សហគមន៍ “កន្ដ្រកស្នាដៃខ្មែរ” ខេត្ដសៀមរាប តស៊ូត្បាញសម្ភារៈប្រើប្រាស់ ដើម្បីជីវភាព និងអភិរក្សមុខរបរដូនតា

2024-04-09 11:00:00
សេដ្ឋកិច្ច

2024-04-09 11:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

សហគមន៍ “កន្ដ្រកស្នាដៃខ្មែរ” ភូមិគ្រួស សង្កាត់ស្វាយដង្គំ ក្រុងសៀមរាប ខេត្ដសៀមរាប ដែលមានសមាជិកជាង ១០គ្រួសារ កំពុងខ្នះខ្នែងបង្កើនការត្បាញ ដើម្បីផ្គត់ផ្គង់ជីវភាពផង និងអភិរក្សមុខរបរដូនតាផង។ នៅគ្រាដែលដើមផ្អាវ ដែលជាវត្ថុធាតុដើមដ៏ចាំបាត់ក្នុងការត្បាញកន្ដ្រក និងសម្ភារៈប្រើប្រាស់ជាច្រើនមុខទៀត កាន់តែខ្សត់ ប្រជាសហគមន៍ក៏កាន់តែមានក្ដីបារម្ភដែរ។

ប្រធានសហគមន៍ “កន្ដ្រកស្នាដៃខ្មែរ” លោក យឿន ង៉ា មានប្រសាសន៍ថា ដោយទឹកចិត្ដស្រឡាញ់ និងដើម្បីរក្សាប្រភពចំណូលមួយផ្នែកក្នុងគ្រួសារផង មានសមាជិក ៤គ្រួសារដែលបានចាប់យកមុខរបរនេះតាំងពីឆ្នាំ១៩៧៩ នៅតែតស៊ូធ្វើវារហូតមកដល់សព្វថ្ងៃ ហើយក៏បានអូសទាញសមាជិកផ្សេងទៀតឱ្យចូលរួមដែរ។ បច្ចុប្បន្ន ពង្រីកបាន ១០គ្រួសារ ដោយក្នុងមួយគ្រួសារមានមនុស្សលើសពី ២នាក់ មានលទ្ធភាពធ្វើកន្ដ្រក។

បើតាមប្រធានសហគមន៍រូបនេះ កន្ដ្រក និងសម្ភារៈដែលត្បាញបាន ត្រូវលក់បោះដុំក្នុងតម្លៃមួយថោក ដោយមានម៉ូយចាំលើកយកទៅលក់បន្ដនៅតំបន់ប្រាសាទអង្គរវត្ដ និងតាមហាងលក់វត្ថុអនុស្សាវរីយ៍នានា។ ក្នុងមួយគ្រួសារ អាចរកចំណូលបានចន្លោះ ២០ម៉ឺន ទៅ៥០ម៉ឺនរៀល ក្នុងមួយខែ។

បច្ចុប្បន្ន អ្នកស្រុក ជាពិសេសសមាជិកសហគមន៍ “កន្ដ្រកស្នាដៃខ្មែរ” បាននាំគ្នាចេញទៅរកដើមផ្អាវដែលជាវត្ថុធាតុដើមសម្រាប់ត្បាញកន្ដ្រក និងសម្ភារៈប្រើប្រាស់រហូតដល់ខេត្ដកំពង់ធំ ខណៈដែលដើមផ្អាវល្អៗលែងមានទៀតនៅក្នុងទឹកដី នៃភូមិគ្រួស សង្កាត់ស្វាយដង្គំ ក្រុងសៀមរាប ខេត្ដសៀមរាប។ ប៉ុន្ដែអ្នកភូមិមិនសូវជាត្អូញត្អែលើបញ្ហានេះឡើយ ដោយគ្រាន់តែចង់ឱ្យអ្នកប្រើប្រាស់បន្ដគាំទ្រស្នាដៃខ្មែរ ហើយក្រុមហ៊ុនធំៗនៅបន្ដជួយគាំទ្រទៀត។

សមាជិកសហគមន៍ម្នាក់ បានប្រាប់ Sabay ថា រូបអ្នកស្រី និងសមាជិកសហគមន៍ចន្លោះពី៦ ទៅ ១០នាក់ តែងតែធ្វើដំណើរតាមរ៉ឺម៉ក ចូលព្រៃក្នុងខេត្ដកំពង់ធំ នៅតាមតំបន់មួយចំនួនដែលសម្បូរដើមផ្អាវ រៀងរាល់មួយខែម្ដង។ អ្នកស្រីថា ក្នុងដំណើរចេញទៅរកដើមផ្អាវម្ដង ត្រូវចំណាយប្រាក់ប្រមាណជា ៥ម៉ឺនរៀល ដោយគ្រាន់តែថ្លៃជិះរ៉ឺម៉ក គឺអស់ ២ម៉ឺនរៀលទៅហើយ។

