- 2018-02-14 03:17:21
- សុខភាព
មន្ទីរពេទ្យកុមារអង្គរ ក្តីរំពឹងរបស់កុមារក្រីក្រ
- 2018-02-14 03:17:21
- ចំនួនមតិ 0 | ចំនួនចែករំលែក 0
មន្ទីរពេទ្យកុមារអង្គរ ក្តីរំពឹងរបស់កុមារក្រីក្រ
ចន្លោះមិនឃើញ
តាំងពីព្រលឹមរហូតដល់ល្ងាចឪពុកម្តាយខ្ទង់រយនាក់បានអង្គុយរង់ចាំវេនរបស់ខ្លួនដើម្បីបាននាំកូនតូចៗរបស់ខ្លួនទទួលការពិនិត្យ និងព្យាបាល។ មន្ទីរពេទ្យដែលមានទីទាំងស្ថិតក្នុងខេត្តទេសចរណ៍ដ៏ល្បីល្បាញមួយនេះបានទទួលពិនិត្យ និងព្យាបាលជំងឺកុមារពីអាយុសូន្យឆ្នាំរហូតដល់១៦ឆ្នាំដោយមិនគិតប្រាក់។
ក្នុងមួយថ្ងៃមានកុមារមិនតិចជាង៥០០នាក់ទៅ៦០០នាក់ទេដែលមកទទួលការពិនិត្យ និងព្យាបាលនៅមន្ទីរពេទ្យកុមារអង្គរ ខេត្តសៀមរាប។ មន្ទីរពេទ្យនេះត្រូវបានកសាងឡើងនៅឆ្នាំ១៩៩៩ ដោយជនជាតិជប៉ុន លោក ខេនរ៉ូ អ៊ីស៊ុ។ បន្ទាប់ពីបានមកបំពេញបេសកកម្មជាអ្នករថតរូបនៅទឹកដីអង្គរនៅឆ្នាំ១៩៩៣ លោក ខេនរ៉ូ អ៊ីស៊ុ បានដក់ចិត្តជាប់នឹងប្រជាពលរដ្ឋខ្មែរ និងបានឃើញទុក្ខលំបាកមួយចំនួនរបស់ពលរដ្ឋខ្មែរលើប្រព័ន្ធថែទាំសុខភាព ដែលនៅពេលនោះនៅមានចន្លោះខ្វះខាតនៅឡើយ។ ត្រង់ចំណុចនេះ បានញ៉ាំងចិត្តរបស់លោកចង់ធ្វើអ្វីមួយសម្រាប់ពលរដ្ឋខ្មែរ ជាចុងក្រោយលោកសម្រេចបង្កើតមន្ទីរពេទ្យនេះឡើង។
លោកវេជ្ជបណ្ឌិត ងួន ច័ន្ទភក្ដ្រា នាយកមន្ទីរពេទ្យកុមារអង្គរ បានឲ្យដឹងថា មន្ទីរពេទ្យកុមារអង្គរមានទស្សនៈវិស័យចម្បងមួយគឺព្យាបាល និងថែទាំដល់កុមារកម្ពុជាប្រកបដោយគុណភាព ក្ដីមេត្តាករុណា និងមិនគិតកម្រៃ។ គិតចាប់ពីថ្ងៃដំណើរការលើកដំបូងមកទល់ពេលនេះ លោក វេជ្ជបណ្ដិតថាមន្ទីរពេទ្យបាន ទទួលពិនិត្យ និងព្យាបាលកុមារមិនតិចជាង១,៥លាននាក់នោះទេ។
លោកបន្តថាមន្ទីរពេទ្យកុមារអង្គរក៏មានបេសកកម្មក្នុងការសហការជាមួយក្រសួងសុខាភិបាល ក៏ដូចជាមន្ទីរសុខាភិបាល ដើម្បីរួមចំណែកធ្វើឲ្យប្រសើរឡើងនៃប្រព័ន្ធសុខាភិបាលនៅកម្ពុជាផងដែរ។
