• 2017-01-13 03:08:21
  • សុខភាព

ហ្វកម៉ាលីន​ ដែល​រក​ឃើញ​ក្នុង​បង្គាមួយ​ចំនួន​​នៅ​ផ្សារ​អូរឫស្សី ជា​សារធាតុ​​​ចាក់​រក្សា​សាកសព

  • 2017-01-13 03:08:21
  • ចំនួនមតិ 0 | ចំនួនចែករំលែក 0

ចន្លោះមិនឃើញ

កាល​ពី​ម្សិលមិញ​នេះ​ ​​​ ​មន្ត្រី​ជំនាញ​នៃ​អគ្គ​នាយកដ្ឋាន​កាំ​កុង​ត្រូល​ ដឹក​នាំ​ដោយ​ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម​​ បានចុះ​សាកសួរសុខទុក្ខ និង​​​ធ្វើ​តេស្ត​​​លើ​ផលិត​ផល​មួយ​ចំនួន​ក្នុង​ផ្សារ​អូរ​ឫស្សី ​ ហើយ​​បាន​រក​ឃើញ​នូវ​វត្ត​មាន​​សារធាតុ​គីមី​ ហ្វកម៉ាលីន​ នៅ​​​ក្នុង​បង្គាមួយចំនួន​។​ តើ​សារធាតុ​គីមី​មួយ​នេះ​អាច​បណ្ដាល​អោយ​​ប៉ះ​ពាល់​​ដល់​សុខ​ភាព​អ្នក​បរិភោគ​យ៉ាង​ដូចម្ដេច​ខ្លះ​?

បើ​តាម​ការ​លើក​ឡើង​របស់​លោក​ ស៊ិន​ ស៊ី​ដេត​ ​​ជា​ប្រធាន​នាយកដ្ឋាន​មន្ទីរ​ពិសោធន៍​ នៃ​អគ្គនាយកដ្ឋាន​កាំកុងត្រូល ​បាន​ពន្យល់​ថា​ តាម​ការ​ពិត​សារធាតុ​គីមី​ ហ្វកម៉ាលីន ​(Formalin) គឺ​​ជា​សារធាតុ​មួយ​ប្រភេទ​ដែល​​ត្រូវ​បាន​គេ​ប្រើ​​សម្រាប់​ចាក់​ទៅ​លើ​សាក​សព​​ដើម្បី​​កុំ​អោយ​​ស្អុយ​រលួយ​តែ​ប៉ុណ្ណោះ​​ ហើយ​ជា​សារធាតុ​គីមី​​ដែល​ក្រសួង​ហាម​​ដាច់​ខាត​មិន​អោយ​ប្រើ​ប្រាស់​ក្នុង​ចំណី​អាហារ​​​ឡើយ​។​ ប៉ុន្តែ​មាន​ជន​ខិល​ខូច​មួយ​ចំនួន​បែរ​ជា​យក​​​សារធាតុ​មួយ​​នេះ​​ទៅ​ប្រើ​​ក្នុង​​ចំណី​អាហារ​ស្រស់​ទៅ​វិញ​ ដើម្បី​​​ការពារ​កុំ​អោយ​ស្អុយ​ និង មិន​ចាំ​បាច់​ប្រើ​ទឹក​កក​ក្លា​សេ​ច្រើន​។​

លោក​បាន​បន្ត​ទៀត​ថា​​សារធាតុ​គីមី​នេះ​ត្រូវ​បាន​គេ​​យក​លាយ​ជាមួយ​ទឹក​ ហើយ​ត្រាំ​អាហារ​ស្រស់​​នៅ​ក្នុង​នោះ​​។​ ការ​ធ្វើ​បែប​នេះ​គឺ​អាច​ជះ​ឥទ្ធិពល​​ដល់​អ្នក​បរិភោគ​​ក្នុង​​លក្ខខណ្ឌ​២​។​ លក្ខខណ្ឌ​ទី​១​ ​ប្រសិន​បើ​សារធាតុ​ហ្វកម៉ាលីន​នេះ​មាន​កម្រិត​ទាប​ ​នោះ​នឹង​អាច​បណ្ដាល​អោយ​​អ្នក​បរិភោគ​ទទួល​រង​​នូវ​អាការៈ​ ក្អួត​ ចុកពោះ​ រាគ​រូស​ ជាដើម ​ប៉ុន្តែ​ក្នុង​​​លក្ខខណ្ឌ​ទី​២​ដែល​​សារធាតុ​នេះ​មាន​កម្រិត​ខ្ពស់​​វិញ​ គឺ​វា​​អាច​បណ្ដាល​អោយ​អ្នក​បរិភោគ​​​​​សន្លប់​ រឺ ​ស្លាប់​បាន​។​

