ប្រទេសវៀតណាមបានស្នើឱ្យសហរដ្ឋអាមេរិកពន្យារពេលការដាក់ពន្ធថ្មី ៤៦% លើទំនិញនាំចូលពីវៀតណាមយ៉ាងហោចណាស់ ៤៥ ថ្ងៃ ដើម្បីបើកផ្លូវឱ្យមានការចរចារវាងភាគីទាំងពីរ។ សំណើនេះត្រូវបានធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រកាសកាលពីសប្តាហ៍មុនអំពីការដំឡើងពន្ធលើប្រទេសជាច្រើន ដោយវៀតណាមជាប់ឈ្មោះក្នុងចំណោមប្រទេសដែលរងផលប៉ះពាល់ខ្លាំងបំផុត​មួយ។

យោងតាមសេចក្តីថ្លែងការណ៍របស់រដ្ឋាភិបាលវៀតណាម និងសារព័ត៌មានអន្តរជាតិ លោក តូ ឡាំ (To Lam) អគ្គលេខាធិការបក្សកុម្មុយនិស្តវៀតណាម បានផ្ញើលិខិតទៅកាន់លោក ត្រាំ កាលពីថ្ងៃទី ៥ ខែមេសា ដោយស្នើឱ្យពន្យារពេលអនុវត្តពន្ធនេះ ដែលគ្រោងនឹងចូលជាធរមាននៅថ្ងៃទី ៩ ខែមេសា។ លោក តូ ឡាំ បានអំពាវនាវឱ្យមានការចរចា ដើម្បីស្វែងរកដំណោះស្រាយដែលផ្តល់ផលប្រយោជន៍ដល់ប្រជាជន និងអាជីវកម្មនៃប្រទេសទាំងពីរ។

ក្នុងលិខិតនោះ លោក តូ ឡាំ បានស្នើឱ្យលោក ត្រាំ តែងតាំងតំណាងអាមេរិកម្នាក់ដើម្បីដឹកនាំការចរចាជាមួយលោក ហូ ឌឹក ភុក (Ho Duc Phoc) ឧបនាយករដ្ឋមន្ត្រីវៀតណាម ដែលត្រូវបានតែងតាំងជាបេសកជនពិសេសទៅសហរដ្ឋអាមេរិក។ លោក ហូ ឌឹក ភុក គ្រោងនឹងធ្វើទស្សនកិច្ចនៅសហរដ្ឋអាមេរិកចាប់ពីថ្ងៃទី ៦ ដល់ថ្ងៃទី ១៦ ខែមេសា ដើម្បីចូលរួមកិច្ចសន្ទនាគោលនយោបាយជាន់ខ្ពស់ និងស្នើឱ្យភាគីអាមេរិកផ្តល់អាទិភាពដល់បញ្ហានេះ។

ការប្រកាសដាក់ពន្ធ ៤៦% លើវៀតណាម ដែលជាអត្រាខ្ពស់បំផុតមួយក្នុងចំណោមប្រទេសជាច្រើន បានធ្វើឱ្យទីផ្សារភាគហ៊ុនរបស់វៀតណាមធ្លាក់ចុះ ៨,១% ចាប់តាំងពីការប្រកាសនេះ។ វៀតណាម ដែលជាទីផ្សារនាំចេញធំបំផុតរបស់ខ្លួនទៅសហរដ្ឋអាមេរិក បានបង្ហាញឆន្ទៈក្នុងការកាត់បន្ថយពន្ធលើទំនិញអាមេរិកមកត្រឹម ០% ប្រសិនបើអាចឈានដល់កិច្ចព្រមព្រៀងជាមួយសហរដ្ឋអាមេរិកបាន។ កាលពីថ្ងៃទី ៣១ ខែមីនា វៀតណាមបានចេញក្រឹត្យកាត់បន្ថយពន្ធ ២៣ ប្រភេទលើទំនិញនាំចូលពីអាមេរិក ដែលភាគច្រើនមកនៅត្រឹម ០% ដើម្បីបង្ហាញពីឆន្ទៈរបស់ខ្លួន ក្នុងការចរចា។