អ្នកស្រីបញ្ជាក់ថា បច្ចុប្បន្នអ្នកភូមិ ជាពិសេសសមាជិកសហគមន៍ពឹងផ្អែកស្ទើរទាំងស្រុងលើម៉ូយធំ គឺក្រុមហ៊ុនទឹកផ្លែឈើ Yeo’s ដែលបានទទួលទិញអស់ៗពីអ្នកភូមិធ្វើឱ្យអ្នកភូមិមានចំណូលទៀងទាត់ ហើយគិតតែពីខំប្រឹងត្បាញដោយមិនសូវខ្វល់ខ្វាយពេក រឿងទីផ្សារលក់ផលិតផលចេញ។ អ្នកស្រីសំណូមពរឱ្យម្ចាស់ឧបត្ថម្ភ និងដៃគូពាក់ព័ន្ធបន្ដជួយលើកស្ទួយសេដ្ឋកិច្ចគ្រួសាររបស់សមាជិកសហគមន៍តាមរយៈការទិញផលិតផលអ្នកភូមិ។

ទាក់ទងនឹងដំណើរការផលិតរបស់សហគមន៍នេះ ក្រុមហ៊ុន Yeo’s បង្ហាញការប្តេជ្ញាចិត្តយ៉ាងជ្រាលជ្រៅក្នុងការក្លាយជាកម្លាំងវិជ្ជមាននៅក្នុងសហគមន៍ដែលខ្លួនប្រតិបត្តិការ។ ទំនួលខុសត្រូវសង្គម (CSR) គឺជាបេះដូងនៃបេសកកម្មរបស់យើង ហើយយុទ្ធនាការចូលឆ្នាំខ្មែរនេះគឺជាឧទាហរណ៍ដ៏ល្អឥតខ្ចោះ។ តាមរយៈការប្រារព្ធពិធីវប្បធម៌ខ្មែរ និងការវិនិយោគដោយផ្ទាល់នៅក្នុងសហគមន៍សិប្បករខេត្តសៀមរាបជាមួយនឹងកន្ត្រកត្បាញពិសេសរបស់យើង យើងកំពុងបង្ហាញពីរបៀបដែល ទំនួលខុសត្រូវសង្គម អាចមានឥទ្ធិពល និងផ្ដល់ភាពរំភើបរីករាយ។

តាមរយៈកិច្ចសម្ភាសន៍ជាមួយ Sabay អ្នកស្រី សូ ស្រីស ប្រធានផ្នែកទីផ្សារនៃក្រុមហ៊ុន Yeo's Cambodia បានលើកឡើងថា៖ “ការឆ្លើយតបយ៉ាងក្លៀវក្លារបស់អតិថិជនរបស់យើងបង្ហាញថាពួកគេពេញចិត្តមិនត្រឹមតែផលិតផលរបស់យើងប៉ុណ្ណោះទេ ប៉ុន្តែថែមទាំងការប្តេជ្ញាចិត្តរបស់យើងក្នុងការថែរក្សាជំនាញប្រពៃណី និងការកែលម្អជីវភាពរស់នៅក្នុងប្រទេសកម្ពុជាផងដែរ”។

ជោគជ័យដ៏អស្ចារ្យបំផុត គឺការឆ្លើយតប ពីសាធារណជនកម្ពុជា! ក្រុមហ៊ុន បានប៉ាន់ស្មានតម្រូវការ ហើយបានរៀនមេរៀនដ៏មានតម្លៃអំពីការធ្វើមាត្រដ្ឋានផលិតកម្ម។ សំខាន់ក្រុមហ៊ុន បានរៀនថាប្រជាជនកម្ពុជា ដាក់តម្លៃ យ៉ាងខ្លាំងលើការគាំទ្រសហគមន៍របស់ខ្លួន។ ទន្ទឹមគ្នាក្រុមហ៊ុន គ្រោងនឹងធ្វើយុទ្ធនាការម្តងទៀតក្នុងឱកាសពិធីបុណ្យភ្ជុំបិណ្ឌខាងមុខ។ ការទទួលស្វាគមន៍ជាវិជ្ជមាននេះ បានលើកទឹកចិត្តយើងឱ្យស្វែងរកគំនិតផ្តួចផ្តើមនៃទំនួលខុសត្រូវសង្គម កាន់តែរឹងមាំ មិនត្រឹមតែជាក្រុមហ៊ុនប៉ុណ្ណោះទេ ប៉ុន្តែជាកាតាលីករសម្រាប់កិច្ចសហប្រតិបត្តិការជាមួយអង្គការដែលចាប់អារម្មណ៍ផ្សេងទៀត ដើម្បីបង្កើនឥទ្ធិពលវិជ្ជមានរបស់យើង៕

ជិន សុភ័ក្ដ្រ