លោក ស៊ិន​ ស៊ី​ដេត បាន​បញ្ជាក់​ផង​ដែរ​​​​ថា​សារធាតុ​គីមី​ហ្វកម៉ាលីន ​(Formalin)​នេះ​គឺ​គ្មាន​ក្លិន​ គ្មាន​ពណ៌​នោះ​ទេ​ដែល​ធ្វើ​អោយ​ពិបាក​ក្នុង​ការ​ពិនិត្យ​មើល​​ដោយ​ភ្នែក​ទទេ​​ណាស់​ គឺ​មាន​តែ​ការ​ធ្វើ​តេស្ត​តាម​លក្ខណៈ​បច្ចេកទេស​ប៉ុណ្ណោះ​ ទើប​អាច​​បញ្ជាក់​ពី​វត្ត​មាន​របស់​វា​បាន​។​ ​ដូច្នេះ​​លោក​​សូម​​​ណែនាំ​អោយ​ប្រជាជន​មេត្តា​ចាប់​អារម្មណ៍​ និង តាម​ដាន​ទៅ​លើ​អ្នក​លក់​ដែល​ខ្លួន​​ឧស្សាហ៍​ទិញ​អាហារ​យក​ទៅ​បរិភោគ​។​ ជាពិសេស​ប្រសិន​បើ​អាហារ​ស្រស់​​ដែល​មិន​សូវ​​បាន​ក្លា​សេ​ទឹក​កក រឺ​ មិន​សូវ​មាន​រុយ​មក​ជិត​ នោះ​​វា​ជា​សញ្ញា​ដែល​​បញ្ជាក់​ថា​ ​អ្នក​លក់​អាច​នឹង​ប្រើ​សារធាតុ​មួយ​នេះ​​។

ជា​ចុង​ក្រោយ​ លោក​បាន​​​​​​សង្កត់​ធ្ងន់​ថា​ពេល​នេះ​ក្រសួង​បាន​ដក​ហូត​អាហារ​ខូច​គុណ​ភាព​មួយ​ចំនួន​រួច​មក​ហើយ​។​ បន្ថែម​លើ​នេះ​គឺ​មន្រ្តី​ជំនាញ​បានខិត​ខំ​ណែនាំ​​អប់​រំ​ដល់​អាជីវករ​ ព្រម​ទាំង​ធ្វើ​ការ​ផ្សព្វ​ផ្សាយ​​ដល់​អ្នក​បរិភោគ​ទូទៅ​​អោយ​បាន​ដឹង​ផង​ដែរ​។ ​​ចំពោះ​អ្នក​ដែល​នៅ​តែ​​​បន្ត​ប្រព្រឹត្ត​ប្រើ​សារធាតុ​គីមី​ខុស​ច្បាប់​ក្នុង​ចំណី​អាហារ​​ នោះ​នឹង​ត្រូវ​​ទទួល​​ទោស​ចំពោះ​មុខ​ច្បាប់​ ​រួម​ជា​មួយ​ការ​ផាក​ពិន័យ​ទៀត​ផង​៕

ខាង​ក្រោម​នេះ​ជា​សកម្មភាព​ចុះ​ត្រួតពិនិត្យ​ម្សិលមិញ ដឹក​នាំ​ដោយ​ឯកឧត្តម ប៉ាន សូរស័ក្តិ រដ្ឋមន្ត្រី​ក្រសួង​ពាណិជ្ជកម្ម៖

អត្ថបទ៖ ចន្ថា

មតិយោបល់