• 2018-01-26 03:41:57
  • សេដ្ឋកិច្ច

ហួស​ចិត្ត ពេល​ឮកសិករ​ដាំបន្លែធម្មជាតិ​ពោល​មួយ​ឃ្លានេះ

  • 2018-01-26 03:41:57
  • ចំនួនមតិ 0 | ចំនួនចែករំលែក 0

ចន្លោះមិនឃើញ

«ឃើញ​ទិន្ន​ផល​បន្លែខ្ញុំ​ល្អ​...បែរ​ជា​អតិថិជន​មួយ​ចំនួន​យល់​ថា​ខ្ញុំ​ប្រើ​ថ្នាំ​ប៉ូវ​ឲ្យ​ទទួល​បាន​ផល​ល្អ​ទៅ​វិញ»​ នេះគឺ​ជា​ការ​លើក​ឡើង​របស់​កសិករ​ដាំ​បន្លែ​ធម្មជាតិ​ម្នាក់នៅ​ ក្រុង​ដូនកែវ ខេត្ត​តាកែវ។

លោក អ៊ុំ ហឿន បាន​ប្រ​កប​របរដាំបន្លែ​​ជិត​២០​ឆ្នាំ​មក​ហើយ ក្នុង​រយៈ​ពេល​នេះ​ លោក​ថា​តម្លៃ​បន្លែ​ប្រែប្រួលមិន​ទៀងទាត់ ជួន​លក់​បាន​ថ្លៃ និង​ជួនលក់​បាន​ថោក។ ទោះយ៉ាងណា​លោក​ថា​ប៉ុន្មាន​ឆ្នាំ​ចុងក្រោយនេះ បន្ទាប់ពី​អ្នកទទួលទានចាប់​ផ្តើម​បារម្ភពី​បន្លែមានជាតិ​គីមី ទើប​បន្លែ​របស់​លោក​លក់បាន​តម្លៃល្អ ពោល​គឺអាចលក់បាន​​៤ ០០០រៀល​ក្នុង​មួយ​គីឡូក្រាម​​ ដែលតម្លៃ​នេះ​លោកថា​លើស​បន្លែនាំចូល​ជាង​ពាក់​កណ្តាល​។ ​

(ផ្លែម្រះដាំដោយ​លោក អ៊ុំ ហឿន)

ទោះជាបច្ចុប្បន្ន បន្លែរបស់​លោក​ហាក់​មាន​ទីផ្សារក៏ពិតមែន តែ​លោក​ថា​មាន​តែអ្នក​ស្គាល់​ និង​ដឹង​ពីប្រ​វត្តិ​ដាំ​ដុះ​របស់​លោក​ប៉ុណ្ណោះ​ជាអ្នក​ទិញ​ទុក​លក់​បន្ត ឬ​យកទៅទទួលទាន។ ចំណែក​អ្នក​ដែល​មិន​សូវ​ដឹងពី​ប្រ​វត្តិ​ដាំដុះរបស់​លោក​គឺ មិនជឿថា​បន្លែរបស់​លោក​មិនប្រើសាធាតុគីមី​ជំនួយ​នោះ​ទេ តែ​បែរជាជឿថា​បន្លែដែលមាសត្វល្អិត​ទិចបំផ្លាញ​ ជា​បន្លែគ្មានគីមីទៅ​វិញ។​

លោក​បន្ថែមថាៈ « សួន​បន្លែ​របស់​ខ្ញុំ​ដាំ​ប្រើ​ប្រាស់​សុទ្ធ​តែ​ជី​ធម្មជាតិ​ ជីលាមកគោ លាយ​ជី​សរីរាង្គ​តិច​តួច​ ប៉ុន្តែ​នៅ​ពេល​ដែល​ឃើញ​ទិន្ន​ផល​បន្លែ​ខ្ញុំល្អ​...​បែរ​ជា​អតិថិ​ជន​មួយ​ចំនួន​យល់​ថា​ខ្ញុំ​ប្រើ​ថ្នាំ​ប៉ូវឲ្យ​ទទួល​បាន​ផល​ល្អ​ទៅ​វិញ​»។

សម្រាប់​ចំណុចនេះ អ្នកជំនាញ​ខាង​កសិកម្ម លោក យ៉ង សាំងកុមារ ថ្លែងថា​ការដាំដុះ​បន្លែ​តាម​បែបធម្ម​ជាតិ​ក៏អាច​ធ្វើ​ឲ្យ​ផ្លែធំ ថ្លោស ល្អ​ដូច​បន្លែដែលដាំ​ដោយ​ប្រើ​ថ្នាំ​គីមី​ដូចគ្នា។ លោក​ថា​ខុសគ្នា​តែ​រយៈពេល​ប៉ុណ្ណោះ ដោយថា​ដាំបែបធម្មជាតិ​ត្រូវប្រើពេល​យូរជាង​ដាំ​ដោយ​ប្រើថ្នាំគីមី។

ចំពោះ​គំនិត​ដែល​ថា​បន្លែ​មានសត្វល្អិត​ទិច ឬស៊ី ទើបជា​បន្លែ​គ្មានជាតិគីមីនោះ លោកថា​គ្រាន់តែជា​ចំណុច​សម្គាល់​តូចមួយ​ប៉ុណ្ណោះ តែអ្វីដែលសំខាន់​អ្នក​ទិញ​ត្រូវ​ស្វែងយល់បន្ថែមពីប្រ​ភពបន្លែទាំងនោះ។

