![](http://cdn.sabay.com/cdn/media.sabay.com/media/sabay-news/Sport-News/International-Sports/Freelancer-Sport/football(127)/665f003bee255_1717501980_medium.jpg)
- 2024-06-05 11:49:51
- ព័ត៌មាន
ម៉ិកស៊ីកូមានប្រធានាធិបតីស្ត្រីដំបូងបង្អស់ក្នុងប្រវត្តិសាស្ត្រនៅការបោះឆ្នោតឆ្នាំ២០២៤នេះ
- 2024-06-05 11:49:51
- ចំនួនមតិ 0 | ចំនួនចែករំលែក 0
ម៉ិកស៊ីកូមានប្រធានាធិបតីស្ត្រីដំបូងបង្អស់ក្នុងប្រវត្តិសាស្ត្រនៅការបោះឆ្នោតឆ្នាំ២០២៤នេះ
ចន្លោះមិនឃើញ
ប្រទេសម៉ិកស៊ីកូបានរកឃើញប្រធានាធិបតីស្ត្រីលើកទីមួយហើយនៅក្នុងប្រវត្តិសាស្ត្រប្រមាណជាជាង ២០០ឆ្នាំរបស់ខ្លួន នៅក្នុងការបោះឆ្នោតប្រធានាធិបតីនៅក្នុងឆ្នាំ២០២៤នេះ។
បើតាមការព្យាករណ៍លទ្ធផលនៃការបោះឆ្នោតម៉ិកស៊ីកូកាលពីថ្ងៃអាទិត្យកន្លងទៅ អ្នកស្រី Claudia Sheinbaum បានឈ្នះការបោះឆ្នោតនេះជាមួយនឹងលទ្ធផលប្រមាណពី ៥៨ ទៅ ៦០ភាគរយ។ គូប្រជែងរបស់អ្នកស្រីមាន ២រូបរួមមាន អ្នកស្រី Xóchitl Gálvez ដែលបានលទ្ធផលឆ្នោត ២៦ ទៅ ២៨ ភាគរយ និងលោក Jorge Álvarez Máynez ដែលអាចបានសម្លេងឆ្នោតប្រមាណ ៩ ទៅ ១០ភាគរយ។
តាមពិតទៅ គេដឹងថាប្រទេសអាមេរិកឡាទីនមួយនេះមានប្រធានាធិបតីស្ត្រីតាំងពីថ្ងៃអាទិត្យមកម្ល៉េះ ដោយសារតែបេក្ខជនប្រធានាធិបតីឈានមុខ ២រូបគឺជាមនុស្សស្រី។
អ្នកស្រី Sheinbaum ជាអតីតអភិបាលក្រុងម៉ិកស៊ីកូ ដែលជារដ្ឋធានីនៃប្រទេសនេះ។ អ្នកស្រីក៏ជាអ្នកវិទ្យាសាស្ត្រពាក់ព័ន្ធនឹងរឿងអាកាសធាតុផងដែរ។ អ្នកស្រីជាមេដឹកនាំនៃគណបក្សកាន់អំណាច Morena ដែលជាគណបក្សនិយមឆ្វេង។ គណបក្សដែលមាននិន្នាការបែបនេះច្រើនតែយល់ថា រដ្ឋាភិបាលមានតួនាទីច្រើននៅក្នុងការដោះស្រាយបញ្ហាវិសមភាពសេដ្ឋកិច្ច ដូចជាការផ្ដល់នូវប្រាក់ឧបត្ថម្ភទំនុកបម្រុងដល់ប្រជាជនខ្សត់ខ្សោយជាដើម។
ម៉ិកស៊ីកូនៅពេលនេះដឹកនាំដោយលោក Andrés Manuel López Obrador ដែលលោកឡើងធ្វើជាប្រធានាធិបតីតាំងពីឆ្នាំ២០១៨។ អ្នកស្រី Sheinbaum នឹងចូលកាន់តំណែងនៅខែតុលាខាងមុខនេះ។ នៅប្រទេសនេះ ប្រធានាធិបតីមានអាណត្តិ ៦ឆ្នាំ ហើយមិនមានសិទ្ធិឈរឈ្មោះបន្តទៀតទេ។
ម៉ិកស៊ីកូទទួលបានឯករាជ្យនៅឆ្នាំ១៨២១។ តាំងពីពេលនោះមក ប្រទេសនេះមានប្រធានាធិបតីចំនួន ៦៥រូបមកហើយ៕