប់រំ

2018-06-07 07:33:04
ចំនួនមតិ 0 | ចំនួនចែករំលែក 0

ចន្លោះមិនឃើញ

បណ្ណាល័យ នៃគ្រឹះស្ថានអប់រំឯកជន១ និងមានលក្ខណៈពិសេស ក្នុងទីក្រុងភ្នំពេញ កំពុងទទួលការគាំទ្រពីសិស្ស និស្សិត សាធារណជនរាប់ម៉ឺននាក់ប្រចាំឆ្នាំ។

ក្រៅពីនេះ វត្តមានបណ្ណាល័យ ក៏បានចូលរួមចំណែក លើកកម្ពស់ការអាននៅកម្ពុជា ផ្ដើមពីទារក រហូតដល់មនុស្សពេញវ័យ។

នោះគឺបណ្ណាល័យ នៃសកលវិទ្យាល័យ បញ្ញាសាស្ត្រកម្ពុជា (PUC) ដែលភាគច្រើនស្គាល់ថា មានទីតាំងធំក្នុងបរិវេណ ផ្នែកខាងត្បូងវិមានឯករាជ្យ នៃរាជធានីភ្នំពេញ។

រូបថត ផ្នែកខាងក្នុងបណ្ណាល័យ

បើតាមលោកស្រី លី រ៉ានី ប្រធានផ្នែករដ្ឋបាលទូទៅ និងប្រតិបត្តិនៃបណ្ណាល័យ សកលវិទ្យាល័យបញ្ញាសាស្ត្រកម្ពុជា បានប្រាប់ Sabay ថា បណ្ណាល័យនេះ បានទទួលការគាំទ្រ និងសហការពីស្ថានទូតសហរដ្ឋអាមេរិក ប្រចាំព្រះរាជាណាចក្រកម្ពុជា។ លក្ខណៈពិសេសទាំង ៦យ៉ាង ប្លែកពីគេ មានដូចជា

រូបថត លោកស្រី លី រ៉ានី (ប្រភពរូប ហ្វេសប៊ុក)

១. ផ្នែកការរចនាអគារ

បានតុបតែងស្អាត មានអនាម័យខ្ពស់ ផាកសុខភាពល្អ បំពាក់ម៉ាស៊ីនត្រជាក់ និងWifi អ៊ីនធឺណិតល្បឿនលឿន អំណោយផលដល់អ្នកអាន និងស្រាវជ្រាវ។

២. ចំនួនអ្នកចូលអាន

បណ្ណាល័យបានបើកដំណើរការទូទៅ ជាប្រចាំថ្ងៃ ដែលមានអ្នកអាន ចំនួនពី ៤០០ ទៅ ៥០០នាក់ បានចូលអាន និងស្រាវជ្រាវឯកសារនានា។ បើគិតជាឆ្នាំ មានចំនួនប្រមាណជាង ១.០០០០នាក់ នៃចំនួនសរុប សិស្ស និស្សិត និងសាធារណជន។

៣. លក្ខណៈពិសេសសម្រាប់ជួយទារកឲ្យស្រលាញ់ការអាន

ក្រោមជំនួយពីទូតអាមេរិក ទើបបណ្ណាល័យនេះមានចំណុចពិសេសជាងកន្លែងដទៃ គឺផ្ដោតលើជំនួយការអាន សម្រាប់ក្មេងៗ តាំងពីវ័យទារកឡើងទៅ។ មានន័យថា គឺការបណ្ដុះឲ្យស្រលាញ់ការអានតាំងពីតូច ដោយអាណាព្យាបាលអាចយកទារកមក និងធ្វើកាតសមាជិកបណ្ណាល័យឲ្យទារក ដើម្បីចូលស្ដាប់រឿងនិទានល្អៗ សម្រាប់ទារក រយៈពេល១ខែម្ដង ដើម្បីផ្សាំៗទារកជាមួយសៀវភៅ មុនដល់វ័យធំមួយអាចអានបាន។

រូបថត ការនិទានរឿងឲ្យកុមារតូចៗស្តាប់ (ប្រភពរូប PUC)

៤. ចំនួនសៀវភៅ

បណ្ណាល័យសាខានេះ ជាទីតាំងធំជាងគេ របស់សកលវិទ្យាល័យ ដូច្នេះមានផ្ទុកសៀវភៅថ្មីៗ សំបូរបែប ចំនួនប្រមាណ ៤.០០០០ក្បាល មានទាំងភាសាខ្មែរ និងភាសាបរទេស។

៥ ការបែងចែកទីតាំងឲ្យអ្នកអាន

ទីតាំងមាន៣ប្រភេទខុសៗគ្នា ក្នុងនោះ ១គឺកន្លែងស្ងប់ស្ងាត់ សម្រាប់ចំនួនអ្នកអានម្នាក់ឯង ហាមនិយាយ ឬជជែកគ្នា ២. ទីតាំងស្ងាត់មធ្យម សម្រាប់អ្នកអានចាប់ ២ ឬ៣នាក់ទៅ ដែលអាចជជែកគ្នាខ្លះបាន និងទីតាំងទី៣ គឺផ្ដល់ជូនអ្នកអាន ដែលមានគ្នាច្រើន និងត្រូវការជជែកគ្នា ឬធ្វើការជាក្រុម ត្រូវនៅជ្រុងម្ខាងដាច់ពីគេ។

រូបថត និសិ្សតក្នុងបណ្ណាល័យ (ប្រភពរូប PUC)

៦. ចំនួនកុំព្យូទ័រស្រាវជ្រាវ

មានកុំព្យូទ័រចំនួន១០គ្រឿង សម្រាប់អ្នកចូលបណ្ណាល័យប្រើប្រាស់ ឬស្រាវជ្រាវទូទៅ ឥតគិតថ្លៃ និងងាយស្រួលព្រោះមានភ្ជាប់ Internet។ ចំណែកកុំព្យូទ័រ ២គ្រឿងទៀត មានលក្ខណៈពិសេស គឺទុកសម្រាប់តែអ្នកប្រើប្រាស់ ដើម្បីរកព័ត៌មានពីបណ្ណាល័យ ឬសៀវភៅល្បីៗ នៅលើពិភពលោក។

សូមបញ្ជាក់ថា បណ្ណាល័យនៃបរិវេណសកលវិទ្យាល័យបញ្ញាសាស្ត្រកម្ពុជា នៅខាងត្បូងវិមានឯករាជ្យ មានទីតាំងនៅផ្ទះលេខ១៨៤ មហាវិថីព្រះនរោត្តម រាជធានីភ្នំពេញ។ ចាប់បើកពីថ្ងៃចន្ទ ដល់ថ្ងៃសុក្រ ម៉ោង ៧:៣០នាទីព្រឹក ដល់ម៉ោង ៨:៣០យប់។

ថ្ងៃសៅរ៍ និងអាទិត្យ ចាប់បើកពីម៉ោង ៨ព្រឹក ដល់ម៉ោង ៥:៣០នាទីល្ងាច។ ព័ត៌មានបន្ថែម សូមចូលទៅគេហទំព័រ http://library.puc.edu.kh ឬ Facebook Page: PUC LIBRARIES