បើនិយាយពីឈ្មោះមន្ទីរពេទ្យនេះវិញមានប្រជាពលរដ្ឋខ្លះ បានហៅមន្ទីរពេទ្យនេះថាមន្ទីរពេទ្យបេះដូង។ ប្រជាពលរដ្ឋហៅបែបនេះ លោក វេជ្ជបណ្ឌិត ងួន ច័ន្ទភក្ដ្រា ពន្យល់ថាដោយសារតែឡូហ្គូរបស់មន្ទីរពេទ្យមានរូបស្លឹកឈើលាស់ខ្ចីពត់កោងប្រៀបដូចជាបេះដូង។ កំពុងអង្គុយរង់ចាំយកកូនចូលបន្ទប់ពិនិត្យជំងឺ អ្នកស្រី ស្រីភ័ណ្ឌ រស់នៅស្រុកកំរៀង ខេត្តបាត់ដំបង ប្រាប់Sabay ថាអ្នកស្រីបានយកកូនប្រុសអាយុ៤ឆ្នាំ ដែលមានជំងឺខ្វះកំណកឈាមមកព្យាបាលនៅមន្ទីរពេទ្យកុមារអង្គរជាច្រើនលើកមកហើយ។ អ្នកស្រីបញ្ជាក់ថា បន្ទាប់ពីទទួលបានការព្យាបាលកូនប្រុសរបស់អ្នកស្រីបានធូរស្បើយច្រើន។
ចំណែកអ្នកស្រី ស្រីយ៉ា អ្នកស្រុកពួក ខេត្តសៀមរាប វិញបញ្ជាក់ថាអ្នកស្រីតែងនាំកូនប្រុសអាយុ១ឆ្នាំ មកព្យាបាលនៅមន្ទីរពេទ្យកុមារអង្គរនេះ ដោយហេតុថាគុណភាពព្យាបាលល្អនិងមិនគិតថ្លៃព្យាបាល។
បច្ចុប្បន្នមន្ទីរពេទ្យកុមារអង្គរមានបុគ្គលិកសរុបជាង ៥០០នាក់ ក្នុងនោះ ៩៨%ជាជនជាតិខ្មែរ។ មន្ទីរពេទ្យអាចដំណើរការទៅបានអាស្រ័យទៅលើការផ្ដល់ជំនួយពីសប្បុរសជនទាំងក្នុង និងក្រៅប្រទេស។
លោកវេជ្ជបណ្ឌិត ងួន ច័ន្ទភក្ដ្រា បញ្ជាក់ថា ក្នុងមួយឆ្នាំមន្ទីរពេទ្យត្រូវការថវិកាប្រមាណ ៦លាន ៥សែនដុល្លារ សម្រាប់ប្រតិបត្តិការរបស់ខ្លួន ហើយថាការគៀងគររកថវិកាគឺជាបញ្ហាប្រឈមចម្បងបំផុតរបស់មន្ទីរពេទ្យ។
បើទោះបីជាមន្ទីរពេទ្យទទួលបានមូលនិធិទ្រទ្រង់សម្រាប់ដំណើរការជារៀងរាល់ឆ្នាំក្ដី ក៏ប៉ុន្ដែលោកវេជ្ជបណ្ឌិត ងួន ច័ន្ទភក្ដ្រា ថាការចូលរួមបរិច្ចាកពីសាធារណជនខ្មែរកាន់តែច្រើនដល់មន្ទីរពេទ្យគឺជាកក្តាសំខាន់ក្នុងការទ្រទ្រង់មន្ទីរពេទ្យទៅអនាគត។
លោកវេជ្ជបណ្ឌិតបញ្ជាក់ថា ការចូលរួមរបស់សប្បុរសជនខ្មែរ គឺជាផ្នែកមួយដ៏សំខាន់ដើម្បីបង្ហាញឲ្យឃើញពីទឹកចិត្តខ្មែរស្រឡាញ់ខ្មែរ និងការធ្វើឲ្យកាត់តែប្រសើរឡើងលើសេវាព្យាបាលជូនដល់កុមារកម្ពុជាបន្ថែមទៀត៕
ចុចអាន៖
