៤គន្លឹះ ងាយៗ ជួយឲ្យស្រ្តីក្រោយសម្រាលកូន មានសម្រស់ស្រស់ស្អាត សុខភាពក៏ល្អ

2018-08-29 05:30:00
សុខភាព

2018-08-29 05:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អត្ថបទថ្ងៃនេះ Sabay សូមណែនាំពីគន្លឹះសំខាន់ទាំង៤ សម្រាប់ស្រ្តីដែលទើបសម្រាលកូនថ្មីថ្មោង គួរយល់ដឹង ដើម្បីមានសុខភាពមាំមួន និងសម្រស់នៅតែស្រស់ស្អាត។

បើតាមអ្នកឯកទេសផ្នែកសម្ភព និងរោគស្ត្រី នៃមន្ទីរសម្រាកព្យាបាល និងសម្ភពមាតា វេជ្ជបណ្ឌិត ទី សុវណ្ណរដ្ឋ បានផ្ដល់បទសម្ភាសន៍មកកាន់ Sabay ថា ក្រោយសម្រាលកូនរួច អ្នកម្ដាយគ្រប់រូបអាចមានសុខភាពល្អ និងសម្រស់ស្រស់ស្អាតមកវិញ។

វេជ្ជបណ្ឌិត ទី សុវណ្ណរដ្ឋ

អ្នកម្ដាយទាំងអស់ គ្រាន់តែធ្វើ ៤ចំណុចងាយៗ ទាំងនេះនៅផ្ទះ ដោយមិនចាំបាច់ចំណាយលុយច្រើន ឬពេលវេលាច្រើនទេ។

១. ប្រើក្រេមការពារសង្វារ

ស្ត្រីក្រោយសម្រាលកូនហើយ ច្បាស់ជាប្រាថ្នាចង់បានស្បែកដែលស្អាត គ្មានស្លាកស្នាមសង្វារ។ ចំណុចនេះជារឿងសំខាន់មួយដែលត្រូវធ្វើមុនគេ ក្នុងចំណោមរឿងដទៃ ដើម្បីបានស្បែកស្អាត។ ស្ត្រីគួរទៅពិភាក្សាជាមួយវេជ្ជបណ្ឌិតជំនាញ មុនប្រើក្រេមការពារការបែកសង្វារលើស្បែក។ សូមចាំថា បើអ្នកយឺតយាវ ឲ្យសង្វារចេញមកលើស្បែកហើយ គឺវាមិនងាយបាត់ទៅវិញស្រួលៗទេ។

បើតាមវេជ្ជបណ្ឌិត បានណែនាំឲ្យស្ត្រីអាចប្រើក្រេមការពារសង្វារ តាំងពីអំលុងពេលមានផ្ទៃពោះ រហូតដល់ក្រោយសម្រាលកូនរួច ៦ខែ ដើម្បីឲ្យស្បែកវិលមកសភាពធម្មតាវិញ។

រូបតំណាង (ប្រភពរូប IG-KUN Foto)

២. បញ្ហាស្បែកខ្មៅ

ត្រង់ចំណុច ក ក្បាលជង្គង់ និងកន្លែងផ្សេងទៀត ស្ត្រីភាគច្រើន អាចកើតឡើងនូវបញ្ហាស្រអាប់ស្បែក ឬឡើងខ្មៅតែម្ដង។ ក្រោយសម្រាលកូន ហើយអ្នកអាចមានសុខភាពរឹងមាំឡើងវិញហើយ អ្នកម្ដាយទាំងអស់ អាចប្រើលេដែលមានគុណភាពល្អ តាមការណែនាំរបស់វេជ្ជបណ្ឌិត។ វិធីនេះ នឹងជួយឲ្យស្បែកស្ត្រីឆាប់វិលមកស្អាតវិញបាន។

៣. ហាត់ប្រាណ

ជារឿងដែលពិបាក ដែលឲ្យទៅហាត់ប្រាណ ព្រោះសូម្បីអ្នកធម្មតាៗ ក៏ចង់ខ្ជិលទៅហើយ។ ចុះទម្រាំស្ត្រីកូនខ្ចី ជាប់ដៃ ជាប់ជើង តើឲ្យធ្វើយ៉ាងម៉េចកើត? ចំណុចនេះ សូមកុំច្រឡំ ការហាត់ប្រាណដែលត្រូវទៅកន្លែង Gym ខាងក្រៅ។ តាមពិតទៅ នេះគ្រាន់តែជាការធ្វើលំហាត់ប្រាណងាយៗ នៅផ្ទះ ដែលអ្នកម្ដាយសុទ្ធតែអាចធ្វើបាន។

បន្ទាប់ពីសម្រាលកូនបានរយៈពេល ១ ឬ២ ខែ អ្នកអាចឆ្លៀតពេលហាត់ប្រាណចលនាតិចៗ សន្សឹមៗ នៅចន្លោះពេលកូនង៉ែតតូចគេងលក់។ អ្នកអាចហាត់ដោយចលនា គេង ហើយក្រោកចុះឡើងៗ ដើម្បីឲ្យសាច់ដុំពោះរឹងមាំ តឹងណែន មិនយារធ្លាក់។

ម្យ៉ាងវិញទៀត ការហាត់ប្រាណ អាចជួយឲ្យឆាប់ស្រកក្បាលពោះ និងមានរូបរាងស្រស់ស្អាត បន្ថែមមួយកម្រិត។

៤. គ្រប់គ្រងចំណីអាហារក្រោយសម្រាល

សម្រាប់ស្ត្រីដែលបំបៅកូន ដោយទឹកដោះ គឺចាំបាច់ត្រូវមានរបបអាហារត្រឹមត្រូវ និងមានគុណភាព ដើម្បីអាចផលិតទឹកដោះឲ្យកូនបៅគ្រប់គ្រាន់។ នៅក្រោយពេលសម្រាល អ្នកគួរជ្រើសរើសយកចំណីអាហារណាដែលមានជីវជាតិ និងថាមពល។

សូមកុំញ៉ាំចេបចុប ឃើញអីក៏ឃ្លាន ញ៉ាំតាមចង់ ព្រោះការញ៉ាំច្រើនជ្រុល វាមិនអាចឲ្យអ្នកមានសុខភាពល្អទេ ក្រៅតែធ្វើឲ្យអ្នកកាន់តែធាត់ ខូចរាងធំទៅៗ។

អត្ថបទ៖ ពៅ រក្សា