យុវជនអាយុ ១៨ឆ្នាំមួយរូបឈរឈ្មោះជាតំណាងរាស្ត្រនៅអង់គ្លេស

2024-06-24 12:17:22
ព័ត៌មាន

2024-06-24 12:17:22
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ផេដ្រូ ដាខនសេឆាវ (Pedro Da Conceicao) វ័យ ១៨ឆ្នាំ សម្រេចឈរឈ្មោះជាតំណាងរាស្ត្រនៅមណ្ឌលឡុងដុងខាងលិច សម្រាប់ការបោះឆ្នោតសកលនៅអង់គ្លេស ដែលនឹងប្រព្រឹត្តិទៅនៅថ្ងៃទី៤ ខែកក្កដា ខាងមុខនេះ។

លោកបានឈរក្នុងនាមជាបេក្ខជនឯករាជ្យដោយមិនតំណាងឱ្យគណបក្សនយោបាយណាមួយឡើយ។

កើតនៅប្រទេសព័រទុយហ្គាល់ ហើយផ្លាស់មកនៅអង់គ្លេសតាំងពីតូច លោកបាននិយាយថា ដោយសារតែនៅក្នុងសភាមិនសូវមានតំណាងរាស្ត្រក្មេងៗ ទើបលោកប្រឡូកចូលឆាកនយោបាយទាំងអាយុ ១៨ឆ្នាំ។

យុវជនអាយុ ១៨ឆ្នាំនេះធ្វើយុទ្ធនាការក្នុងការគាំទ្រឱ្យមានការវិនិយោគនៅវិស័យសេវាកម្មសាធារណៈឱ្យច្រើនជាងមុន ហើយធ្វើយ៉ាងណាដើម្បីបង្ក្រាបឧក្រិដ្ឋកម្ម។

ជាមួយគ្នានេះដែរ លោកបានបង្ហាញចំណាប់អារម្មណ៍ថា មនុស្សភាគច្រើននៅវ័យដូចលោកសុទ្ធតែជក់ថ្នាំ និងប្រឡូកក្នុងហ្វូងក្មេងទំនើង ចំណែកឯអ្នកនយោបាយភាគច្រើនវិញ ហាក់ចាកឆ្ងាយពីតថភាពជាក់ស្ដែង។

លោកបានលើកឡើងថា៖ «តើឱ្យមនុស្សដែលរៀននៅសាលាឯកជន ឬ មានវ័យចាស់ៗ ដោះស្រាយបញ្ហាហ្នឹងយ៉ាងម៉េចទៅ បើបញ្ហាទាំងនោះ ពួកគេមិនទាំងដឹងជាក់ស្ដែងផង?»។

ការឈរឈ្មោះក្នុងនាមជាបេក្ខជនឯករាជ្យ ដោយមិនមានគណបក្សមកទំនុកបម្រុងជាបញ្ហាប្រឈមមួយសម្រាប់យុវជន ផេដ្រូ។ លោកត្រូវបង់លុយ ៥០០ផោន (ប្រមាណ ៦៣៣ដុល្លារអាមេរិក) តែលោកនឹងទទួលបានលុយនេះវិញ បើលោកទទួលបានសម្លេងឆ្នោតយ៉ាងតិច ៥% នៅក្នុងមណ្ឌលដែលលោកឈរឈ្មោះ។

លោកទទួលស្គាល់ថា នៅមណ្ឌលរបស់លោកជាមជ្ឈមណ្ឌលអំណាចរបស់គណបក្សប្រឆាំងអង់គ្លេស គណបក្សពលករ តែលោកនៅតែសង្ឃឹមថា លោកនឹងអាចលើកទឹកចិត្តឱ្យក្មេងៗជាច្រើនចាប់អារម្មណ៍រឿងនយោបាយ។

នៅអង់គ្លេស បេក្ខភាពតំណាងរាស្ត្រអាចមានសិទ្ធិឈរឈ្មោះបាន ដរាបណាតែបេក្ខជននោះមានអាយុយ៉ាងតិច ១៨ឆ្នាំ៕