លោក​បន្ថែមថាៈ «បន្លែ​ដែលយើងដាំដោយជី​ធម្មជាតិវាលូតលាស់ល្អ ខៀវ ស្រងាត់ ទុកបានយូរជាង...​បើគាត់យក​ស្ពៃដែលគេដាំ​តាមធម្មជាតិ ប្រៀ​បធៀប​ជាមួយ ស្ពៃ​​ប្រើប្រាស់​ថ្នាំគីមី យើងអាចយកទៅទុកក្បែរគ្នាទៅ មួយណានៅបានស្រស់ជាង នៅបានយូរជាង...ជាទូទៅ​បន្លែដាំតាមបែប​ធម្មជាតិ​អាចនៅទុកបាន​យូរជាង»។ ​

កសិ​ករ​វ័យ​៦០​ឆ្នាំ​ខាងលើឲ្យដឹងថា​លោក​ដាំបន្លែដូចជាត្រប់ ម្រះ និង​ប៉េងប៉ោះជាដើម​ក្នុង​ដី​ប្រហែល​កន្លះហិកតា​។ លោក អ៊ុំ ហឿន បង្ហើបពីបច្ចេកទេស​ថែទាំ និងការ​ពារ​បន្លែរបស់​លោក​ថាៈ «កំចាត់​សត្វ​ល្អិត​ខ្ញុំ​ប្រើកាវ​ស្អិតៗ​យក​មក​រុំ​លើ​ដប​ទឹកសុទ្ធ...​រួច​យក​ភ្លើង​ពិល​ដាក់​ខាង​ក្នុង...​យប់​ឡើង​យក​ដប​ទៅ​ដាក់​ក្នុ​ចម្ការ​...​កាល​ណា​សត្វ​ល្អិត​ឃើញ​ភ្លើង​ភ្លឺៗ.​..​វា​នាំ​គ្នា​មក​លើ​ដប​ក៏​ស្អិត​កាវ​ស្លាប់​អស់​តែ​ម្តង​»។

ចំណែក​ផ្លែត្រប់ ឬម្រះវិញ លោក​ថា​បាន​ឲ្យ​ភរិយា​ដេរ​ថង់ក្រណាត់​តូចៗ​ដើម្បី​ស្រោប​ពី​លើ​ ក្នុង​ន័យ​ការ​ពារ​កុំ​ឲ្យ​មានសត្វល្អិត​ទិច​បំផ្លាញ។ បច្ចេកទេសទាំងនេះ លោក​ថា​កើតចេញពី​បទពិសោធន៍​ដាំបន្លែ​រាប់​ឆ្នាំរបស់​​លោក​ផ្ទាល់ផង និង​តាមរយៈ​ការ​តាម​ដាន​នាទីកសិកម្ម​តាម​កញ្ចក់ទូរទស្សន៍​ផង។

(ផ្លែម្រះស្រោបដោយ​ថង់ក្រណាត់ការពារសត្វល្អិត​បំផ្លាញ)

បើ​និយាយពី​ចំណូល​ប្រ​ចាំ​ថ្ងៃពីការ​លក់​បន្លែនេះ​វិញ លោកថា​ក្នុង​មួយថ្ងៃ​លោក​អាចបាន​ប្រាក់​ប្រហែល​១០​ម៉ឺន​រៀល តែថា​ចំណូល​នេះ​បានតែ​រដូវ​ដែលអាចដាំបន្លែបាន​ច្រើនប៉ុណ្ណោះ។ ដោយ​ឡែក​នៅ​រដូវប្រាំង ដោយ​មិនសូវសម្បូរទឹក​ផង លោក​ក៏​មិនអាចដាំបន្លែបាន​ច្រើន​មុខដែរ។

រដ្ឋ​មន្ត្រី​ក្រ​សួង​កសិកម្ម ឯឧត្តម វេង សាខុន នៅដើម​សប្តាហ៍​នេះ​លើក​ឡើងក្នុងវេទិកាស្រូវអង្ករថា​កម្ពុជា​ក្នុង​មួយ​ថ្ងៃៗបាន​នាំចូល​បន្លែ​ពី​ប្រ​ទេសជិត​ខាង​ចន្លោះពី២០០ ទៅ​៤០០​តោន និងបាន​ចំណាយ​ថវិកា​ប្រហែលជា​២០០​លាន​ដុល្លារ​ទៅ​លើ​បន្លែនាំចូល​ទាំងនេះ។

បើ​តាម​ការ​ចុះ​ផ្សាយ​របស់​សារព័ត៌មាន​សំឡេង​វៀតណាម ក្នុង​ឆ្នាំ ២០០៩ វៀតណាម​នាំបន្លែស្រស់​មក​កម្ពុជា​ចំនួន​២០០​តោន​ក្នុង​មួយ​ថ្ងៃ ហើយ​ការនាំចូលនេះបាន​ហក់ឡើង​ដល់​៣០០​តោន នៅ​ឆ្នាំ ២០១៦។

ដើម្បី ជួយ​កាត់​បន្ថយការនាំចូល​បន្លែពី​បរទេសនេះ ឯកឧត្តម​រដ្ឋមន្ត្រីក្រ​សួង​កសិកម្ម​អះអាងថា​រដ្ឋាភិលបាល​គ្រោង​បោះ​ចញ្ចប់ថវិកាចំនួន​៣០​លានដុល្លារ​ដើម្បីជួយ​ដល់​កសិករ​ផលិត​បន្លែ​គ្មានជាតិ​គីមី ឲ្យបាន​៦ម៉ឺន​តោន​ក្នុង​មួយ​ឆ្នាំសម្រាប់ទីផ្សារ​ក្នុង​ស្រុក និង​កាត់​បន្ថយការនាំចូល៕

អត្ថបទ​ដោយ៖ ជិន វេន

មតិយោបល់