- 2018-02-05 07:47:57
- ជំនឿ
ជំនឿបុរាណ ឪពុកម្តាយត្រូវរៀបការឲ្យកូនភ្លោះ កុំឲ្យព្រាត់ប្រាសគ្នា
- 2018-02-05 07:47:57
- ចំនួនមតិ 0 | ចំនួនចែករំលែក 0
ជំនឿបុរាណ ឪពុកម្តាយត្រូវរៀបការឲ្យកូនភ្លោះ កុំឲ្យព្រាត់ប្រាសគ្នា
ចន្លោះមិនឃើញ
កុមារីទើបមានអាយុប្រាំមួយឆ្នាំមួយគូនៅស្រុកឈូក ខេត្តកំពត បានក្រាបផ្ទឹមនៅមុខឪពុកម្តាយកាលពីចុងខែមករា តែការក្រាបផ្ទឹមនេះមិនមែនក្រាបផ្ទឹមក្នុងន័យស្រឡាញ់គ្នាដោយក្តីស្នេហានោះទេ។ អាពាហ៍ពិពាហ៍កូនភ្លោះមួយគូនៅវ័យក្មេខ្ចីនេះ ធ្វើឡើងទៅតាមជំនឿដែលមានតៗគ្នាមកប៉ុណ្ណោះ ក្នុងន័យសុំក្តីសុខដល់កូនភ្លោះទាំងពីរ។
លោក ឡេវ ស៊ីនឿន ត្រូវជាឪពុករបស់កូនភ្លោះទាំងពីរខាងលើ រៀបរាប់ថាលោករៀបអាពាហ៍ពិពាហ៍ឲ្យកូនភ្លោះទាំងពីររបស់លោកដើម្បីឲ្យកូនៗទទួលបានសេចក្តីសុខ។ លោកបន្តថា តាមប្រពៃណីខ្មែរឲ្យតែអ្នកមានកូនភ្លោះត្រូវតែធ្វើពិធីរៀបការជាមួយគ្នា ទើបមានសេចក្តីសុខ និងរស់នៅបានសុខជួបជុំគ្នា។
លោកបន្ថែមយ៉ាងដូចនេះថាៈ «ក្នុងគោលបំណងឲ្យកូនបានសុខ កុំឲ្យបែកបាក់គ្នា ខូចមួយនៅមួយ ហើយការរៀបការនេះមិនមែនក្នុងន័យប្តីប្រពន្ធទេ តែដើម្បីឲ្យបងប្អូនវាជួបជុំគ្នា កុំឲ្យព្រាត់ប្រាសគ្នាប៉ុណ្ណោះ»។
សម្រាប់ពិធីរៀបការនេះ លោក ឡេវ ស៊ីនឿន បញ្ជាក់ថាពិធីនេះលោករៀបចំតែមួយថ្ងៃប៉ុណ្ណោះ ដោយពេលព្រឹកមានពិធីសូត្រមន្ត និងរៀបចំសំពះផ្ទឹមបាចផ្កាស្លា បង្វិលពពិល និងចងដៃ។ ចំណែកពេលរសៀលលោកថា លោកបានអញ្ជើញភ្ញៀវកិត្តិយសចូលរួមពិសារអាហារដូចពិធីអាពាហ៍ពិពាហ៍ទូទៅដែរ។
ប្រហាក់ប្រហែលនេះ ដែរ លោក លី នាក់ ជាឪពុករបស់កូនភ្លោះភេទផ្ទុយគ្នាមួយគូទៀត បាននិយាយថា លោកជឿលើជំនឿរៀបការឲ្យកូនភ្លោះនេះដែរ ហើយថាលោកក៏មានបំណងធ្វើពិធីនេះឲ្យកូនៗរបស់លោកផងដែរ។
លោកបន្ថែមថាៈ «ដោយសារចង់រៀបការឲ្យពួកគេឲ្យបានអធិកអធមបន្តិច ទើបពិធីត្រូវពន្យាពេល...កូនស្រីរបស់ខ្ញុំ ធ្លាប់គ្រោះថ្នាក់រហូតដល់បាក់ជើងម្ខាងពេលបានអាយុ៣ឆ្នាំ ឯកូនប្រុសវិញរកកល់ចូលម៉ូតូជាច្រើនដងមកហើយ ហើយឆាប់នេះខ្ញុំនឹងរៀបចំរៀបការឲ្យពួកគេឲ្យស្រេចបាច់ឲ្យហើយ ដើម្បីកុំឲ្យមានរឿងរ៉ាវមិនល្អដល់ពួកគេ»។
ចំណែកលោក វង្ស អិត ជាអាចារ្យមួយរូបដែលធ្លាប់ធ្វើពិធីរៀបការឲ្យកូនភ្លោះឲ្យដឹងដែរថា ការរៀបការឲ្យកូនភ្លោះគឺចាស់បុរាណបានធ្វើតៗគ្នាមក តែមិនមានចែងក្នុងក្បួនគម្ពីអ្វីនោះទេ។ លោកបន្តថា ពិធីនេះក៏មិនកំណត់ពីអាយុរបស់កូនភ្លោះដែរ ពោលគឺអាស្រ័យលើឪពុកម្តាយសាច់ញាតិ សំខាន់គឺកូនៗមានវ័យធំដឹងក្តីបន្តិច ចេះដឹង និងអាចកាន់ផ្កាស្លាបាន៕
